CHILONGESA 3
Uno Mujimbu Wamwaza Wafuma Kuli Kalunga Tahi?
1. Uno Mwenya-Mbimbiliya Iya?
Mujimbu wamwaza wakwamba ngwavo vatu navakayoyanga haya myaka yosena hano hamavu vausoneka muMbimbiliya. (Samu 37:29) MuMbimbiliya mwatwama mikanda yayindende 66. Kalunga azachishile malunga vakushishika kafwe 40 vasoneke mikanda kana. Mikanda yakuputukilako yitanu vayisonekele kuli Mose kafwe myaka 3,500 yinahichi kunyima. Mukanda wamakumishilo vausonekele kuli kaposetolo Yowano kafwe myaka 1,900 yinahichi kunyima. Uno vishinganyeka vyeya vasonekele vaze malunga? Kalunga azachishile shipilitu yajila hakulweza vaze malunga vyuma vasonekele muMbimbiliya. (Samwele 2, 23:2) Vasonekele vishinganyeka vyaKalunga, keshi vyavoko. Ngocho, Yehova ikiye mwenya-Mbimbiliya.—Tangenu WaChimoteu 2, 3:16; WaPetulu 2, 1:20, 21.
Talenu vindiyo yakwamba ngwavo Uno Mwenya-Mbimbiliya Iya?
2. Uno tunahase kufwelela ngachilihi ngwetu Mbimbiliya yapwa yamuchano?
Twatachikiza ngwetu Mbimbiliya yafuma kuli Kalunga mwomwo yahanjika mwakwoloka kupandama kuvyuma vyakulutwe. Mutu naumwe wauchi nahase kulinga ngocho. (Yoshuwa 23:14) Kalunga Wangolo Josena ikiye kaha nahase kumona vyuma vinahase kusoloka kuli vatu kulutwe.—Tangenu Isaya 42:9; 46:10.
Mukanda wakufuma kuli Kalunga watela kupwa wakulipwila, kaha omu mukiko yapwa Mbimbiliya. Mbimbiliya vali nakuyipangila chikuma kuvatu mumalimi amavulu. Numba tuhu wapwa himukanda wakushikulu, oloze vyuma wahanjika vyalitombola navyuma vawana vaka-sayasi. Kaha nawa vaze malunga 40 vasonekele Mbimbiliya kavalimbalaka umwe namukwavoko. Vyuma yahanjika Mbimbiliya hazangi vyafuma kuli Kalunga wamuchano wazangi. Mbimbiliya yikwechi nawa ngolo jakwalumuna kuyoya chavatu chipwenga chamwaza. Evi vikiko vyakunyula vatu vavavulu vamone Mbimbiliya kupwa Mazu aKalunga.—Tangenu Wavaka-Tesolonyika 1, 2:13.
Talenu vindiyo yakwamba ngwavo Uno Tunahase Kufwelela Ngachilihi Ngwetu Mbimbiliya Yapwa yaMuchano?
3. Uno Mbimbiliya yahanjika havyuma muka?
Chihande chachinene yahanjika Mbimbiliya shina chamujimbu wamwaza wakuvuluka vyuma vyamwaza vize ajina Kalunga kulingila vatu. Visoneka vyalumbununa omu mutu ajimbalishile kuyoya chamwaza chamupalachise hano hamavu nomu navakakindulwisa cheka palachise.—Tangenu Kusoloka 21:4, 5.
MuMazu aKalunga mwatwama nawa jishimbi, najindongi namazu akuhuhumuna. Kaha nawa muMbimbiliya mwatwama mijimbu yahanjika omu Kalunga nalaminangamo vatu. Mijimbu kana yasolola kanawa vilinga vyaKalunga. Ngocho, Mbimbiliya yinahase kumikafwa mumutachikize Kalunga. Yalumbununa navyuma mwatela kulinga mangana mupwenga mumasepa jenyi.—Tangenu Samu 19:7, 11; WaYakova 2:23; 4:8.
4. Munahase kwivwishisa ngachilihi Mbimbiliya?
Eyi mbuloshuwa nayimikafwa mwivwishise Mbimbiliya kuzachisa jila yize azachishile Yesu. Yesu enyikililenga kuMbimbiliya nakukafwa vatu “vamone kanawa mwalumbunukilile Visoneka.”—Tangenu Luka 24:27, 45.
Kakweshi vyuma vyeka vinahase kumisuulwisa ngana mwamujimbu wamwaza wakufuma kuli Kalungako. Oloze vatu vamwe vatwama nakanengauli kumujimbu kana, kaha veka veji kupihililanga hakuwivwa. Kamwatela kulizuzukila nawomako. Lutalililo lwenu lwakuyoya haya myaka yosena lwapendamina hakutachikiza Kalunga.—Tangenu Yowano 17:3.
