Yesu kapwa ngana mwavatu vosenako, mwomwo avangilile kuyoyela mwilu mwamutu wakushipilitu shimbu kanda asemuke hano hamavu. (Yowano 8:23) Apwile watete kutenga kuli Kalunga, kaha azachililile hamwe naKalunga hakutenga vyuma vyeka vyosena. Ikiye kaha vatengele kuli Yehova ivene, ngocho vamuvuluka ngwavo ikiye MwanaKalunga “umwe kaha wakulipwila.” (Yowano 1:14) Yesu ahanjikililengako Kalunga, ngocho vamuvuluka nawa ngwavo ikiye “Lizu.”​—Tangenu Vishimo 8:22, 23, 30; Wavaka-Kolose 1:15, 16.

Kalunga atumine mwanenyi hano hamavu hakunungulwila kuyoya chenyi chamwilu mujimo lyaMaliya, kaYuleya uze apwile kanda achilisavaleho lyehi nalunga. Ngocho, Yesu kapwile naise wakumusema hano hamavuko. (Luka 1:30-35) Yesu ejile hano hamavu (1) nakunangula vatu muchano wakuvuluka Kalunga, (2) nakutuhana chakutalilaho mangana tutachikize mwakulingila mwaya muchima waKalunga nahalwola natupwanga muukalu, (3) nakuhana kuyoya chenyi chakukupuka mwosena kupwa “ndando yakusokola.”​—Tangenu Mateu 20:28.

Ndando yakusokola yapwa fweto veji kuhananga mangana vasokole mutu kukufwa. (Kulovoka 21:29, 30) Kalunga kajinyine ngwenyi vatu vashinakajiwenga nakufwako. Uno twatachikiza ngachilihi ngocho? Kalunga alwezele mutu wakulivanga Alama ngwenyi nge mwavulumuna mulonga uze vavuluka muMbimbiliya ngwavo “shili,” kaha mwakafwa.  Ngocho nge Alama kavulumwine shiliko, kachi kafwileko. (Kuputuka 2:16, 17; 5:5) Kweseka nomu yahanjika Mbimbiliya, kufwa ‘chengilile’ mukaye kuhichila muli Alama. Ngocho Alama atambwishile shili nakufwa hali vana venyi vosena. Shikaho kwatela kupwa ndando yakutusokola kukufwa chize twaswanyine kuli Alama.​—Tangenu Wavaka-Loma 5:12; 6:23.

Iya atamo kuhana ndando yakutusokola kukufwa? Omu tweji kufwanga, tweji kufwetanga mukuli washili yetu kaha. Kakweshi mutu wakuhona kukupuka, nahase kufwetela shili javakwavoko.​—Tangenu Samu 49:7-9.

Yesu kapwile nashili ngana mwayetuko, oloze apwile wakukupuka mwosena. Ngocho katelele kufwa hashili jenyiko, mwomwo kalingile shili numba yimweko. Oloze afwililile shili javatu. Kalunga asolwelele etu vatu zangi yenyi yakulitulaho hakutuma Mwanenyi ezenga nakutufwila. Yesu naikiye asolola zangi hali etu hakwononoka Ise nakuhana kuyoya chenyi hashili jetu.​—Tangenu Yowano 3:16; Wavaka-Loma 5:18, 19.

Talenu vindiyo yakwamba ngwavo Mwomwo Ika Yesu Afwililile?

Yesu okilenga vaveji, nakusangula vafu, nakuyovola vatu muponde omu apwile hano hamavu. Hakulinga ngocho asolwele jino vyuma mwakalingila vatu vakwononoka kulutwe. (Mateu 15:30, 31; Yowano 5:28) Omu Yesu afwile, Kalunga amusangwilile kukuyoya chakushipilitu. (WaPetulu 1, 3:18) Yesu avandaminyine kulivoko lyachilyo lyaKalunga swi noho Yehova amuhanyine jino ngolo jakuyula mwaMwangana hamavu hosena. (WavaHepeleu 10:12, 13) Oholyapwa ngana Yesu ali nakuyula mwaMwangana mwilu, kaha vaka-kumukavangiza vali nakuvilika mujimbu wamwaza mukaye kosena.​—Tangenu Ndanyele 7:13, 14; Mateu 24:14.

Kalinwomu Yesu azachise ngolo jenyi mwaMwangana nakufumisako kuyanda chosena navaze veji kuchinehanga. Vosena vaze veji kusololanga lufwelelo muli Yesu nakumwononoka navakalivwisanga kuwaha kuyoya mupalachise hano hamavu.​—Tangenu Samu 37:9-11.