Mukwitava chosena mwatwama vatu vamwe vamichima yamwaza. Chapwa chamwaza kwijiva ngwetu Kalunga eji kumonanga vatu kana nakuvazakama. Oloze chaluvinda vatu vamwe vali nakulinga vyuma vyavipi kuhichila mukwitava. (Wavaka-Kolinde 2, 4:3, 4; 11:13-15) Kweseka navaka-kwazana mijimbu, vaka-kwitava vamwe vali nakwazana muvilinga vyaukenya, nakulalisa miyachi yimwe, nakulwa jijita nakupika vana vavandende. Ocho kupihya kana vali nakwivwanga vatu vaze vafwelela muli Kalunga!​—Tangenu Mateu 24:3-5, 11, 12.

Vatu vamukwitava chamuchano veji kwalisanga Kalunga, oloze vamukwitava chamakuli veji kumwivwisanga kupihya. Kwitava chamakuli cheji kunangulanga vishinganyeka vize kavyatwama muMbimbiliyako, nakunangula vyuma vyamakuli vyakuvuluka Kalunga navafu. Oloze Yehova asaka vatu vatachikize muchano wakuvuluka ikiye.​—Tangenu Ezekele 18:4; WaChimoteu 1, 2:3-5.

Eyo, Kalunga kaveshi kumwonga kuli vaka-kwitava vaze valivuluka ngwavo vamuzanga okunyi vazanga kaye kano kaSatana. (WaYakova 4:4) Mazu aKalunga avuluka kwitava chamakuli chosena kupwa “Mbavilone Yayinene.” Mbavilone yapwile nganda yakushikulu kuze kwaputukilile kwitava chamakuli hanyima yaLivaji lyaNowa. Kalinwomu Kalunga afumiseko kwitava chosena chize chili nakuhungumwisa vatu nakuvashinyinyika.​—Tangenu Kusoloka 17:1, 2, 5, 16, 17; 18:8.

Kuli nawa mujimbu weka wamwaza. Yehova kavulyamine vatu vamichima yamwaza vaze vali mukwitava chamakuli mukaye kosenako. Ali nakukokweza vatu kana hakuvanangula muchano.​—Tangenu Mika 4:2, 5.

Yehova azakama vatu vaze vazanga muchano navyuma vyamwaza. Avalweza vaseze kwitava chamakuli. Vatu vaze vazanga Kalunga vali nakwalumuka nakulinga vyuma asaka.​—Tangenu Kusoloka 18:4.

Mulikulukaji lyamyaka lyakulivanga, omu vatu vamichima yamwaza vevwile mujimbu wamwaza kuli vaposetolo, vawahililile. Valinangwile kuli Yehova jila yamwaza yakuyoyelamo, kaha vawahililile nakupwa nalutalililo. Vatu kana vatuhana chakutalilaho chamwaza makumbi ano mwomwo vakwile kumujimbu wamwaza nakuhaka Yehova kulutwe mukuyoya chavo.​—Tangenu Wavaka-Tesolonyika 1, 1:8, 9; 2:13.

Yehova eji kusambililanga vatu vaze veji kusezanga kwitava chamakuli nakwiza mutanga yenyi nakumulemesa. Nge namwitavila Yehova nakwiza kuli ikiye, kaha mwapwa sepa lyenu. Ngocho namupwa jino navakwenu vaka-kulemesa Yehova mutanga yayihya yazangi, nakukapwa nakuyoya chahaya myaka yosena.​—Tangenu Mako 10:29, 30; Wavaka-Kolinde 2, 6:17, 18.

Mujimbu wakusopesa kwitava chamakuli wapwa himujimbu wamwaza. Omu navakasopesa kwitava chamakuli, vatu vanashinyinyikanga navakapwa jino vakulihehwa. Kwitava chamakuli kacheshi nawa kukahungumwisa vatu nakuvahandununako. Vatu vosena navakalinunga hamwe nakulemesa Kalunga umwe kaha wamuchano.​—Tangenu Kusoloka 18:20, 21; 21:3, 4.