Yezevele apwile namwanenyi wapwevo uze apwile namuchima waupi ngana wanaye. Lijina lyenyi apwile ikiye Ataliya. Asombokele kuli mwangana waYuta. Omu afwile lunga lyenyi, mwanenyi walunga aswanyine hawangana. Chaluvinda ou mwanenyi afwile, kaha Ataliya alilingishile yivene kupwa mwangana waYuta. Ngocho, afwililile kunongesa chisaka chawangana chosena, ajihilenga navazukulu jenyi vosena vaze vatelele kupwa vamyangana. Shikaho, vatu vosena vamwivwilenga woma.

Kapilishitu Wakulitulaho Yehoyata napuwenyi Yehosheva vatachikijile ngwavo vyuma alingilenga Ataliya vyapwile vyavipi sulumunu. Ngocho, vahakile kuyoya chavo muponde hakusweka muzukulu lyaAtaliya walijina lyaYehowashe, kaha vamulelelele hatembele.

Omu Yehowashe apwile namyaka yakusemuka 7, Yehoyata asanyikile vakulwane jamaswalale vosena navaLevi nakuvalweza ngwenyi: ‘Lamenu kuvikolo vyakutembele, kanda namwechelela mutu numba umwe engile mukachiko.’ Ngocho, Yehoyata alingishile Yehowashe kupwa mwangana wavaYuta nakumuvwika muchama kumutwe. Kaha vaYuta vatambakanyine ngwavo: ‘Ove mwangana yoyanga lika!’

Mwangana Ataliya evwile vatu vali nakutambakana, kaha alahile nakuya kutembele. Omu ahetele kuze, amwene vanaswanyisa lyehi mwangana wamuhya ngocho alilile chikuma ngwenyi: “Vanangufumbukila! Vanangufumbukila!” Kufumaho, vakulwane jamaswalale vambachile uze mwangana Ataliya wamuchima waupi nakumufumisa halizavu lyavatu nakumujiha. Jino vyuma muka vyasolokele kuvatu vamulifuchi lize ahungumwishile?

Yehoyata avakafwile vashike Yehova lushiko lwakumulemesanga Ikiye kaha. Kufumaho Yehoyata alwezele vatu vapuzule tembele yaMbale nakuchika makombelo osena. Atongwele  vapilishitu navaLevi vazatenga hatembele mangana vatu valemeselengaho cheka Yehova. Atongwele nawa vaka-kulama kuvikolo vyatembele nakuvalweza ngwenyi kavatelele kwingisa mutu napihi mutembeleko. Kufumaho, Yehoyata navakulwane jamaswalale vatwalile Yehowashe kunganda nakumuhaka halitanda lyawangana. Ngocho, vaYuta vosena vevwile kuwaha chikuma. Hakuwana nge vaputukile cheka kulemesa Yehova, ngocho vasezele kulemesa chaMbale chize anehele Ataliya. Uno unamono jino omu kuhamuka chaYehoyata chakafwile vatu vosena tahi?