Wangana wavaIsalele wamiyachi 10 wapwile navamyangana vavavulu vavilinga vyavipi, oloze Ahave ahambakanyine vosena. Ambachile pwevo wavilinga vyavipi uze alemeselenga Mbale, lijina lyenyi ikiye Yezevele. Ahave naYezevele valingishile vatu vavavulu mulifuchi lyavo valemese Mbale nakujiha vapolofweto jaYehova. Uno Yehova alingile ika hachuma kanechi? Atumine kapolofweto Elija kutwala mujimbu kuli Ahave.

Elija alwezele Mwangana Ahave ngwenyi vula kayeshi kunoka muIsalele, mwomwo yavilinga vyavipi vize vyalisalile mulifuchi kana. Ngocho, jimbuto kajemineko kaha vatu vafwile zala hamyaka yitatu. Kutwala muze, Yehova atumine cheka Elija ayenga kuli Ahave. Kaha uze mwangana ambile ngwenyi: ‘Ove yove uli nakunehela vatu ukalu! Yove unalingisa vyumevi visoloke.’ Elija akumbulwile ngwenyi: ‘Keshi yami ngunalingisa kupwenga changako. Yove unalingisa mwomwo yakulemesa Mbale. Shikaho tulinge ngana, kungulula vatu vosena navapolofweto jaMbale vezenga helu lyaPili Kalamele.’

Ngocho vatu valikungulwile hapili. Kaha Elija ambile ngwenyi: ‘Alumunenu vishinganyeka vyenu musakuleho, kachi nge Yehova ikiye Kalunga wamuchano, kaha mukavangizenu. Oloze nge Mbale ikiye Kalunga wamuchano, kaha mukavangizenu. Shikaho sakulenuho. Lweza vapolofweto jaMbale 450 vezenga nakuhana wana kuli kalunga kavo, kaha ami nawa nangwiza nawana wakuhana kuli Yehova. Weshowo Kalunga mwakumbulula hakuneha kakahya, ikiye Kalunga wamuchano.’ Ngocho vatu vosena vetavilile.

Kutwala muze, vapolofweto jaMbale vahanyine wana wavo. Kaha vasanyikile kalunga kavo likumbi lyamuundu ngwavo: ‘Ove Mbale achitukumbulule!’ Omu Mbale ahonene kukumbulula, Elija aputukile kuvahulamisa nakwamba ngwenyi: ‘Tambakanenu chikuma noho hakumina ngolo jenu. Pamo nasavala, kaha ali nakusakiwa kumuhindula.’ Shikaho, ava vapolofweto vasanyikile lika kalunga kavo Mbale palanga naufuku. Chipwe ngocho, kavakumbulwileko.

Kufumaho, Elija ahakile wana wenyi halijiko lyakulumbila nakuhingunwinaho meya. Kaha alombele kuli Yehova ngwenyi: ‘Ove Yehova ngunakulembelela ngwami, lingisa vatu vatachikize ngwavo yove wapwa uKalunga wamuchano.’ Hahaze vene, Yehova atumine kakahya kufuma mwilu nakwocha aze mawana akulumba. Ngocho vatu vosena vatambakanyine ngwavo:  ‘Yehova ikiye Kalunga wamuchano!’ Kaha Elija ambile ngwenyi: ‘Kanda kwechelela vapolofweto jaMbale vachineko!’ Ngocho, halikumbi vene lize vapolofweto jaMbale vakuheta 450 vavajihile.

Omu kalivwi kakandende kasolokele hakalungalwiji, Elija alwezele Ahave ngwenyi: ‘China, vula nayiputuka kunoka kasa litemba lyove uyenga washi kwimbo lyove.’ Mavwi elavile mwilu, kaha peho yaputukile kuhuhwa, kufumaho vula jino yaputukile kunoka. Ngocho changa chakumine. Ahave atambukishile washi litemba lyenyi. Oloze Yehova akafwile Elija alahe washi kuhambakana litemba. Uno echi chalumbununa nge ukalu wosena apwile nakumona Elija wakumine tahi? Mana tutale.