1, 2. Chuma muka alingile Mbalame hakusaka kuhungumwisa vatu jaYehova?

ACHISHINGANYEKENU hali muka-kulova uze ali nakuya kuchindoko mangana akalove muyachi wavaishi uze ali nakusaka. Shimbu kanda aputuke kulova, mwasakula ndulo yize vasaka chikuma vaishi vaze ali nakusaka kulova, kaha kufumaho mwahaka jino ulovo muchindoko nakuvandamina. Kaha nge ishi nakwate kuulovo, ikiye mwasapula ulovo nakujiha uze ishi.

² Omu mukiko cheji kupwanga nakuli vatu. Chakutalilaho, omu vaIsalele vapwile hakamwihi nakwingila muLifuchi lyaLushiko, vatungile chilombo chavo muLikundu lyaMowave. Kaha mwangana wavaMowave alwezele Mbalame angule vaIsalele mangana amuhane jimbongo jajivulu. Oloze Mbalame awanyineko jila yeka yakulingishilamo vaIsalele valyangule vavene. Echi chasolola nge asakwile kanawa ndulo yakuzachisa. Ngocho Mbalame atumine mapwevo vavaMowave muchilombo chavaIsalele mangana vakavazondole valinge navo ujila.—Kulava 22:1-7; 31:15, 16; Kusoloka 2:14.

3. Uno vaIsalele vafwile ngachilihi kundulo azachishile Mbalame?

³ Uno ndulo asakwile Mbalame yazachile tahi? Eyo. Malunga vavaIsalele vavavulu valingile “ujila navana vavaMowave vamapwevo.” Kaha vaputukile nakulemesa tulunga  vamakuli kuhakilako vene naMbale wakuPeyole, uze apwile kalunga waujila. Ngocho, vaIsalele 24,000 vafwililile kungiza yaLifuchi lyaLushiko.—Kulava 25:1-9.

4. Mwomwo ika vaIsalele vavavulu valingililile ujila?

⁴ Mwomwo ika vaIsalele vavavulu vafwililile mumuheto azachishile Mbalame? Mwomwo vashinganyekelenga chikuma havyuma yafwilililenga michima yavo nakuvulyama vyuma vize avalingililile Yehova. VaIsalele vavalingililile vyuma vyavivulu kuli Kalunga vize vyatelelele kuvalingisa vapwenga vakushishika kuli ikiye. Avasokwele muundungo muEjipitu, nakuvahana vyakulya omu vapwile mupambo nakuvahetesa kanawa kungiza yaLifuchi lyaLushiko. (WavaHepeleu 3:12) Chamokomoko navyuma kanevi avalingililile, vaIsalele vavazondwele valinge ujila. Kaposetolo Paulu asonekele ngwenyi: “Kanda natulinganga ujilako, nge muze valingile vamwe ujila, kaha kwafwile vatu.”—Wavaka-Kolinde 1, 10:8.

5, 6. Vyuma muka natulinangula kuvyuma vyasolokele muLikundu lyaMowave?

⁵ Twatela kutachikiza ngwetu kaye kakahya kali mwakamwihi. Shikaho, echi chinasolola nge nayetu tuli kungiza yaLifuchi lyaLushiko ngana muze chapwile kuli vaIsalele. (Wavaka-Kolinde 1, 10:11) Kaye tuli nakuyoyelamo makumbi ano kanapihi chikuma navilinga vyaujila kuhambakana namuze vapwile vaMowave. Kaha vilinga kana vinahase nakwenyeka vatu jaYehova. Makumbi ano, ndulo ali nakuzachisa chikuma Liyavolo shina ujila.—Kulava 25:6, 14; Wavaka-Kolinde 2, 2:11; WaYuta 4.

⁶ Lihulisenu ngwenu, ‘Kutala ngunakusaka kulivwisa kuwaha vyuma wafwila muchima wami vize vyapwa vyakashimbu kakandende tahi, nyi ngwafwila kukalivwisa kuwaha kuyoya chahaya myaka yosena mukaye kakahya?’ Chapwa chachilemu kwononoka lushimbi lwaYehova lwakwamba ngwavo: “Chinenu ujila.”—Wavaka-Kolinde 1, 6:18.

7, 8. Uno ujila wapwa uka, kaha mwomwo ika wapwila waupi?

⁷ Makumbi ano, vatu vavavulu vanandupukila mukulinga ujila nakuhokola lushimbi lwaKalunga lwakutalisa kuujila. MuMbimbiliya lizu ujila lyatalisa kukulisavala chapwevo nalunga vaze kavalimbatako. Lyatalisa nawa kukulisavala chavatu vausonyi umwe chipwe kulisavala nakanyama. Vilinga vyaujila vyapwa uhule, nakulisavala mukanwa namujindumbi, nakusokota usonyi wamutu uze kawalimbata nenyiko.—Talenu Chinyikilo chaKusongo 23.

⁸ Mbimbiliya yahanjika hatoma ngwayo mutu uze mwatwalaho lika kulinganga ujila katela kutwama muchikungulwiloko. (Wavaka-Kolinde 1, 6:9; Kusoloka 22:15) Kaha mutu kana kavamufwelela chipwe kumuvumbika kuli vakwavoko. Shikaho, ujila weji kunehanga ukalu waunene. Weji kulingisanga mutu apwenga nachivezu chachipi, nakutambula majimo chipwe kuhana majimo akuhona kusaka, nakuneha nawa ukalu muulo, namisongo chipwe vene kufwa. (Tangenu Wavaka-Ngalesha 6:7, 8.) Kachi nge mutu mwashinganyeka haukalu weji kwizanga muujila, kaha nahase kulitwamina kuulinga. Oloze kakavulu mutu eji kushinganyekanga kaha hakufwila kulisuulwisa yivene omu mwaputuka kulinga vyuma vize navimulingisa aputuke kulinga ujila. Chuma chatete cheji kulingisanga ngocho shina kutala chipwe kutanga vyavatu vali uselesele.

9. Ponde muka yatwama hakutala chipwe kutanga vyavatu vali uselesele?

⁹ Mivwimbimbi yavatu vali uselesele vayitunga mangana yisangumunenga peha yakufwila kulisavala namutu. Makumbi ano, mivwimbimbi yavatu vali uselesele yinalisale chikuma, kaha yili namujimangazini jajivulu jakukaye,  namumikanda, namumyaso, nahavisaji vyamivwimbimbi, nahaInternet. Vatu vavavulu vashinganyeka ngwavo mivwimbimbi yavatu vali uselesele yapwa yamwaza kuyitala, oloze yeji kunehanga ponde yayinene chikuma. Yeji kulingisanga mutu apwenga natato yakufwila kulinga ujila nakupwa jino napeha yayipi yakusaka kulisavala namutu. Nge mutu naputuka kutala chipwe kutanga vyavatu vali uselesele, eji kuputukanga kulinga vyuma vize navimulingisa apwenga natato yakulisokota kuusonyi, nakuhona kulivwasana muulo, nakulilukulula.—Wavaka-Loma 1:24-27; Wavaka-Efwesu 4:19; talenu Chinyikilo chaKusongo 24.

10. Uno lundongi lwatwama hali WaYakova 1:14, 15, lunahase kutukafwa ngachilihi tulihende kuujila?

¹⁰ Chapwa chachilemu kutachikiza vyuma vize vinahase kutuzondola tulinge ujila. Talenu mazu akutuhuhumuna vasoneka hali WaYakova 1:14, 15, akwamba ngwavo: “Mutu himutu eji kupwanga mucheseko omu kufwila chamumuchima wenyi ivene nachimwonga nakumuzondola. Jino kufwila kana omu nachimita, cheji kusemanga shili, kaha shili omu navayilinga, yeji kusemanga kufwa.” Shikaho, nge munaputuka kushinganyeka kulinga vyuma vyavipi, kaha hahaze vene mwatela kulitwamina kuvishinganyeka. Chakutalilaho, nge munamono hachisaji chipwe hakopyuta yenu haneza mivwimbimbi yavatu vali uselesele, kaha hahaze vene talenu kweka, chipwe kujima kopyuta, chipwe kwalumuna polongalamu yiliho. Nge chiku, kaha nachimilingisa mupwenga navishinganyeka vyavipi chikuma vize kamweshi kukahasa kufungululako.—Tangenu Mateu 5:29, 30.

11. Uno Yehova nahase kutukafwa ngachilihi nge tuli navishinganyeka vyavipi?

¹¹ Yehova atutachikiza kanawa kuhambakana nomu twalijiva etu vavene. Numba tuhu ejiva ngwenyi katwakupukako, oloze atachikiza ngwenyi tunahase kuhonesa vishinganyeka vyavipi. Shikaho atulweza ngwenyi: “Jihenu  vilyo vyenu vyamujimba vize vili hamavu vyakufwila ujila, namajilo, napeha yayipi yakusaka kulisavala, navyuma vyavipi, nachipululu, chikiko kulemesa makombelo.” (Wavaka-Kolose 3:5) Numba tuhu kachapwa chachashi kulinga ngochoko, oloze anukenu ngwenu Yehova eji kututalililanga chikoki nakutukafwa. (Samu 68:19) Ndumbwetu umwe walunga wamukweze afwile mumuheto wakutalanga mivwimbimbi yavatu vali uselesele nakulisokota kuusonyi wenyi. Masepa jenyi kushikola vamwenenga ngwavo kulinga vyuma kana kachapwa chakuhengako, oloze ikiye ambile ngwenyi: “Vilinga kana vyenyekele chivezu chami nakungulingisa nguputuke kulinga ujila.” Amwene jino ngwenyi atelelele kulitwamina kulinga vyuma kana. Ngocho Yehova amukafwile alitwamine kuvilinga. Kachi nge muli navishinganyeka vyakufwila kulinga ujila, kaha lombenu Yehova amihane “ngolo jakuhambakana jize javatu” mangana jimikafwe mupwenga navishinganyeka vyamwaza.—Wavaka-Kolinde 2, 4:7; Wavaka-Kolinde 1, 9:27.

12. Mwomwo ika twatela ‘kulamina michima yetu’?

 ¹² Solomone asonekele ngwenyi: “Lamanga muchima wove kuhambakana vyuma vyosena weji kulamanga, mwomwo kuyoya chove chapendamina hamuchima.” (Vishimo 4:23) “Muchima” wamutu wapwa mutu wamukachi, uze Yehova eji kumonanga. Shikaho vyuma natumona vinahase kutunehela ukalu. Lunga wakushishika Yopa ambile ngwenyi: “Ngunalishiki lushiko nameso ami. Ngocho ngushishikile ikaze pwevo weka?” (Yopa 31:1) Ngana mwaYopa, nayetu twatela kukekesa kanawa vyuma natutala navize tweji kushinganyekanga. Kaha nawa twatela kulomba ngana muze alombele muka-kwimba jisamu ngwenyi: “Talisa meso ami kweka mangana nguzeneke kutala vyuma vyamokomoko.”—Samu 119:37.

13. Njina asakwile masepa muka?

¹³ Masepa jetu vanahase kutulingisa tulinge vyuma vyamwaza chipwe vyavipi. Shikaho nge namusakula masepa vaze veji kukavangizanga jishimbi jaKalunga, kaha navamikafwa nayenu mukavangizenga jishimbi jaKalunga. (Vishimo 13:20; tangenu Wavaka-Kolinde 1, 15:33.) Nge natukekesa vyuma vyasolokele kuli Njina, kaha tunahase kumona ovyo chapwila chachilemu kusakula kanawa masepa. Njina apwilenga mwanaYakova wapwevo, ngocho vamulelele mutanga yize yalemeselenga Yehova. Njina kapwilenga navilinga vyavipiko, oloze alikwachile usepa navana vavaKanane vamapwevo vaze kavalemeselenga Yehovako. Vatu jaKalunga vamwenenga kulinga ujila kupwa chakuhenga, oloze vaKanane vamwenenga kulinga ujila kupwa chakwoloka, kaha vavatachikijile kupwa vaka-ujila. (VyavaLevi 18:6-25) Omu Njina apwile namasepa jenyi, aliwanyine naShekeme mukweze walunga wamuKanane uze amwivwililile peha. Shekeme “vamuvumbikilenga chikuma” mutanga yavo, oloze kazangile Yehovako.—Kuputuka 34:18, 19.

14. Vyuma muka vyasolokele kuli Njina?

 ¹⁴ Shekeme alingile muze amwene ngwenyi mwakwoloka. Hakuwana nge evwililile Njina peha, ngocho “amumbachile nakuya nakumupika.” (Tangenu Kuputuka 34:1-4.) Chuma kanechi chanehele ukalu waunene chikuma nakwingisa Njina navaka-tanga yenyi vosena muponde.—Kuputuka 34:7, 25-31; Wavaka-Ngalesha 6:7, 8.

15, 16. Vyuma muka twatela kulinga numba tupwenga namangana?

¹⁵ Katwatela kulinga ngana muze alingile Njina numba jino tutachikize ngwetu chapwa chamwaza kukavangiza jindongi jaYehovako. Mbimbiliya yamba ngwayo: “Ou mwatambuka navaka-mangana mwakapwa muka-mangana, oloze ou mwalikatanga naviheu mwakamona lupi.” (Vishimo 13:20) Shikaho, fwilenu kutachikiza “jijila jamwaza josena” mangana mulihende kuukalu.—Vishimo 2:6-9; Samu 1:1-3.

¹⁶ Tunahase kupwa namangana hakutanganga Mazu aKalunga, nakulombanga shimbu kanda tusakule vyakulinga, nakukavangizanga nawa vyuma mwatulweza ndungo wakushishika wakuzangama. (Mateu 24:45; WaYakova 1:5) Chipwe ngocho, nayenu mwatachikiza ngwenu tuvosena twapwa tuvakuhehela, kaha nawa katwakupukako. (Yelemiya 17:9) Jino achishinganyekenu mwapwanga mucheseko chakulinga ujila, kaha mutu umwe mwamihuhumuna. Uno namulinga ngachilihi? Kutala namupihilila tahi, nyi namwitavila vamikafwe?—Vamyangana 2, 22:18, 19.

17. Uno kuhuhumuna chakufuma kuli vandumbwetu chinahase kutukafwa ngachilihi? Hanenu chakutalilaho.

¹⁷ Achishinganyekenu hachakutalilaho chino. Ndumbwetu wapwevo ali kumilimo, kaha lunga umwe namuzange chikuma nakumulweza valisesembwe. Ou lunga kazachila Yehovako, oloze wamwaza kaha nawa walikoji. Kaha ndumbwetu weka wapwevo navamono vali hamwe, ngocho mwamuhuhumuna hachuma kana. Uno uze ndumbwetu  vanahuhumuna mwevwa ngachilihi? Kutala mwalihakwila yivene tahi, nyi mwamona kulema chamazu vanamuhuhumuna? Ou ndumbwetu pamo azanga chikuma Yehova nakufwila kusaka kulinga vyuma vyakwoloka. Jino nge mwatwalaho lika kulisesembwa nauze lunga, kutala ali ‘nakuchina ujila’ tahi, nyi ‘nafwelela muchima wenyi’?—Vishimo 22:3; 28:26; Mateu 6:13; 26:41.

18, 19. Lumbununenu omu Yosefwe achinyine ujila.

¹⁸ Yosefwe vamukwachile undungo muEjipitu omu apwile kanyike. Pwevo lyakaka yenyi amushinjililenga hakumbi hakumbi valinge ujila, oloze Yosefwe atachikijile ngwenyi chapwile chakuhenga kulinga ujila. Yosefwe azangile chikuma Yehova, kaha afwilililenga kumwivwisa kuwaha. Ngocho omu vamushinjilililenga kuli pwevo lyakaka yenyi mangana valisavale, ikiye akanyinenga. Oloze  hakuwana nge Yosefwe apwile ndungo, ngocho kahashile kuseza kaka yenyiko. Kaha likumbi limwe pwevo lyakaka yenyi amushinjililile mangana valisavale, oloze Yosefwe ‘achinyinyinyine haweluka.’—Tangenu Kuputuka 39:7-12.

¹⁹ Nge Yosefwe apwilenga navishinganyeka vyakufwila kulisavala nauze pwevo, kachi kahashile kuhonesa cheseko kanako. Oloze Yosefwe amwenenga usoko wenyi naYehova kupwa waulemu chikuma kuhambakana vyuma vyosena. Ngocho alwezele uze pwevo ngwenyi: “Kaka yami . . . kangukanyishile chuma numba chimweko shina yove kaha, mwomwo unapu upwevo lyenyi. Kaha nanguhasa ngachilihi kulinga upi waunene ngana nakulinga shili kuli Kalunga?”—Kuputuka 39:8, 9.

20. Twatachikiza ngachilihi ngwetu Yehova awahililile naYosefwe?

²⁰ Numba tuhu Yosefwe apwile kwakusuku natanga yenyi, oloze atwalileho lika kupwa wakushishika kuli Kalunga, kahechi chalingishile Yehova amukisule. (Kuputuka 41:39-49) Chikupu vene, Yehova awahililile chikuma hakumona kushishika chaYosefwe. (Vishimo 27:11) Chinahase kupwa chachikalu kuhonesa cheseko chakulinga ujila. Oloze mwatela kwanuka mazu akwamba ngwavo: “Enu mwazanga Yehova, hungenunga vyuma vyavipi. Eji kulamanga vatu jenyi vakushishika. Eji kuvapulululanga mumavoko avaka-kuhuka.”—Samu 97:10.

21. Ndumbwetu umwe wamukweze alondezezele ngachilihi Yosefwe?

²¹ Namakumbi ano nawa, vangamba jaKalunga vavavulu veji kusololanga ngwavo vahunga “vyuma vyavipi nakuzanga vyuma vyamwaza.” (Amose 5:15) Munahase kupwa vakushishika kuli Yehova chamokomoko namyaka yakusemuka muli nayo. Ndumbwetu umwe walunga wamukweze apwile mucheseko omu apwile kushikola. Mukwavo muka-shikola wapwevo amulwezele ngwenyi nge mwamukafwako kukumbulula vyeseko vyamakumi, kaha mwakalinga nenyi  ujila. Jino vyuma muka alingile ou ndumbwetu? Alingile ngana muze alingile Yosefwe, ambile ngwenyi: “Hahaze vene ngwakanyine. Hakulama kulonga chami, vatu veji kunguhananga kavumbi.” Kulinga ujila chinahase kwivwisa mutu ‘kuwaha hatando yayindende,’ oloze cheji kunehanga ukalu wauvulu. (WavaHepeleu 11:25) Kwononoka kuli Yehova cheji kunehanga kuwahilila chahaya myaka yosena.—Vishimo 10:22.

22, 23. Uno Yehova nahase kutukafwa ngachilihi nge tunavulumuna mulonga waunene?

²² Satana nahase kuzachisa muheto waujila mangana atwoze, kaha muheto kana unahase kupwa waukalu kuufungulula. Tuvosena pamo tweji kulipikanga navishinganyeka vyakuhenga hakumbi hakumbi. (Wavaka-Loma 7:21-25) Yehova ejiva chuma kanechi, mwomwo “atachikiza ngwenyi twapwa tulukungu kaha.” (Samu 103:14) Nyi ngachilihi nge muka-Kulishitu navulumuna mulonga waunene waujila? Kutala echi chili nakulumbununa nge kaveshi kumukonekelako tahi? Nduma. Nge mwapihilila nakwalumuka, kaha Yehova mwamukafwa, mwomwo eji “kukonekelanga.”—Samu 86:5; WaYakova 5:16; tangenu Vishimo 28:13.

²³ Yehova atuhana nawa “malunga kupwa wana.” Malunga kana vapwa tulama vazangi, kaha veji kutuzakamanga. (Wavaka-Efwesu 4:8, 12; WaYakova 5:14, 15) Atuhana tulama mangana vahase kutukafwa tuzamise usoko wetu nayikiye.—Vishimo 15:32.

24, 25. Uno kupwa ‘namangana’ chinahase kutukafwa ngachilihi tulihende kuujila?

²⁴ Hakusaka tusakule kanawa vyakulinga, twatela kutachikiza kanawa omu jishimbi jaYehova jinahase  kutunganyalisa. Katwatela kupwa ngana mwamukweze walunga uze vavuluka hamukanda waVishimo 7:6-23. Ou mukweze apwile “wakuzeneka mangana,” ngocho afwile mumuheto wakulinga ujila. Twatela kupwa namangana keshi kupwa kaha vakunangakanako. Nge natupwa namangana, kaha natutachikiza omu vyapwa vishinganyeka vyaKalunga nakuzata kweseka nomu mwaya muchima wenyi. Shikaho, mwatela kwanuka mazu ano akwamba ngwavo: “Ou mwawana mangana azanga mwono wenyi, kahou mwaheta uhashi wakukekesa vyuma mwakafukila.”—Vishimo 19:8.

²⁵ Kutala mwenjikiza chikupu ngwenu jishimbi jaKalunga japwa jakwoloka tahi? Uno mwafwelela ngwenu kukavangiza jishimbi kana nachimilingisa muwahilile tahi? (Samu 19:7-10; Isaya 48:17, 18) Kachi nge muchili nakuhuhwasana, kaha mwatela kushinganyeka havyuma vyamwaza vyosena namilingila Yehova. Mbimbiliya yamba ngwayo: “Makilenu mangana mumone ngwenu Yehova apwa wamwaza.” (Samu 34:8) Kachi nge namulinga ngocho, kaha namutwalaho lika kuzanga Kalunga. Zangenunga vyuma azanga Kalunga nakuhunga vize ahunga. Shinganyekenunga havyuma vyamwaza, vyamuchano, vyakwoloka, vitoma, vize navilingisa vatu vavizange, kaha nawa vyamwenemwene. (Wavaka-Fwilipi 4:8, 9) Nayetu tunahase kunganyala kumangana aYehova ngana muze chapwile kuli Yosefwe.—Isaya 64:8.

26. Vyuma muka natushimutwila mutupetulu vanakavangizaho?

²⁶ Shikaho, numba nge mwapwa muvajike chipwe mwatwama muulo, mwatela kutachikiza ngwenu Yehova asaka mulivwise kuwaha kuyoya nakupwa vakuwahilila. Tupetulu vavali vanakavangizaho vanashimutwila havyuma vize navitukafwa tufukile muulo wetu.