CHILONGESA 6
Lutalililo Muka Twatwama Nalwo Hali Vaze Vafwa?
1. Tukwechi mujimbu muka wamwaza wakupandama kuli vaze vafwa?
Omu Yesu ahetele kuMbetane kwakamwihi naYelusalema, awanyine munahichi lyehi makumbi awana kufuma haze afwililile sepa lyenyi Lazalu. Yesu ayile kuchimbumbe navandumbwaLazalu vaMalita naMaliya. Nakushimbula chiku, lizavu lyavatu lyavakavile. Achishinganyekenu jino ocho kuwaha kana vevwile vaMalita naMaliya omu Yesu asangwile ndumbwavo Lazalu.—Tangenu Yowano 11:21-24, 38-44.
Malita autachikijile lyehi mujimbu wamwaza wakupandama kuvafu. Atachikijile ngwenyi Yehova mwakasangula vafu vakayoye cheka hano hamavu.—Tangenu Yopa 14:14, 15.
2. Vyuma muka vyeji kusolokanga kuvafu?
Kalunga alwezele Alama ngwenyi: “Unapu ulukungu, kaha naukakinduluka cheka kulukungu.”—KUPUTUKA 3:19.
Etu vatu vatutenga kufuma kulukungu. (Kuputuka 2:7; 3:19) Katwapwa tuvatu vakushipilitu vaze vavwala mijimba yanyamako. Twapwa tuvatu vanyama namanyinga, ngocho katwatwama navyuma vimwe vize vyeji kutwalililanga nakuyoya hanyima yakufwako. Nge tunafu, kaha nawongo navishinganyeka vyetu nawa vinafu. Vafu kavatachikiza chuma numba chimweko, ngocho Lazalu kahanjikile vyuma vimwe vyakusolola omwo evwile halwola luze afwileko.—Tangenu Samu 146:4; Muka-kwambulula 9:5, 6, 10.
Uno Kalunga eji kuyekelesanga vatu mukakahya hanyima yakufwa tahi? Hakuwana nge Mbimbiliya yasolola nge vafu kavatachikiza chuma numba chimweko, ngocho kunangula chakakahya kahelo chapwa chamakuli kaha nawa cheji kuvangijikilanga Kalunga vyuma vize kalingako. Vishinganyeka vyakuyekelesa vatu mukakahya vyeji kumwivwisanga kupihya.—Tangenu Yelemiya 7:31.
Talenu vindiyo yakwamba ngwavo Vyuma Muka Vyeji Kusolokanga kuVafu?
3. Uno vafu vanahase kuhanjikisa vatu vavatonyi tahi?
Vafu kaveshi kuhasa kuhanjika chipwe kwivwako. (Samu 115:17) Oloze kwatwama vangelo vakuhuka vaze vanahase kuhanjika kuvatu nakulyonga kupwa vatu vakufwa. (WaPetulu 2, 2:4) Yehova atukanyisa kwihula vafu.—Tangenu Lushimbi lwamuchivali 18:10, 11.
4. Veya navakasanguka?
Vafu vavavulu vaze vali muvimbumbe navakavasangula nakuyoya cheka hano hamavu. Navamwe vaze kavatachikijile Kalungako vaze valingilenga vyuma vyavipi navakavasangula.—Tangenu Luka 23:43; Vilinga 24:15.
Vaze navakasangula navakalinangula muchano waKalunga nakwononoka Yesu mangana vakasolole lufwelelo lwavo. (Kusoloka 20:11-13) Vaze navakasanguka nakulinga vyuma vyamwaza navakalivwisa kuwaha kuyoya haya myaka yosena hano hamavu.—Tangenu Yowano 5:28, 29.
5. Uno kusanguka cheji kutulwezanga vyuma muka hali Yehova?
Kalunga atuhana lutalililo lwakusanguka hakutuma Mwanenyi kwiza nakutufwila. Ngocho kusanguka, chasolola zangi yaYehova nalikoji lyenyi lyalinene. Uno iya namukasaka kukamona omu navakasangula vafu?—Tangenu Yowano 3:16; Wavaka-Loma 6:23.
