Kalunga alingishile vana vakakuluka yetu Apalahama kupwa himuyachi nakuvahana jishimbi. Avulukile muyachi kana ngwenyi “Isalele” nakuuhana kwitava chamuchano namazu enyi. (Samu 147:19, 20) Ngocho, vatu vakumiyachi yosena vatelele kunganyala kumuyachi kanou waIsalele.​—Tangenu Kuputuka 22:18.

Kalunga asakwile vaIsalele kupwa vinjiho jenyi. Mijimbu yavo yakushikulu yasolola omu vatu vanganyalile hakwononoka jishimbi jaKalunga. (Lushimbi lwamuchivali 4:6) Ngocho, kuhichila muli vaIsalele, vatu veka vatachikijile jino Kalunga wamuchano.​—Tangenu Isaya 43:10, 12.

Kutwala muze, vaIsalele vajimbalishile uselewa wavo kuli Kalunga kaha Yehova ashishishile muyachi kana nachikungulwilo chavaka-Kulishitu. (Mateu 21:43; 23:37, 38) Muchishishisa chavaIsalele, vaka-Kulishitu vamuchano vakiko jino vapwa Vinjiho jaYehova.​—Tangenu Vilinga 15:14, 17.

Yesu alongesele vaka-kumukavangiza vambulule mujimbu wamwaza nakutunga tumbaji kumafuchi osena. (Mateu 10:7, 11; 24:14; 28:19, 20) Ou mulimo kana unahete jino hatwitwi mumakumbi ano akukuminyina. Yehova nakungulula vatu vavavulu kufuma kumafuchi osena nakuvengisa mukwitava chamuchano, chuma chize kanda chisolokengaho lyehi. (Kusoloka 7:9, 10) Vaka-Kulishitu vamuchano vavalongesa valikolezeze nakulikafwa umwe namukwavo. Mukaye kosena veji kulivwisanga kuwaha kulilongesa jindongi jojimwe jamuMbimbiliya hakukunguluka chavo.​—Tangenu WavaHepeleu 10:24, 25.

Muji 1870, lizavu lyalindende lyaVaka-Kulinangula Mbimbiliya lyaputukile kuwana muchano wamuMbimbiliya uze wajimbalile kunyima. Vejivile ngwavo Yesu alongesele vaka-Kulishitu vayenga nakwambulula, ngocho vaputukile mulimo wakwambulula Wangana mukaye kosena. Kuheta mumwaka wa 1931 valivulukilenga jino ngwavo vakiko Vinjiho jaYehova.​—Tangenu Vilinga 1:8; 2:1, 4; 5:42.

Mulikulukaji lyamyaka lyakulivanga vikungulwilo vyavaka-Kulishitu mumafuchi amavulu vyanganyalile kulizavu lyakutwaminyina lize lyamwenenga Yesu kupwa ikiye mutwe wachikungulwilo. (Vilinga 16:4, 5) Namakumbi ano nawa Vinjiho jaYehova mukaye kosena veji kunganyalanga kuLizavu Lyakutwaminyina lyavakulwane vakulindunuka. Eli Lizavu Lyakutwaminyina lili nakutwaminyina jiofesi jamutango jaVinjiho jaYehova jize jeji kwalumunanga mikanda, nakupulita, nakuhana mikanda yahanjika haMbimbiliya mumalimi akuhambakana ha 600. Ngocho, Lizavu Lyakutwaminyina lyeji kukolezeza Vinjiho kuzachisa Visoneka nakuvahana jindongi muvikungulwilo vyakuhambakana ha 100,000 mukaye kosena. Muchikungulwilo hichikungulwilo, mwatwama malunga vakulindunuka vaze vapwa vakulwane chipwe ngwetu tulama. Malunga kana veji kuzakamanga utanga waKalunga muzangi.​—Tangenu WaPetulu 1, 5:2, 3.

Vinjiho jaYehova vavalongesa vambulule mujimbu wamwaza nakutunga tumbaji. Ngana mwavaposetolo, tweji kuyanga nakwambulila kuzuvo hizuvo. (Vilinga 20:20) Tweji kulisuulanga nakulinangula Mbimbiliya navatu vaze vazanga muchano. Oloze Vinjiho jaYehova kavapwa kaha liukako. Twapwa tanga yimwe yize yikwechi Chisemi wazangi. Tweji kulizakamanga umwe namukwavo muwanawakwetu. (Wavaka-Tesolonyika 2, 1:3) Vatu jaKalunga vapwa hitanga yimwe yakuwahilila hamavu mwomwo vavalongesa vevwise Kalunga kuwaha nakukafwa vakwavo.​—Tangenu Samu 33:12; Vilinga 20:35.