Yehova ahanyinenga vaIsalele vaka-kuyula mangana vavatwaminyine, oloze vakiko vasakile kupwa namwangana wavo. Kaha valwezele Samwele ngwavo: ‘Mafuchi osena anatujingilika ali navamyangana. Nayetu tunakusaka kupwa namwangana wakutuyula.’ Samwele atachikijile ngwenyi chuma kana chapwile chakuhenga ngocho alombele kuli Yehova. Kaha ikiye amulwezele ngwenyi: ‘Vatu kaveshi nakukana yoveko, oloze vali nakukana yami. Valweze ngwove navapwa namwangana, kaha mwangana kana mwakatondanga vyuma vyavivulu kuli vakiko.’ Chipwe ngocho, vatu vambile ngwavo: ‘Oho kaheshi ukaluko, oloze etu tunakutonda kaha mwangana!’

Yehova alwezele Samwele ngwenyi Saulu ikiye mwapwa mwangana watete. Omu Saulu ayile kuli Samwele kuLama, Samwele awavishile Saulu hakumuhingunwina maji mumutwe wenyi.

Kufumaho, Samwele asanyikile vaIsalele vosena mangana avalweze mwangana wavo. Oloze Saulu kavamumweneko. Mwomwo ika? Mwomwo aswamine haviteli. Kahomu vamuwanyine vamunehele nakumwimika mukachi kavatu. Saulu apwile wamusuku kuhambakana vosena, kaha nawa wamwaza. Ngocho, Samwele ambile ngwenyi: ‘Talenu ou mutu nasakula Yehova.’ Kahomu vatu vamwene mwangana vawahililile chikuma.

Hakavanga Mwangana Saulu evwilililenga Samwele nakulyononona kuli Yehova. Kutwala muze alumukile. Chakutalilaho, mwangana katelelele kulumba mawanako. Lwola lumwe, Samwele alwezele Saulu amuvandamine hakulumba wana, oloze Samwele kejile washiko. Ngocho, Saulu alumbile mawana chakuzeneka mutu wakumuhana lisesa. Uno omu ejile Samwele alingile ngachilihi? Amulwezele ngwenyi: ‘Kawatelanga kulikanga kuli Yehovako.’ Kutala Saulu alinangwile havyuma alimbenjele tahi?

Omu Saulu ayile nakulwa jita navaAmaleke, Samwele alwezele Saulu ngwenyi atelele kujiha vosena. Oloze Saulu kajihile Mwangana  Angangeko. Ngocho, Yehova alwezele Samwele ngwenyi: ‘Saulu nalikange kuli ami, keshi nakungwivwililako.’ Echi chevwishile Samwele kupihya kumuchima, kaha alwezele Saulu ngwenyi: ‘Hakuwana nge unalitwamina kwononoka Yehova, shikaho mwasakula mwangana weka.’ Omu Samwele alumukile nakuputuka kuya, Saulu amukokele kuuvwalo wenyi kaha wapulikile. Kaha Samwele ambile ngwenyi: ‘Nganomu unapulu echi chikovelo, Yehova nakutambula wangana.’ Ngocho, Yehova amutambwile wangana nakuuhana kumutu uze amuzangile nakumwononoka.