CHILONGESA 10
Munahase Kutachikiza Ngachilihi Kwitava chaMuchano?
1. Uno kwatwama kwitava chimwe kaha chamuchano tahi?
“Zangamenunga navapolofweto vamakuli.”—MATEU 7:15.
Yesu anangwile vaka-kumukavangiza ngwenyi kwatwama kwitava chimwe kaha chamuchano. Kwitava kana chapwa nge hijila yakuya kukuyoya chahaya myaka yosena. Yesu ambile ngwenyi: “Vali nakuyiwana vanapu vavandende kaha.” (Mateu 7:14) Kalunga eji kwitavilanga kwitava chimwe kaha chize chapendamina haMazu enyi amuchano. Vaka-kulemesa Kalunga vamuchano vakwechi lufwelelo lumwe kaha.—Tangenu Yowano 4:23, 24; 14:6; Wavaka-Efwesu 4:4, 5.
Talenu vindiyo yakwamba ngwavo Uno Kalunga Etavila Kwitava Chosena Tahi?)
2. Yesu ahanjikile vyuma muka kutalisa kuli vaka-Kulishitu vamakuli?
“Veji kuhanjikanga hatoma kumeso avatu ngwavo vamutachikiza Kalunga, oloze veji kumusaulanga navilinga vyavo.”—WACHITUSE 1:16.
Yesu ambile ngwenyi nakukapwa vapolofweto vamakuli vaze navakajilulula kwitava chavaka-Kulishitu. Tupolofweto vamakuli veji kusolokanga nge vaka-kulemesa Kalunga vamuchano. Jichachi javo vajivuluka kupwa javaka-Kulishitu. Oloze munahase kuvatachikijila kuvilinga vyavo. Mujila muka? Kwitava chamuchano chikiko kaha cheji kupwanga navaka-Kulishitu vamuchano vaze vakwechi vilinga vyamwaza.—Tangenu Mateu 7:13-23.
3. Uno munahase kutachikiza ngachilihi vaka-kulemesa Kalunga vamuchano?
Achitalenu hatutachikijilo tuno tutanu:
-
Vaka-kulemesa Kalunga vamuchano vavumbika Mbimbiliya kupwa Mazu aKalunga. Veji kufwilanga kuyoya kweseka najindongi jatwamamo. Ngocho, kwitava chamuchano chalihandununa nakwitava chize chapendamina hakunangula vishinganyeka vyavatu. (Mateu 15:7-9) Vaka-kulemesa Kalunga vamuchano veji kulinganga vyuma veji kunangulanga.—Tangenu Yowano 17:17; WaChimoteu 2, 3:16, 17.
-
Vaka-kukavangiza Yesu vamuchano vavumbika lijina lyaKalunga, Yehova. Yesu avumbikile lijina lyaKalunga hakunangula vatu valitachikize. Avakafwile vatachikize Kalunga nakuvanangula valombenga ngwavo lijina lyaKalunga lipwenga lyajila. (Mateu 6:9) Kwitava muka cheji kutandakanyisanga lijina lyaKalunga okwo mwatwama?—Tangenu Yowano 17:26; Wavaka-Loma 10:13, 14.
-
Vaka-Kulishitu vamuchano veji kunangulanga vyaWangana waKalunga. Kalunga atumine Yesu ambulule mujimbu wamwaza waWangana. Wangana waKalunga ukiko naukakumisa ukalu wavatu wosena. Yesu atwalileho lika kuhanjika vyaWangana swi nakulikumbi afwile. (Luka 4:43; 8:1; 23:42, 43) Ambile ngwenyi vaka-kumukavangiza navakiko navakambululanga ou mujimbu. Nge mutu umwe mweza kuli yenu nakumyambulila mujimbu waWangana waKalunga, kaha mutu kana atela kupwa wamukwitava muka?—Tangenu Mateu 24:14.
-
Vaka-kumukavangiza Yesu kaveshi vamukaye kano kakuhukako. Munahase kuvatachikiza mwomwo kavazana muvihande vyamapolitiki namuvikokojola vyavaka-kayeko. (Yowano 17:16; 18:36) Kaha nawa kaveshi kulondezeza vilinga vyavipi vyamuno mukayeko.—Tangenu WaYakova 4:4.
-
Vaka-Kulishitu vamuchano valizanga umwe namukwavo. Mazu aKalunga avanangula vavumbikenga vatu vakufuma kuvisemwa vyakulisezaseza. Numba tuhu, vaka-kwitava chamakuli vanakundwizanga jijita jamafuchi, oloze vaka-kulemesa Kalunga vamuchano kaveshi kulinga ngochoko. (Mika 4:1-3) Vaka-Kulishitu vamuchano veji kuzachisanga lwola lwavo naluheto lwavo vakafwe vakwavo nakuvakolezeza.—Tangenu Yowano 13:34, 35; WaYowano 1, 4:20.
4. Kutala munatachikiza jino kwitava chamuchano tahi?
Kwitava muka cheji kunangulanga vyuma vyosena kweseka nomu ahanjika Mazu aKalunga, nakuvumbika lijina lyaKalunga, nakuvilika nge Wangana waKalunga ukiko kaha naukakumisa ukalu wavatu? Liuka muka lyeji kusololanga zangi nakulihenda kujita? Enu munashinganyeka ngwenu ngachilihi?—Tangenu WaYowano 1, 3:10-12.
