Mwangana Ahave atalilenga munjanena yanganda yenyi yize yapwile muYezelele, kaha amwenenga wande wamivinyo walunga umwe walijina lyaNavote. Ahave afwililile kupwa nou wande, kaha ayile kuli Navote amulanjisewo. Oloze, Navote akanyine mwomwo jishimbi jaYehova jakanyishile kulanjisa uswana. Uno Ahave avumbikile Navote hakulinga chuma chakwoloka tahi? Nduma. Ahave apihililile chikuma, kahechi chamulingishile akane kulovoka mukapete kenyi kakusavala nakukana kulya.

Yezevele Lisano lyaAhave, amulwezele ngwenyi: ‘Yove umwangana wavaIsalele ngocho unahase kupwa navyuma vyosena vize musaka. Nangukuhana wande kana.’ Ngocho, Yezevele asonekele mikanda, nakuyituma kuli vakulwane, navilolo vamunganda yize atwaminenga Navote vakamuvangijikile ngwavo nangula Kalunga nakumwasa malolwa afwenga. Ngocho, vaze vakulwane valingile vyuma vyosena vize avalwezele Yezevele. Kaha ambile kuli lunga lyenyi Ahave ngwenyi: ‘Navote nafu. Shikaho, wande wamivinyo unapu wove.’

Yezevele ajihile vatu vavavulu chakuzeneka mulonga keshi nge Navote kahako. Ajihile vatu vavavulu vaze vazangile Yehova. Alemeselenga makombelo nakulinga vyuma vyavipi. Yehova amwenenga vyuma vyosena vyavipi alingilenga Yezevele. Jino Yehova alingile ika kuli Yezevele?

Omu Ahave afwile, mwanenyi walunga walijina lyaYeholame amuswanyine. Ngocho Yehova atumine lunga walijina lya Yehu azangamise Yezevele natanga yenyi.

Yehu ayile mulitemba lyenyi kuYezelele kuze atwaminenga Yezevele. Ngocho, Yeholame ayile nakuliwana naYehu nakumuhulisa ngwenyi: ‘Uno uneza mukuunda tahi?’ Kaha Yehu ambile ngwenyi: ‘Kakweshi kupwa kuundako nge noko, Yezevele chalinga lika vyuma vyavipi.’ Hakwivwa mazu kana, Yeholame alumwine litemba lyenyi nakuputuka kuchina. Oloze Yehu ashile Yeholame nauta wamanana, kaha afwile.

 Jino Yehu ayile kunganda yaYezevele. Omu evwile ngwavo Yehu anakwiza, alikwichile ulombo kumeso enyi, nakuwahisa jikambu jenyi, kaha atalilenga munjanena mangana amone Yehu. Omu Yehu ahetele, Yezevele amumenekele mujila yakasautu. Jino Yehu atambakanyine kuli vangamba jaYezevele vaze vemanyine kwakamwihi naikiye ngwenyi: “Mumbilenu hamavu!” Ngocho vamushinjikile nakumumbilila munjanena, kaha aholokelele hamavu nakufwa.

Kufumaho, Yehu ajihile vana vaAhave 70 nakutomesa lifuchi hakufumisamo kulemesa chaMbale. Kutala unamono ngwove Yehova atachikiza vyuma vyosena, kaha nawa eji kuzangamisanga vaze veji kulinganga vyuma vyavipi halwola lwakutamo tahi?