CHILONGESA 7
Uno Wangana waKalunga Chuma Muka?
1. Uno Wangana waKalunga chuma muka?
Vyuma muka vyalingisa Yesu kupwa Mwangana wamwenemwene?—MAKO 1:40-42.
Wangana waKalunga wapwa hifulumende yamwilu. Naukashisa mawangana osena nakukalingisa mwaya muchima waKalunga vakalingemo hamavu ngana muze veji kulingilangamo mwilu. Mujimbu waWangana waKalunga wapwa wamwaza. Kalinwomu vene ngana, Wangana waKalunga naulingisa vatu vasuuluke nafulumende kaneyi yamwaza. Naulingisa vatu vosena vali nakuyoya hamavu vapwenga vakulinunga.—Tangenu Ndanyele 2:44; Mateu 6:9, 10; 24:14.
Wangana watela kupwa namwangana. Yehova atongola Mwanenyi Yesu Kulishitu kupwa Mwangana waWangana wenyi.—Tangenu Kusoloka 11:15.
Talenu vindiyo yakwamba ngwavo Uno Wangana waKalunga Chuma Muka?
2. Mwomwo ika Yesu apwila Mwangana wamwenemwene?
MwanaKalunga atamo kupwa Mwangana mwomwo apwa walikoji kaha nawa wakumika hakulinga vyuma vyakwoloka. (Yowano 1:14) Kaha nawa akwechi ngolo jakukafwa vatu mwomwo mwakayula hamavu kufuma mwilu. Hanyima yakumusangula, ayile mwilu nakutwama kulivoko lyachilyo lyaYehova nakuvandamina. (WavaHepeleu 10:12, 13) Kutwala muze, Kalunga amuhanyine jino ngolo jakuputuka kuyula.—Tangenu Ndanyele 7:13, 14.
3. Veya navakayula hamwe naYesu?
Lizavu lyavatu vavuluka ngwavo ‘vatu vajila’ likiko nalikayula naYesu hamwe mwilu. (Ndanyele 7:27) Vatu vajila vatete vaze asakwile Yesu shina vaposetolo jenyi vakushishika. Noholyapwa ngana, Yehova achili lika nakusakula malunga namapwevo vakushishika kupwa vatu vajila. Ava navakiko nawa veji kuvasangulanga namijimba yakushipilitu ngana mwaYesu.—Tangenu Yowano 14:1-3; Wavaka-Kolinde 1, 15:42-44.
Uno vatu vangahi navakaya mwilu? Yesu avavulukile ngwenyi “utanga wamikoko waundende.” (Luka 12:32) Kuvula chavo nachikapwa 144, 000. Navakayula hamwe naYesu hamavu hosena.—Tangenu Kusoloka 14:1.
4. Vyuma muka vyasolokele omu Yesu aputukile kuyula?
Wangana waKalunga waputukile kuyula mu 1914. * Chuma chatete alingile Yesu hakupwa Mwangana, shina kumbila Satana navandemone jenyi hano hamavu. Satana apihililile chikuma nakuputuka kuneha makava hamavu hosena. (Kusoloka 12:7-10, 12) Kufuma vene haze, ukalu uchili nakuvulilako lika kuvatu. Jijita, zala yakalombolombo, misongo, namindenda vinapu “chinjikizo” chakusolola nge kalinwomu Wangana uputuke kuyula hamavu. Tangenu Luka 21:7, 10, 11, 31.
5. Wangana waKalunga uli nakutesamo vyuma muka?
Wangana waKalunga uli nakuwanyisa hamwe mayongomena avatu akufuma kumafuchi osena kuhichila mumulimo wakwambulula uze uli nakulingiwa mukaye kosena. Vatu vavavwovu vavavulu vali nakwononoka kuli Yesu. Wangana waKalunga naukavakinga omu naukanongesa kano kaye kakuhuka. Ngocho, vosena vaze vali nakusaka kukanganyala kuWangana waKalunga vatela kulinangula kupwa hivatu vaYesu vakwononoka.—Tangenu Kusoloka 7:9, 14, 16, 17.
Mumyaka 1,000, Wangana naukatesamo vyuma vize Kalunga ajina kulingila vatu. Kaye kosena nakakapwa palachise. Kutwala muze, Yesu mwakakindulwisa Wangana kuli Ise. (Wavaka-Kolinde 1, 15:24-26) Kuliko mutu umwe unakusaka kulweza vyaWangana waKalunga tahi?—Tangenu Samu 37:10, 11, 29.
^ par. 6 Nge muli nakusaka mijimbu yakulumbununa upolofweto wamuMbimbiliya wakuvuluka mwaka wa 1914, kaha talenu mafwo 217-220 mumukanda wakwamba ngwavo Mbimbiliya Nayitunangula Vyuma Muka?
