CHILONGESA 8
Mwomwo Ika Kalunga Etavishila Upi naKuyanda?
1. Uno upi waputukile ngachilihi?
Kalunga nechelela vatu valiyule hatando yayisuku mangana vatachikize ngwavo kaveshi kuhasa kukumisa ukalu veji kumonangako
Upi waputukile hamavu omu Satana ahanjikile makuli atete. Hakavanga Satana apwile kangelo wakukupuka, oloze “kazamine mumuchanoko.” (Yowano 8:44) Kaha alikangile nakufwila vatu vamulemese ikiye mukutela kulemesa Kalunga. Satana ongele pwevo watete Eve mangana amwononoke ikiye mukutela kwononoka Kalunga. Alama akavangijile Eve nakulikanga kuli Kalunga. Vyuma asakwile kulinga Alama vyanehele kuyanda nakufwa.—Tangenu Kuputuka 3:1-6, 17-19.
Omu Satana ongele Eve alikange kuli Kalunga, apwile nakufumbukila wata waKalunga chipwe ngwetu chihela atwama nacho Kalunga chakupwa Muka-kulitulaho. Vatu vavavulu vali nakukavangiza Satana nakukana kuvayula kuli Kalunga. Ngocho Satana napu jino “muka-kuyula kano kaye.”—Tangenu Yowano 14:30; WaYowano 1, 5:19.
2. Uno Kalunga katengele vyuma kanawako tahi?
Milimo yaKalunga yosena yapwa yakwoloka. Vatu navangelo vaze atengele Kalunga vapwile nauhashi wakumwononoka nakukavangiza vyuma vyosena avalwezelenga. (Lushimbi lwamuchivali 32:5) Kalunga atutengele nalisesa lyakulisakwila vyuma vyakwoloka nevi vyakuhenga. Lisesa kana likiko lyeji kutulingisanga tusolole zangi yetu kuli Kalunga.—Tangenu WaYakova 1:13-15; WaYowano 1, 5:3.
3. Mwomwo ika Kalunga netavishila kuyanda?
Kufuma vene hakulikanga chapwileko muEtene, Yehova nechelela vatu vafumbukile wata wenyi. Mwomwo ika? Mwomwo ali nakusaka tumone ngwetu katweshi kuhasa kuliyula etu vavene chakuzeneka ikiyeko. (Muka-kwambulula 7:29; 8:9) Myaka 6,000 yinahichi kunyima, yinasolola hatoma nge vatu vanahono kuliyula vavene. Vaka-kuyula vanahono kufumisako jijita, nauhwanga, nachiyulo chakuhenga, namisongo.—Tangenu Yelemiya 10:23; Wavaka-Loma 9:17.
Oloze vaze vetavila Kalunga kupwa muka-kuvayula veji kunganyalanga. (Isaya 48:17, 18) Kalinwomu Yehova anongese jifulumende javatu josena. Oloze vaze navasakula kuvayula kuli Kalunga vakiko kaha navakaswana mavu.—Isaya 11:9.—Tangenu Ndanyele 2:44.
Talenu vindiyo yakwamba ngwavo Mwomwo Ika Kalunga Netavishila Kuyanda?
4. Muchima waKalunga wakutalilila vatu chikoki watuhana lwola lwakulinga vyuma muka?
Satana ambile ngwenyi vatu kaveshi kuzachila Yehova mwomwo yakumuzanga kahako. Uno muli nakusaka kumupayisa tahi? Kanda kuhuhwasanako. Munahase chikupu kulinga ngocho. Muchima waKalunga wakutalilila vatu chikoki watuhana lwola lwakusolola nge twasaka kutuyula kuli Kalunga nyi kuvatu. Jila tweji kuyoyelangamo yeji kusololanga owo twasaka atuyule.—Tangenu Yopa 1:8-12; Vishimo 27:11.
5. Uno tunahase kusakula ngachilihi Kalunga kupwa Muka-kutuyula?
Vyuma natusakula kulinga vyeji kusololanga nge twasaka Kalunga apwenga Muka-kutuyula nyi chiku
Tunahase kusakula Kalunga kupwa Muka-kutuyula hakutondanga nakwazana mukwitava chamuchano chize chazama haMazu enyi Mbimbiliya. (Yowano 4:23) Twatela kukana Satana hakuhona kulingisa muvihande vyalifuchi nachiyulo namujijita ngana muze alingile Yesu.—Tangenu Yowano 17:14.
Satana eji kuzachisanga ngolo jenyi mangana akundwize vilinga vyavipi. Nge natukana vilinga kanevi vyavipi, masepa jetu vamwe navausoko wetu vamwe vanahase kututoleka chipwe kutwimanyina nakole. (WaPetulu 1, 4:3, 4) Shikaho twatela kulisakwila etu vavene. Kutala natulikatanga navatu vaze vazanga Kalunga nakukavangiza jishimbi jenyi jakwoloka tahi? Nge natulinga ngocho, kaha natusolola hatoma ngwetu Satana alyongele hakwamba ngwenyi katweshi kuhasa kwononoka Kalunga nge tuli muukalu.—Tangenu Wavaka-Kolinde 1, 6:9, 10; 15:33.
Zangi atwama nayo Kalunga hali vatu yatufwelelesa nge upi nakuyanda navikakuma. Vaze navasolola ngwavo vafwelela vyuma kanevi navakalivwisa kuwaha kuyoya haya myaka yosena hamavu.—Tangenu Yowano 3:16.
