MuAsulya mwapwile nganda yaNyineve yize mwatwaminenga vatu vavilinga vyavipi. Ngocho, Yehova alwezele kapolofweto kenyi Yona ngwenyi ayenga kuNyineve nakuhuhumuna vatu vaseze vilinga vyavo vyavipi. Oloze Yona achinyine nakutalikisa jila yeka. Ngocho, engilile muwato wapwile nakuya kuTalashishe.

Omu wato wapwile nakuya hakalungalwiji, kwejile peho yayinene kaha vaka-kutambukisa wato vevwile chikuma woma. Ngocho, valombele kuli tulunga twavo nakuhulisa ngwavo: ‘Mwomwo ika ukalu kanou unatusolokela?’ Kutwala muze, Yona avalwezele ngwenyi: ‘Yami ngunalingisa ukalu kana usoloke. Mwomwo ngunachinyi kulinga vyuma angulwezanga Yehova. Shikaho, nguzundulenu mungumbile mukalungalwiji, kaha peho kayeshi kuhuhwa chekako.’ Numba tuhu vaze vaka-kutambukisa wato kavasakile kumbila Yona mukalungalwijiko, oloze ikiye avalembelelele vamumbile. Omu vamumbilile jino mukalungalwiji yize peho yechele.

Yona ashinganyekele ngwenyi kwenyi ngu. Omu apwile nakulondomana mumeya alombele kuli Yehova. Ngocho, Yehova atumine ishi wamunene, mangana amine Yona. Kaha uze ishi aminyine Yona chakuzeneka kumujiha. Omu Yona apwile mujimo lyaishi alombele kuli Yehova ngwenyi: ‘Ngunalishiki kukwononoka lika.’ Kaha Yehova akingile Yona mujimo lyauze ishi hamakumbi atatu, kufumaho uze ishi asajilile Yona hatunda.

 Hakuwana nge Yehova ayowele Yona, kutala echi chalumbununa nge katelelele kuya kuNyineveko tahi? Nduma. Yehova alwezele cheka Yona ayenga kuNyineve. Aha jino Yona ononokele. Ayile kunganda kana nakulweza vatu vavilinga vyavipi ngwenyi: ‘Kunasale kaha makumbi 40, Nyineve navayinongesa.’ Ngocho, vaka-Nyineve vevwililile vyuma avalwezele kaha vasezele vilinga vyavo vyavipi. Mwangana waNyineve alwezele vatu jenyi ngwenyi: ‘Sanyikenu Kalunga, pihililenu nakwalumuka. Pamo keshi kutunongesako.’ Omu Yehova amwene ngwenyi vatu kana vanapihilila nakwalumuka kanongesele Nyineveko.

Oloze chuma kana chevwishile Yona kupihya kumuchima. Achishinganyeke, Yehova atalilile Yona chikoki nakumutetela, oloze ikiye katetelele vaka-Nyineveko. Kufumaho, alovokele munganda nakuya nakutwama mumuvule waliyango. Kutwala muze, lize liyango lyazujile kaha Yona apihililile chikuma. Ngocho, Yehova amulwezele ngwenyi: ‘Unevwila chikuma keke eli liyango kuhambakana kwivwila keke vaka-Nyineve. Ami ngunavevwila keke, kaha vanayovoka.’ Mwomwo ika? Mwomwo vatu vapwile vavalemu chikuma kuhambakana liyango.