CHILONGESA 5
Vyuma Muka Ajinyine Kalunga Hakutenga Mavu?
1. Mwomwo ika Kalunga atengele mavu?
Yehova ahanyine mavu kuli malunga namapwevo. Hano hamavu hakiko hembo lyetu. Ngocho, valunga napwevo vakulivanga vaAlama naEve kavavatengele mangana vakazalise mwiluko, mwomwo Kalunga atengele lyehi vangelo mangana vayoyelenga mwilu. (Yopa 38:4, 7) Oloze Kalunga atengele mutu watete nakumuhaka mupalachise yamwaza yize vavuluka ngwavo milemba yaEtene. (Kuputuka 2:15-17) Yehova amuhanyine ikiye navana venyi lutalililo lwakukalivwisanga lika kuwaha kuyoya chakuzeneka kukuma hano hamavu.—Tangenu Samu 37:29; 115:16.
Hakavanga, milemba yaEtene kaha yikiko yapwile palachise. Ngocho valunga napwevo vakulivanga vatelelele kuzalisa hamavu navana vavo. Kutwala muze kachi vavulile hamavu hosena nakulingisaho kupwa palachise. (Kuputuka 1:28) Mavu kaveshi kukawenyekako. Nahapwanga lika vatu.—Tangenu Samu 104:5.
Talenu vindiyo yakwamba ngwavo Mwomwo Ika Kalunga Atengele Mavu?
2. Mwomwo ika hano hamavu hanahonena kupwa palachise?
Alama naEve valikangile kuli Yehova, ngocho avahangile muze mumilemba. Kufuma vene haze, palachise kayapwileko cheka, kaha kakweshi mutu ahasa kuyikindulwisako. Mbimbiliya yamba ngwayo: “Lifuchi lyosena nalihane kuli vaka-kuhuka.”—Yopa 9:24.—Tangenu Kuputuka 3:23, 24.
Uno Yehova avulyama vyuma ajinyine kulingila vatu tahi? Nduma. Kalunga apwa hiKalunga wangolo josena. Ngocho keshi kukahona kutesamo vyuma ajinako. (Isaya 45:18) Mwakalingisa cheka vatu vakayoye ngana muze ajinyine hakavanga.—Tangenu Samu 37:11, 34.
3. Uno Palachise navakayikindulwisa ngachilihi?
Mavu nawakapwa cheka palachise omu Yesu mwakayula kupwa Mwangana waWangana waKalunga. Mujita vavuluka ngwavo Alamangetone, Yesu mwakatetekela vangelo jaKalunga vakanongese vosena vaze veji kufumbukilanga Kalunga. Kufumaho, Yesu mwakakasa Satana hamyaka 1,000. Vatu jaKalunga navakayovoka mwomwo Yesu mwakavatetekela nakuvakinga. Navakalivwisa kuwaha kuyoya chahaya myaka yosena muPalachise hano hamavu.—Tangenu Kusoloka 20:1-3; 21:3, 4.
4. Uno kuyanda nachikakuma lwola muka?
Uno lwola muka Kalunga mwakafumisa upi hano hamavu? Yesu ahanyine “chinjikizo” chakusolola nge kukuma chili hakamwihi. Vyuma vili nakusoloka makumbi ano mukaye vili nakwivwisa vatu woma, nakusolola chikupu nge tuli jino nakuyoyela muchikukulwishi “chakatwamino kamyaka yino.”—Tangenu Mateu 24:3, 7-14, 21, 22.
Yesu mwakakumisa kuyanda chosena hamavu hamyaka 1,000 yize mwakayulila mwilu. (Isaya 9:6, 7; 11:9) Yesu keshi kukazata kaha mwaMwanganako, oloze mwakapwa nawa Kapilishitu Wakulitulaho uze mwakajimbangana shili javaze vazanga Kalunga. Ngocho Kalunga mwakazachisa Yesu akafumiseko misongo, ushinakaji nakufwa.—Tangenu Isaya 25:8; 33:24.
5. Veya navakatwamanga muPalachise eyi yili nakwiza kulutwe?
HaZuvo yaWangana hakiko munahase kuwana vatu vazanga Kalunga nakusaka kulinangula mwakumwivwishila kuwaha
Vatu veji kwononokanga Kalunga vakiko navakatwamanga muPalachise. (WaYowano 1, 2:17) Yesu atumine vaka-kumukavangiza vatondetonde vatu nakuvanangula vyuma vatela kulinga numba Kalunga avetavile. Makumbi ano, Yehova ali nakunangula vatu vavavulu mangana vakayoye muPalachise hano hamavu. (Zefwanyiya 2:3) Vatu veji kuyanga kujiZuvo jaWangana jaVinjiho jaYehova nakulinangula mwakupwila malunga, namapwevo, navisemi vamwenemwene. Visemi navana vavo veji kulemeselanga hamwe Kalunga nakulinangula mwakunganyalila kumujimbu wamwaza.—Tangenu Mika 4:1-4.
