Mujimbu wamwaza wafuma kuli Yehova, Kalunga wakuwahilila, uze asaka tanga hitanga yipwenga yakuwahilila. (WaChimoteu 1, 1:11) Ikiye ahakileko ulo. Kulimbata kweseka najishimbi cheji kulingisanga tanga yipwenga yakuwahilila mwomwo yapwa hichihela chamwaza chakulelelamo vana. Vaka-Kulishitu vatela kuvumbika jishimbi jamulifuchi lyavo jakupandama kukusonekesa malo.​—Tangenu Luka 2:1,4, 5.

Uno Kalunga amona ngachilihi ulo? Kalunga asaka valunga napwevo valimbata vatwamenga hamwe myaka yosena. Yehova asaka valunga napwevo vapwenga vakushishika kuli umwe namukwavo. (WavaHepeleu 13:4) Ahunga kulilukulula. (Malaki 2:16) Oloze etavisa vaka-Kulishitu kulilukulula nakumbata chipwe kusomboka cheka kuvanga kaha nge muka-mahyavo nalingi ukoji.​—Tangenu Mateu 19:3-6, 9.

Yehova atengele valunga napwevo mangana vazachilenga hamwe milimo. (Kuputuka 2:18) Lunga hakupwa mutwe watanga atela kuzakama vaka-tanga yenyi hakuvatondela vyuma vyasakiwa mukuyoya, nakuvanangula nawa vyaKalunga. Atela kulisuula nakuzanga puwenyi. Valunga napwevo vatela kulizanga nakulivumbika. Malunga namapwevo vatela kulikonekelanga numba vapwenga vakuwahilila mumalo avo mwomwo vosena kavakupukako.​—Tangenu Wavaka-Efwesu 4:31, 32; 5:22-25, 33; WaPetulu 1, 3:7.

Nge muli nakumona ukalu muulo wenu, kaha muvosena mwatela kufwila kulisolwela zangi umwe namukwavo. (Wavaka-Kolinde  1, 13:4, 5) Mazu aKalunga kawasolola nge kulihandununa chikiko cheji kukumisanga ukalu muuloko.​—Tangenu Wavaka-Kolinde 1, 7:10-13.

Yehova asaka mupwenga vakuwahilila. Amilweza mwakutwamina kanawa numba mulivwise kuwaha ukweze wenu. Asaka munganyale kumangana nachinyingi chavisemi jenu. (Wavaka-Kolose 3:20) Yehova asaka nawa mulivwise kuwaha hakulinga vyuma vize asaka Ikiye naMwanenyi.​—Tangenu Muka-kwambulula 11:9–12:1; Mateu 19:13-15; 21:15, 16.

Mwatela kuzata nangolo mangana mutondele vana venu vyakulya, hakusavala navyakuvwala. 1, 5:8) Mwatela kuvanangula nawa vazangenga Kalunga nakumwononoka numba vapwenga vakuwahilila. (Wavaka-Efwesu 6:4) Nge namuvahana chakutalilaho chamwaza hakuzanga Kalunga, kaha navakiko navafwila kulinga ngocho. Nge namuvanangula Mazu aKalunga, kaha namuvakafwa vapwenganga navishinganyeka vyamwaza.​—Tangenu Lushimbi lwamuchivali 6:4-7; Vishimo 22:6.

Vanyike veji kunganyalanga nge namuvakolezeza nakuvasangejeka. Oloze mwatela nawa kuvolola nakuvazangamisa. Kuvanangula mujila kaneyi nachivakinga kuvilinga vyavipi vize vinahase kuvalingisa vahone kupwa vakuwahilila. (Vishimo 22:15) Oloze kamwatela kuvazangamisa naukenyako.​—Tangenu Wavaka-Kolose 3:21.

Vinjiho jaYehova veji kusonekanga mikanda yayivulu yakukafwa visemi navana vavo. Mikanda kana yazama haMbimbiliya.​—Tangenu Samu 19:7, 11.