Yehova alwezele Samwele ngwenyi: ‘Yako kuzuvo yaYese, mwanenyi umwe mwakapwa mwangana wavaIsalele.’ Kaha Samwele ayile kuzuvo yaYese. Omu amwene mwanaYese watwatwa walunga, alyambile mumuchima wenyi ngwenyi: ‘Pamo ikiye vene ou.’ Oloze Yehova alwezele Samwele ngwenyi: ‘Ou keshi ikiyeko, mwomwo ami ngweji kumonanga vili mumuchima wamutu, keshi solokeso yenyiko.’

Kutwala muze, Yese anehele vana venyi vakwavo 6 kuli Samwele. Oloze Samwele ambile ngwenyi: ‘Yehova kasakwile mutu numba umwe hali avako. Uno uli navana veka vamalunga tahi?’ Yese amukumbulwile ngwenyi: ‘Kunasale kaha walunga umwe wakanyike, lijina lyenyi ikiye Ndavichi. Ali nakufunga mikoko jami.’ Omu Ndavichi ejile, Yehova alwezele Samwele ngwenyi: ‘Ou ikiye ngunasakula!’ Ngocho, Samwele ahingunwine maji mumutwe waNdavichi nakumuwavisa mangana akapwe mwangana wavaIsalele kulutwe.

Omu mwahichile myaka yayivulu, vaIsalele vapwile nakulwa jita navaFwilishite, vaze vapwile nachindume wangolo muka-kuvashila jita, lijina lyenyi ikiye Ngolyate. Hakumbi hakumbi Ngolyate atolekelenga vaIsalele. Avalwezelenga ngwenyi: ‘Tumenu lunga uze nahase kulwa nayami. Nge mwangufungulula kaha natupwa tuvangamba jenu, oloze nge yami nangumufungulula kaha namupwa muvangamba jetu.’

Ngocho, Ndavichi ayile kuchilombo chamaswalale javaIsalele nakutwalila vayaya jenyi vyakulya vaze vapwile maswalale. Kaha evwile vyuma apwile nakuhanjika Ngolyate, ngocho ambile ngwenyi: ‘Nanguya nakulwa nenyi!’ Mwangana Saulu ambile ngwenyi: ‘Ove umwana wamundende chikuma.’ Kaha Ndavichi amukumbulwile ngwenyi: ‘Yehova mwangukafwa.’

 Saulu ambachile uvwalo wenyi wajita nakuhana Ndavichi avwale. Oloze Ndavichi ambile ngwenyi: ‘Kangweshi kuhasa kulwa jita nauvwalo kanako.’ Kufumaho, Ndavichi ambachile chikapa chenyi nakushikumuka kulwiji. Kaha asakwile malolwa atanu asenena nakuwahaka mungonga yenyi. Ayile jino nakuliwana naNgolyate. Omu Ngolyate amwene Ndavichi, atambakanyine ngwenyi: ‘Twaya kuno, ove kanyike wamundende. Nanguhana nyama yove kutujila vamwilu nakuli visuma vamuchipapa.’ Ndavichi kevwile womako, oloze amukumbulwile nalizu lyakukanguka ngwenyi: ‘Ove uli nakwiza kuli ami napoko yamukwale nalikunga, oloze ami nangwiza mulijina lyaYehova. Kaweshi nakulwa nayetuko, oloze uli nakulwa naKalunga. Kaha vatu vosena navatachikiza ngwavo Yehova apwa wangolo kuhambakana poko yamukwale chipwe likunga. Mwamihana muvosena mumavoko etu.’

Kaha Ndavichi ambachile lilolwa nakulihaka muchikapa nakulyasa nangolo jenyi josena. Yehova amukafwile, lize lilolwa lyakwachile Ngolyate nakumwingila muluholo. Hahaze vene uze chindume alimbukile nakufwa. Kufumaho, vaFwilishite vosena vachinyine. Uno weji kufwelelanga Yehova ngana muze alingilenga Ndavichi tahi?