Kuli Muka-kutanga:

Hakupwa tuvaka-kulemesa Yehova, twazanga Mazu enyi, Mbimbiliya. Twafwelela chikupu ngwetu Mbimbiliya yahanjika mwakwoloka hamijimbu yakushikulu. Yatwama nawa najindongi jamwenemwene jize jeji kutukafwanga mukuyoya chetu. Yalumbununa nawa zangi atwama nayo Yehova hali vatu. (Samu 119:105; Luka 1:3; WaYowano 1, 4:19) Twafwila kukafwa vatu valinangule muchano waulemu uze watwama muMazu aKalunga. Shikaho tunawahilila hakulovola mukanda wakwamba ngwavo “Vyuma namulinangula kumijimbu yamuMbimbiliya.” Manenu tumilwezeko mukavatu vyuma vili mumukanda kanou.

Uno mukanda vanausonekela chikumanyi vanyike. Oloze unahase nawa kukafwa vakulwane vaze vanakufwila kulinangula vyavivulu muMbimbiliya. Hakuwana nge Mbimbiliya yapwa himukanda wavatu vosena, ngocho yinahase kutukafwa tunganyale hakuhituluka muvishina vyavilemu vili muvilongesa vili mumukanda kanou. Echi nachitulingisa tupwenga vakuwahilila.

Uno mukanda unahanjika hamijimbu yamuMbimbiliya yize yalumbununa omu vaputukile kutenga vyuma navatu, navyuma vyakavangijileho. Mijimbu yamuMbimbiliya vanayilumbununa mujila yayashi kwivwishisa, kaha nawa vanayisoneka kweseka nomu vyuma vyasolokele.

Muno mumukanda muli nawa mivwimbimbi yamwaza yize vanahehwojola kanawa. Mazu namivwimbimbi vilimo vanaviwahisa mujila yize nayitulingisa tushinganyeke hamujimbu tuli nakutanga nakutachikiza omu vevwile vatu tunatange mumujimbu kana.

Uno mukanda nautukafwa tutachikize ovyo Mbimbiliya yapwila mukanda uze walumbununa mijimbu yavatu vaze vononokele, Yehova navaze kavamwononokeleko. Nautukafwa tumone vyuma natulinangula kuvatu kana. (Wavaka-Loma 15:4; Wavaka-Kolinde 1, 10:6) Mukanda kanou uli  navihanda 14. Kumaputukilo achihanda hichihanda vanalumbununa kanawa mijimbu mukavatu yize natulinangula muvilongesa vilimo.

Nge wapwa uchisemi, kaha watela kutangila hamwe namwanove chilongesa nakushimutwila hamivwimbimbi yili muchilongesa kana. Kufumaho, tangenu mujimbu kana muMbimbiliya haze hanapendamina chilongesa kana. Kafwa mwanove atachikize kanawa omu mujimbu mwatanga muMbimbiliya unalitombola nachilongesa munakulinangula mumukanda. Omu mukiko chatela kupwa hakukafwa navakulwane vatachikize kanawa mijimbu yatwama muMbimbiliya.

Twafwelela ngwetu uno mukanda naukafwa vatu vosena vamichima yamwaza, vanyike navakulwane valinangule Mazu aKalunga nakuwazachisa mukuyoya chavo. Echi nachikafwa vatu kana valemese Yehova nakupwa vatu vamutanga yenyi.