Omu Solomone apwile mwangana wavaIsalele, Yehova amuhulishile ngwenyi: ‘Vyuma muka uli nakusaka ngukuhane?’ Solomone akumbulwile ngwenyi: ‘Ami ngukanyike nevi ngunakulinga vene kangwavitachikijileko. Shikaho, nguli nakukulomba unguhane mangana aze nawangukafwa ngutwaminyinenga kanawa vatu jove.’ Ngocho Yehova amulwezele ngwenyi: ‘Hakuwana nge unangulombo mangana shikaho nangukulingisa upwenga umutu wamangana chikuma hano hamavu. Kaha nangukulingisa upwenga naluheto lwaluvulu. Kachi nge mwononokanga kuli ami, kaha mushimbula hano hamavu.’

Solomone aputukile kutunga tembele. Azachishile ulu wamwaza chikuma, napalata, namitondo namalolwa. Malunga namapwevo vaze vatachikijile kanawa kuzata ou mulimo vazachilenga hatembele. Omu mwahichile myaka 7, yize tembele yakumine kutunga kaha vayikunjikile kuli Yehova. Tembele kana yapwile nalijiko lyakulumbila mawana. Solomone afukamine kulijiko lyakulumbila nakuputuka kulomba ngwenyi: ‘Ove Yehova, tunatachikiza ngwetu eyi tembele yayindende kuli ove, kaha nawa keshi yamwaza chikuma kuli oveko, oloze tunakukulembelela witavile kulemesa chetu nakwivwilila kukulomba chetu.’ Vyuma muka alingile Yehova vize vyasolwele nge etavilile tembele nakukumbulula kulomba chaSolomone? Omu Solomone akumishile kulomba, hahaze vene kakahya kafumine mwilu nakwocha mawana akulumba osena aze apwile halijiko lyakulumbila. Yehova evwililile kuwaha yize tembele. VaIsalele vawahililile chikuma hakumona chuma kana.

Mwangana Solomone vamutachikijile kuli vaIsalele navatu vakwakusuku ngwavo apwile wamangana chikuma. Vatu vayilenga kuli Solomone nakumulweza ukalu wavo mangana avakafwe. Namwangana wapwevo wakuSheva ayile nakumuhulisa vihula vyavikalu mangana amweseke. Omu evwile kukumbulula chenyi ambile ngwenyi: ‘Kangwafwelelele vyuma vangulwezele vatu hali oveko, oloze ngunalimwena, kaha ngunatachikiza jino ngwami watwama namangana chikuma kuhambana nomu vangulwezele. Yehova Kalunga kove nakukisula.’ Muyachi wavaIsalele wayoyelenga kanawa, kaha vatu vapwile vakuwahilila. Chipwe ngocho, vyuma vyalumukile.