Omu Yoshiya apwile namyaka yakusemuka 8, vamutongwele kupwa mwangana muYuta. Halwola kanelu, vatu valemeselenga chikuma makombelo nakulinga visava. Kahomu Yoshiya apwile namyaka 16, afwililile kutachikiza jila yakwoloka yakulemeselamo Yehova. Omu alingile nahetesa myaka yakusemuka 20, aputukile kufumisa makombelo namajiko akulumbila osena aze apwile mulifuchi. Omu ahetesele myaka yakusemuka 26, alongesele vyuma mangana tembele yaYehova vaputuke kuyitungulula.

Kapilishitu wakulitulaho Hilikiya awanyine mukanda wakuvunga uze wapwile naJishimbi jaYehova, pamo wapwile mukanda uze vasonekele kuli Mose. Ngocho, Shafwane muka-kusoneka wamwangana anehelele Yoshiya mukanda wakuvunga, kaha aputukile kutangila Jishimbi helu. Omu Yoshiya apwile nakwivwilila, atachikijile jino ngwenyi vatu valikangile kuli Yehova hamyaka yayivulu. Ngocho, alwezele Hilikiya ngwenyi: ‘Yehova napihilila nayetu. Shikaho, yako ukahanjike nenyi, kaha mwatulweza vyuma twatela kulinga.’ Yehova akumbulwile kuhichila muli Huluta ngwenyi: ‘Vatu vamuYuta vananguseze. Nangukavazangamisa oloze keshi mulwola ali nakuyula mwangana Yoshiyako, mwomwo ikiye nalinyisa.’

Omu Mwangana Yoshiya evwile mazu kana, hahaze vene ayile kutembele nakusanyika vatu vosena muYuta. Kaha aputukile kutangila helu Jishimbi jaYehova kumuyachi wosena. Kufumaho, Yoshiya navatu vosena vashikile Yehova ngwavo navamwononokanga namichima yavo yosena.

 Vatu muYuta kavalingile chiwanyino chaPaseka hamyaka yayivuluko. Oloze, omu Yoshiya atangile Jishimbi, atachikijile ngwenyi Paseka vatelelele kuyilinganga mwaka himwaka. Shikaho, alwezele muyachi waYuta ngwenyi: ‘Natulingila Yehova Paseka.’ Ngocho, Yoshiya alizangile kuhana Yehova mawana akulumba nakutongola vaka-kwimba myaso mutembele. Shikaho, vatu jino valingile chiwanyino chaPaseka, kaha nawa, valingile naChiwanyino chaJimbolo Jakuzeneka Chimbalwila chize chambachile makumbi 7. Kakwapwile chiwanyino cheka chahambakanyine echiko, putu vene mumakumbi aSamwele. Yoshiya azangile chikuma Jishimbi jaKalunga. Kutala nayove wazanga kulinangula vyuma asaka Yehova tahi?