Yonatane mwanaSaulu apwile lunga muka-kwasa jita wangolo. Ndavichi ambile ngwenyi Yonatane apwile namuchima wakwanguhwa nge ngonga kaha nawa wangolo kuhambakana ndumba. Likumbi limwe Yonatane amwene maswalale javaFwilishite 20 vanemana hapili. Kaha ambile kuli muka-kumumbachila vitwa vyajita ngwenyi: ‘Natuvalukuka nge Yehova mwatwitavisa tulinge ngocho. Nge vaFwilishite navatusanyika tulwenga jita, kaha natutachikiza mwakuvalukukila.’ Kaha vaFwilishite vatambakanyine nalizu lyakukanguka ngwavo: ‘Twayenu tulwenga!’ Kaha Yonatane namutu wenyi vayile hapili nakufungulula vaze maswalale vosena.

Yonatane ikiye atelelele kuswana hawangana mwomwo ikiye apwile mwanaSaulu watwatwa. Oloze ikiye atachikijile ngwenyi Yehova nasakula lyehi Ndavichi kupwa mwangana, ngocho kamwivwililile lwisoko. Yonatane naNdavichi vapwile masepa vamwenemwene. Valishikile kulikinga umwe  namukwavo nakulihakwila. Ngocho, Yonatane ahanyine Ndavichi uvwalo wenyi, napoko yamukwale, nauta wenyi wamanana, namuhya wenyi kupwa chinjikizo chausepa wavo.

Omu Ndavichi apwile nakuchina Saulu, Yonatane ayile kuli ikiye nakumulweza ngwenyi: ‘Jikiza, pwako uwakumika. Yehova nakusakula upwenga umwangana. Natata vene natachikiza chuma kana.’ Uno nayove unakusaka kupwa nasepa wamwenemwene ngana mwaYonatane tahi?

Yonatane ahakile kuyoya chenyi muponde mapapa kakavulu mangana akafwe sepa lyenyi. Atachikijile ngwenyi Mwangana Saulu ali nakufwila kujiha Ndavichi, ngocho ambile kuli mwangana ngwenyi: ‘Mulinga shili nge mujiha Ndavichi, mwomwo nevi napihisa vene vyauchi.’ Echi chalingishile Saulu apihilile chikuma naYonatane. Omu mwahichile myaka yayivulu, Saulu naYonatane vosena vafwile kujita.

Hanyima yakufwa chaYonatane Ndavichi ayile nakutondatonda mwanaYonatane walunga Mefwivoshete. Omu Ndavichi awanyine Mefwivoshete amulwezele ngwenyi: ‘Hakuwana nge iso apwile sepa lyami wamwenemwene, shikaho nangukuzakamanga mukuyoya chove chosena. Mutwamanga nayami hamwe nakulilanga kumesa yami.’ Chikupu vene, Ndavichi kavulyamine sepa lyenyi Yonataneko.