Wangana waAsulya wafungulwile wangana wavaIsalele wamiyachi 10. Kaha Senakelive, mwangana waAsulya asakile kufungulula nawangana waYuta wamiyachi yivali. Ngocho, aputukile kunyemukila nganda hinganda yamuYuta. Chipwe ngocho, afwililile chikuma kutambula nganda yaYelusalema yize azangile chikuma. Senakelive katachikijile ngwenyi Yehova apwile nakukinga nganda yaYelusalemako.

Mwangana waYuta Hezekiya ahanyine Senakelive jimbongo jajivulu mangana ahone kulukuka Yelusalema. Numba tuhu Senakelive atambwile jimbongo kana, oloze apwile nakufwila lika kulukuka Yelusalema. Vatu munganda kana vevwilenga woma mwomwo vaAsulya vapandamine chikuma kwakamwihi nanganda. Ngocho, Hezekiya avalwezele ngwenyi: ‘Kanda namwivwa womako. Numba tuhu vaAsulya vali nangolo, oloze Yehova mwatuhana ngolo kuhambakana vakiko.’

Jino mwangana Senakelive atumine Lavashake ayenga kuYelusalema nakutoleka vatu. Ngocho, Lavashake emanyine kuweluka wanganda nakuhanjika nalizu lyakukanguka ngwenyi: ‘Yehova keshi kumikafwako. Shikaho, kanda namwitavila Hezekiya amyongeko. Kakweshi kalunga uze nahase kumikinga mumavoko etuko.’

Hezekiya alombele Yehova mangana amulweze vyakulinga. Kaha Yehova amukumbulwile ngwenyi: ‘Kanda kwivwa woma vyuma nahanjika Lavashakeko. Senakelive keshi kutambula Yelusalemako.’ Kufumaho, Hezekiya atambwile mikanda kufuma kuli Senakelive, yize asonekelemo ngwenyi: ‘Litwamine, Yehova keshi kukuyovolako.’ Ngocho, Hezekiya alombele kuli Yehova ngwenyi: ‘Ove Yehova tuyovole mangana vatu vosena vatachikize ngwavo yove kaha wapwa uKalunga wamuchano.’ Kaha Yehova amulwezele ngwenyi: ‘Mwangana waAsulya keshi kwingila munganda yaYelusalemako. Nangukinga nganda yino.’

Mwangana Senakelive afwelelele ngwenyi nganda yaYelusalema kalinwomu yipwenga yenyi.  Oloze ufuku umwe, Yehova atumine kangelo ayenga kuweluka wanganda kuze kwapwile maswalale. Uze kangelo ajihile maswalale 185,000. Ngocho, maswalale vangolo vamwangana Senakelive vafwile. Echi chalingishile mwangana Senakelive akinduluke kwimbo lyenyi. Chikupu vene, Yehova akingile Hezekiya nanganda yaYelusalema ngana muze ashikile. Kachi nge nayove wapwile muYelusalema, kachi wafwelelele Yehova tahi?