Chakuzeneka kukakasana, evi vyuma vyavindende vyamuMbimbiliya tunahitulukamo vinazamisa zangi yenu hali Yehova. Ngocho twatela kutwalililaho lika kuzamisa eyi zangi kana. (WaPetulu 1, 2:2) Lutalililo lwenu lwakuyoya haya myaka yosena lwapendamina hakutwalaho lika kulinangula Mazu aKalunga nakupandama kuli ikiye.​—Tangenu Yowano 17:3; WaYuta 21.

Omu chinyingi chenu chakutachikiza Kalunga chili nakuvula, nalufwelelo lwenu nawa nalupwa lwakukola. Lufwelelo nalumikafwa mwivwise Kalunga kuwaha. (WavaHepeleu 11:1, 6) Nalumilingisa mupihilile nakwalumuka nakumilingisa jino munganyale hakwalumuna chiyoyelo chenu.​—Tangenu Vilinga 3:19.

Tunejiva ngwetu muli nakusaka kulwezako vakwenu vyuma munalinangula, mwomwo tuvosena tweji kwivwanga kuwaha kulwezako vakwetu mujimbu wamwaza. Omu namutwalaho lika kulinangula Mbimbiliya, namwijiva mwakuzachishila Mbimbiliya nakulumbununa lufwelelo lwenu muli Yehova namujimbu wamwaza.​—Tangenu Wavaka-Loma 10:13-15.

Vatu vavavulu veji kuputukanga kwambulula mujimbu wamwaza namasepa javo chipwe vausoko wavo. Oloze mwatela kupwa vakuzangama hakulinga ngocho. Muchishishisa chakuvalweza ngwenu kwitava chavo chamakuli, valwezenu kaha vyuma ashika Kalunga. Anukenu nawa ngwenu vatu navevwa kuwaha chikuma hakumona vilinga vyenu vyalikoji keshi hakwivwa vyuma namuhanjika kahako.​—Tangenu WaChimoteu 2, 2:24, 25.

Kulinangula Mazu aKalunga nachimikafwa muzovoloke kushipilitu. Kutwala muze munahase kupwa nausoko wakulipwila naYehova. Munahase kupwa muvatu vamutanga yenyi.​—Tangenu Wavaka-Kolinde 2, 6:18.

Munahase kuzovoloka kushipilitu nge namutwalaho lika kulinangula Mazu aKalunga. (WavaHepeleu 5:13, 14) Hulisenu Chinjiho chaYehova umwe aminangule Mbimbiliya kuzachisa mukanda wakwamba ngwavo Mbimbiliya Nayitunangula Vyuma Muka? Nge namutwalaho lika kulinangula Mazu aKalunga, kaha namuzovoloka mukuyoya chenu.​—Tangenu Samu 1:1-3; 73:27, 28.

Mujimbu wamwaza wafuma kuli Yehova, uze apwa Kalunga wakuwahilila. Munahase kupandama kuli ikiye hakupandama kwakamwihi navatu jenyi. (WavaHepeleu 10:24, 25) Nge namutwalaho lika kwivwisa Yehova kuwaha, kaha namukatambula kuyoya chahaya myaka yosena. Kupandama kuli Kalunga hichuma chachilemu chize mwatela kulinga.​—Tangenu WaChimoteu 1, 1:11; 6:19.