Omu Saulu afwile, Ndavichi apwile jino mwangana. Halwola kana apwile namyaka yakusemuka 30. Omu mwahichile myaka yayivulu kufuma halwola aputukile kuyula, kaha likumbi limwe apwile helu lyazuvo yenyi naufuku, amwene pwevo wamwaza. Kufumaho, Ndavichi ehwile lijina lyauze pwevo kaha vamulwezele ngwavo ikiye Mbate-sheva pwevo lyaUliya uze apwile liswalale. Jino Ndavichi atumine kanganda akasanyike Mbate-sheva ezenga kunganda yenyi. Ngocho, valingile ukoji kaha uze pwevo emichile. Oloze Ndavichi asakile kusweka vyuma alingile. Ngocho, alwezele kapitau kamaswalale jenyi akahake Uliya kulutwe omu jita nayikatohwa kaha vakiko vakakinduluke kunyima yenyi mangana vakamujihe. Omu Uliya vamujihile mujita, Ndavichi ambachile Mbate-sheva.

Chipwe ngocho, Yehova amwene vyuma vyavipi alingile Ndavichi. Jino Yehova alingile ngachilihi? Yehova atumine kapolofweto Natane kuli Ndavichi. Natane ambile ngwenyi: ‘Lunga umwe muka-luheto apwile namikoko vavavulu chikuma, oloze muka-kuhutwa apwile namwanamukoko umwe kaha wamundende uze azangile chikuma. Uze muka-luheto atambwile uze mwanamukoko kuli muka-kuhutwa.’ Hakwivwa mazu kana, Ndavichi apihililile chikuma nakwamba ngwenyi: ‘Uze muka-luheto atela kufwa!’ Kaha Natane alwezele Ndavichi ngwenyi: ‘Ove yove uze muka-luheto!’ Ngocho, Ndavichi evwile kupihya chikuma, kaha etavilile mulonga wenyi kuli Natane nakwamba ngwenyi: ‘Ngunalingi shili kuli Yehova.’ Eyi shili yanehele ukalu waunene kuli Ndavichi natanga yenyi. Numba tuhu, Yehova azangamishile Ndavichi, oloze amwitavishile atwaleho lika kuyula mwomwo apwile wamuchano kaha nawa wakulinyisa.

Ndavichi asakile kutunga tembele yaYehova, oloze Yehova asakwile Solomone mwanaNdavichi akatunge tembele kana. Kaha Ndavichi ambile  ngwenyi: ‘Zuvo yaYehova yatela kupwa yamwaza chikuma. Hakuwana nge, Solomone achili kanyike nangumukafwa kulongesa vyuma.’ Ngocho, Ndavichi aputukile kukungulwila Solomone vyuma vyakuzachisa. Ndavichi ahanyine jimbongo jajivulu jakukundwiza mulimo wakutunga tembele. Kaha awanyine vatu vatachikijile kanawa mulimo wakutunga. Akungulwile ulu napalata, nakuneha mishitale kufuma kuTule nakuShitone. Kahomu apwile kwakamwihi nakufwa, Ndavichi ahanyine Solomone jindongi jamwakutungila tembele. Ngocho ambile ngwenyi: ‘Yehova angulwezele ngukusonekele vyuma vyosenevi. Kanda kwivwa womako. Yehova mwakukafwa. Shikaho umika yako ukazate.’