Tengi yetu apwa wamangana kuhambakana yetu. Hakupwa Setu wazangi, eji kutuzakamanga. Kaha nawa katutengele mangana tupwenga vakulimanyina chakuzeneka kupendamina hali ikiyeko. (Yelemiya 10:23) Ngana, mwamwana wamundende uze vatela kutwaminyina kuli visemi jenyi, nayetu nawa vatela kututwaminyina kuli Kalunga. (Isaya 48:17, 18) Jindongi jamuMbimbiliya jize jeji kututwaminyinanga japwa chikupu hiwana wakufuma kuli Kalunga.​—Tangenu WaChimoteu 2, 3:16.

Jishimbi jaYehova najindongi jenyi jatunangula jila yamwaza yakuyoyelamo oholyapwa nakusolola nawa vyuma twatela kulinga numba tukatambule fweto yahaya myaka yosena kulutwe. Chapwa chakutamo kukavangiza jindongi jaKalunga mwomwo ikiye atutengele.​—Tangenu Samu 19:7, 11; Kusoloka 4:11.

Jindongi jamuMbimbiliya japwa muchano waulemu. Oloze jishimbi jazata kaha muvyuma vimwe. (Lushimbi lwamuchivali 22:8) Twatela kushinganyeka numba tumone omu jindongi jazata kukala vyuma. (Vishimo 2:10-12) Chakutalilaho, Mbimbiliya yanangula ngwayo kuyoya chapwa hiwana wakufuma kuli Kalunga. Lundongi kana lunahase kutukafwa kumilimo, kushikola chipwe kutambuka haungeji. Lunahase kutukafwa mangana tuhone kulihaka etu vavene muponde.​—Tangenu Vilinga 17:28.

Yesu ahanjikile hajindongi jivali jize japwa jajilemu chikuma. Lundongi lwatete lwasolola nge hakutenga vatu, Kalunga ajinyine vakamutachikize, nakumuzanga nakumuzachila nakashishi. Twatela kukavangiza elu lundongi kana mukala vyuma natulinga. (Vishimo 3:6) Vaze veji kulukavangizanga  veji kutunganga usepa wakukola naKalunga, nakupwa nakuwahilila chamuchano, nakukayoya haya myaka yosena.​—Tangenu Mateu 22:36-38.

Lundongi lwamuchivali lweji kutukafwanga tutwame mukuunda navakwetu. (Wavaka-Kolinde 1, 13:4-7) Twatela kulondezeza Kalunga mujila eji kulaminangamo vatu numba tukavangize lundongi kanelu.​—Tangenu Mateu 7:12; 22:39, 40.

Jindongi jamuMbimbiliya jeji kunangulanga jitanga jipwenga jakulinunga muzangi. (Wavaka-Kolose 3:12-14) Mazu aKalunga akwechi lundongi lukwavo luze lweji kukinganga jitanga, lwakwamba ngwavo ulo watela kupwa wakwilila.​—Tangenu Kuputuka 2:24.

Kukavangiza vyuma yanangula Mbimbiliya chinahase kutukinga kuvyuma vyakumujimba nakukinga nawa vishinganyeka vyetu. Chakutalilaho, vaka-kwingisa milimo vasaka vatu vaze veji kukavangizanga jindongi jamuMbimbiliya jakashishi nakuzata nangolo. (Vishimo 10:4, 26; WavaHepeleu 13:18) Mazu aKalunga atunangula nawa tusuulukenga navyuma vyavilemu tuli navyo nakuhaka usoko wetu naKalunga kulutwe kuhambakana luheto.​—Tangenu Mateu 6:24, 25, 33; WaChimoteu 1, 6:8-10.

Kukavangiza jindongi jamuMbimbiliya chinahase kutukinga kumisongo. (Vishimo 14:30; 22:24, 25) Chakutalilaho, kukavangiza jishimbi jaKalunga jize jakanyisa kupenda cheji kutukinga kumisongo yayinene nakujiponde. (Vishimo 23:20) Yehova etavisa kunwa wala wamweseke, oloze akanyisa kupenda. (Samu 104:15; Wavaka-Kolinde 1, 6:10) Jindongi jaKalunga jeji kutunganyalisanga hakutunangula tulihende kuvilinga nakuvishinganyeka vyavipi. (Samu 119:97-100) Oloze vaka-Kulishitu vamuchano kaveshi kukavangiza jindongi jaKalunga mwomwo yakusaka kaha valinganyalise vaveneko. Veji kulinganga ngocho mangana vavumbike Yehova.​—Tangenu Mateu 5:14-16.