Omu kwapwile changa chachinene, Yehova alwezele Elija ngwenyi: ‘Yako kuZalefwate. Mukawana tuliwe uze mwakakuhana kulya.’ Omu Elija ahetele kuvikolo vyanganda, amwene tuliwe wakuhutwa ali nakunona jikunyi. Ngocho, Elija amulombele meya akunwa. Kahomu uze tuliwe ayile nakumbata meya, Elija amusanyikile cheka nakumulweza ngwenyi: ‘Unguneheleko nakachihanda kambolo ngulyenga.’ Oloze uze tuliwe ambile kuli ikiye ngwenyi: ‘Kangweshi nambolo yakukuhanako. Nguli kaha naunga waundende natumaji nawa twatundende vyayami namwanami walunga kaha.’ Jino Elija amulwezele ngwenyi: ‘Yehova nahanjika ngwenyi, nge mungwochela mbolo, kaha unga wove namaji ove kavyeshi kukumako.’

Ngocho, uze tuliwe ayile kuzuvo yenyi kaha ochele mbolo nakuyihana kuli kapolofweto kaYehova. Kaha uze tuliwe namwanenyi walunga vapwile lika navyakulya nomu chakumine changa, ngana muze ahanjikile Yehova. Ngocho, mulondo wenyi waunga nasaji yamaji vyapwile lika vyakuzala.

Chaluvinda kwasolokele ukalu. Uze mwanatuliwe walunga avijile chikuma ngocho afwile. Kaha uze tuliwe alembelelele Elija amukafwe.  Ngocho, Elija atambwile uze mwana kumavoko anaye, ayile nenyi mukapete kahelu muze apwilenga nakutwama, kaha amusavalikile hakahela kenyi nakuputuka kulomba ngwenyi: ‘Ove Yehova Kalunga kami, lingisa ou kanyike ayoye cheka.’ Uno unatachikiza ovyo vyalingisa chuma alombele Elija kupwa chakukomwesa tahi? Mwomwo twatachikiza ngwetu, halwola kana kakwapwile mutu afwile nakuyoya chekako. Kaha nawa uze tuliwe namwanenyi kavapwile vaIsaleleko.

Chipwe ngocho, uze mwana walunga ayoyele cheka nakuputuka kuhwima. Ngocho Elija alwezele uze tuliwe ngwenyi: ‘Tala! Mwanove nayoyo cheka.’ Uze tuliwe evwile chikuma kuwaha kaha ambile kuli Elija ngwenyi: ‘Chikupu vene, ove umutu waKalunga. Ngunatachikiza ngocho, mwomwo uli nakuhanjika kaha vyuma vize Yehova ali nakukulweza uhanjike.’