Mulifuchi lyaSulya mwapwile kanyike wapwevo wakaIsalele uze atwaminenga mulifuchi lyapwile kwakusuku nalifuchi lyenyi. Maswalale javaSulya vamumbachile kufuma kutanga yenyi, mangana apwenga ngamba kuli pwevo lyaKapitau kamaswalale Namane. Ou kanyike alemeselenga Yehova numba tuhu vatu ayoyelenga navo kavalingilenga ngochoko.

Namane apwile nambumba ngocho evwilenga kukola shimbu yosena. Ou kanyike wapwevo wakaIsalele asakile kumukafwa. Alwezele pwevo lyaNamane ngwenyi: ‘Ngwatachikiza mutu umwe uze nahase kuka lunga lyove. Mutu kana shina, kapolofweto kaYehova Elisha uze atwama muIsalele. Nahase kuka lunga lyove.’

Pwevo lyaNamane ayile nakulweza lunga lyenyi vyuma ahanjikile uze kanyike wapwevo. Alisuwile kulinga vyuma vamulwezele ngocho ayile muIsalele kuzuvo yaElisha. Namane afwelelele ngwenyi Elisha mwamutambula muzuvo yenyi nge mutu wamulemu. Oloze Elisha kalovokele nakumutambwokesako, atumine kaha ngamba yenyi mangana  ayenga nakutambwokesa Namane nakumulweza ngwenyi: ‘Yako ukajiminyine muKalwiji Yotau mapapa 7, kaha musongo wove naukuma.’

Echi chevwishile Namane kupihya kumuchima. Kaha ambile ngwenyi: ‘Ami ngwashinganyekanga ngwami, pamo ou Kapolofweto mwasanyika halijina lyaKalunga kenyi nakuhichisa livoko lyenyi hambumba yami mangana anguke. Oloze nangulweze kuya nakusana muli ou kalwiji wamuIsalele. Tuli natulwiji vamwaza muSulya, mwomwo ika nanguhonena kuya nakujiminyina mutulwiji kana?’ Namane afumine kuzuvo yaElisha nakuya oku napihilila.

Vangamba jaNamane vamukafwile mangana ashinganyeke kanawa havyuma vamulwezele kulinga kuli Elisha. Vambile ngwavo: ‘Mwomwo ika muhonena kulinga kala chuma mangana uyoye kumusongo wove? Chuma nakulweze kulinga ou kapolofweto chachashi. Mwomwo ika muhonena kuchilinga?’ Kufumaho, Namane avevwililile. Ngocho ayile kuKalwiji Yotau nakujiminyina mapapa 7. Hanyima yakujiminyina kamakumishilo atomene kumbumba yenyi. Ngocho, akindulukile kuli Elisha nakumusakwilila oku nawahilila chikuma. Kaha ambile ngwenyi: ‘Ngunatachikiza jino ngwami Yehova ikiye Kalunga wamuchano.’ Uno unashinganyeka ngwove uze kanyike wakaIsalele wapwevo evwile ngachilihi omu amwene Namane nakinduluka chakuzeneka musongo wambumba?