Mwangana waYuta Yehoshafwate apuzwile majiko akulumbila aMbale nakufumisa makombelo osena mulifuchi. Asakile vatu vatachikize jishimbi jaYehova. Kufumaho, atumine vilolo jenyi navaLevi vanangule vatu Jishimbi jaYehova mujinganda jaYuta josena.

Vatu vamujinganda jize japwile kwakamwihi vevwilenga woma kulwa navaYuta mwomwo vatachikijile ngwavo Yehova apwile navatu jenyi. Vamwe vanehelenga namawana kuli mwangana Yehoshafwate. Oloze vaMowave, navaAmone, navatu vakuSeile vejile nakulwa navaYuta. Yehoshafwate apendaminyine hali Yehova amukafwe, ngocho alwezele vatu vosena valikungulwile muYelusalema. Kaha alombele kumeso avatu vaze valikungulwile ngwenyi: ‘Ove Yehova katweshi kuhasa kufungulula chakuzeneka ove kutukafwako. Shikaho, tunakulembelela utulweze vyakulinga.’

Yehova akumbulwile kulomba chenyi, ambile ngwenyi: ‘Kanda namwivwa womako, nangumikafwa. Imanenu muvihela vyenu, imanenu ndundulu mangana mumone omu nangumilwila.’ Uno Yehova avalwilile ngachilihi?

Lichako nachimene, Yehoshafwate asakwile vaka-kwimba myaso nakuvalweza vatetekele kulutwe lwamalunga vaka-kwasa jita. Ngocho, vatambukile kufuma kuYelusalema nakuheta kuchihela chaJita vavulukile ngwavo Tekowa.

Omu vaka-kwimba myaso vapwile nakwimba nakuwahilila, Yehova apwile nakulwila vatu jenyi. Yehova aluwanganyishile vaAmone navaMowave mangana vaputuke kulijiha mwavomwavo, ngocho naumwe ayovokele wauchi. Oloze Yehova akingile vatu vamuYuta, navaka-kwasa jita navapilishitu. Shikaho, vatu vaze vatwaminenga mumafuchi apwile mwakamwihi vevwile vyuma alingile Yehova, kaha vatachikijile ngwavo Yehova apwile lika nakukinga vatu jenyi. Uno Yehova eji kulwilanga ngachilihi vatu jenyi? Eji kulinganga ngocho mujijila jajivulu. Kasakiwa vatu kumukafwa alinge ngochoko.