1, 2. Uno nge muulo muli ukalu, kutala chalumbununa nge ulo kana kaweshi kushimbulako tahi? Lumbununenu.

ULO wapwa wana wakufuma kuli Yehova. Ngocho unahase kulingisa mutu apwenga wakuwahilila mukuyoya. Chipwe ngocho, malo osena akwechi ukalu wakulisezaseza. Kaha shimbu jimwe munahase kumona nge ukalu wenu kaweshi kukakumako, kahechi cheji kulingisanga valunga napwevo vahone kutwama kanawa ngana muze vatwaminenga hakavanga.

² Chipwe ngocho, katwatela kulikomokelako nge tweji kumonanga ukalu lwola lwosena muulo wetu. Kaha kachi nge muulo wetu muli ukalu, katwatela kushinganyeka ngwetu ulo wetu kaweshi kushimbulako. Vaka-kulimbata vavavulu vaze vapwilenga nakumona ukalu waunene chikuma mumalo avo, vanakilikitanga chikuma nakukumisa ukalu kana nakuzamisa cheka ulo wavo. Uno vanalinginga ngachilihi ngocho?

3, 4. Ukalu muka unahase kusoloka muulo?

³ Ulo weji kuwanyisanga hamwe vatu vavali vaze vakwechi vishinganyeka vyakulihandununa, kaha kwatwama vyuma vize mutu himutu ajinda, navize azanga, najila eji kulingilangamo vyuma vimwe. Valunga  napwevo nawa vanahase kufuma kuvisemwa namiyachi yakulihandununa. Ngocho, chasakiwa kuzata nangolo kaha nawa cheji kumbatanga lwola numba vahase kulitachikiza kanawa nakulivwasana.

⁴ Mukuhita chalwola, valunga napwevo vanahase kuputuka kulilingila vyeshovyo vanasake nakuhona kuzachila hamwe. Kaha echi nachisolola nge vanalihandununa. Uno vyuma muka navivakafwa mangana vaputuke cheka kuzachila hamwe?

5. (a) Chuma muka nachikafwa muka-Kulishitu apandame chikuma kuli Yehova nakuli muka-mahyenyi? (b) Kweseka namukanda WavaHepeleu 13:4, twatela kumona ngachilihi ulo?

⁵ Yehova ahana jindongi jamwaza jize najimikafwa mupandame chikuma kuli ikiye nakuli muka-mahyenu. (Samu 25:4; Isaya 48:17, 18) Atulweza ngwenyi: “Ulo vauvumbikenga kuli vosena.” (WavaHepeleu 13:4) Kuvumbika chuma  chalumbununa kuchimona kupwa chachilemu chikuma. Chuma kana kamweshi kuchimonanga kupwa chamokomokoko, oloze namuchikinganga. Omu mukiko Yehova asaka etu tumonenga ulo.

6. Uno mukanda waMateu 19:4-6 watulweza vyuma muka kweseka nomu Yehova amwenamo ulo?

⁶ Yehova ikiye ahakileko ulo. Kaha Mwanenyi Yesu ambile ngwenyi: “Uno kanda mutangengaho lyehi ngwavo ou avatangile kufuma vene kumaputukilo avatengele lunga napwevo nakwamba ngwenyi: ‘Shikaho lunga mwakaseza ise nanaye nakukalipanjika napwevo lyenyi, kaha ava vavali navakapwanga mujimba umweko’ nyi? Ngocho kaveshi cheka vavaliko, oloze mujimba umwe kaha. Shikaho chuma chize Kalunga nanungu hamwe mutu kanda achihandununako.” (Mateu 19:4-6) Kufuma vene kukuputuka, Yehova ahakileko ulo mangana wililenga. Asakile jitanga jipwenga jakulinunga nakupwa jakuwahilila nakulivwisa kuwaha kuyoya.

7. Valunga napwevo vanahase kuzamisa ngachilihi ulo wavo?

⁷ Chipwe ngocho, vaka-kulimbata makumbi ano vanakumona ukalu wauvulu kuhambakana namuze chapwile kunyima. Shimbu jimwe nge ukalu unatoho, veji kushinganyekanga ngwavo nachiwaha kaha kulilukulula. Oloze kutachikiza omu Yehova amona ulo chinahase kutukafwa chikuma.—WaYowano 1, 5:3.

8, 9. (a) Tunahase kukavangiza ngachilihi jindongi jaYehova muulo? (b) Tunahase kusolola ngachilihi ngwetu twamona ulo wetu kupwa waulemu?

⁸ Yehova eji kututwaminyinanga mangana tunganyale. Nganomu tunamono, Yehova atulweza ngwenyi: “Ulo vauvumbikenga.” (WavaHepeleu 13:4; Muka-kwambulula 5:4) Shikaho, natunganyala chikuma kachi nge natukavangizanga jindongi jaYehova numba tuhu chachikalu kulinga ngocho.—Wavaka-Tesolonyika 1, 1:3; WavaHepeleu 6:10.

 ⁹ Kachi nge natumona ulo wetu kupwa waulemu, kaha natulihenda kukulinga chipwe kuhanjika vyuma vize navyenyeka ulo wetu. Shikaho, twatela kuzata nangolo mangana tuzamise ulo wetu. Uno tunahase kulinga ngachilihi ngocho?

10, 11. (a) Ukalu muka weji kusolokanga mumalo amwe? (b) Mwomwo ika jila natulihanjikishilamo namuka-mahyetu yapwila yayilemu?

¹⁰ Mutu nahase kwivwisa kupihya muka-mahyenyi mujijila jakulisezaseza. Twatachikiza ngwetu vaka-Kulishitu kavatela kuveta vaka-mahyavo chipwe kulinga vyuma vize navivalemekako. Oloze tunahase kulemeka muka-mahyetu kuhichila muhanjikiso yetu. Mazu natuhanjika anahase kupwa chitwa. Pwevo umwe ambile ngwenyi: “Lunga lyami eji kunguvetanga namazu. Numba tuhu kangweshi namikiki hamujimbako, oloze mazu amapi eji kuzachisanga akufwana nge ‘Wapwa uchiteli kuli ami,’ chipwe ‘Uwamokomoko,’ eji kungulemekanga chikuma kumuchima.” Lunga umwe ambile ngwenyi, puwenyi amwambilenga mazu amapi nakumusekelekanga kuzachisa majina akulisezaseza. Ambile nawa ngwenyi: “Kangweshi kuhasa kuhanjika mazu osena eji kungwambangako. Echi chikiko cheji kungulingisanga ngushimbule chikuma kumilimo nakuhona kumuhanjikisanga. Kaha ngweji kwivwanga kuwaha kutwama kumilimo kuhambakana kuzuvo.” Makumbi ano, hanjikiso yakasautu neyi yaukenya nahanjikiso yize nayivwisa mutu kukola kumuchima vinalisale chikuma mukaye.

¹¹ Nge valunga napwevo navalyambanga mazu amapi, kaha vanahase kulitwa jimbandu muvishinganyeka jize kajeshi kuyoya washiko. Chipwe ngocho, Yehova kasaka valunga napwevo valyambenga mujila kaneyiko. Oloze chapwa  chachashi mutu kulemeka muka-mahyenyi chakuzeneka kutachikiza. Pamo munahase kumona ngwenu mweji kutetelanga muka-mahyenu, oloze kutala omu mukiko amona nayikiye tahi? Kachi nge munahanjika mazu aze analemeka muka-mahyenu, kaha mwatela kwalumunako hanjikiso yenu.—Wavaka-Ngalesha 5:15; tangenu Wavaka-Efwesu 4:31.

12. Chuma muka nachilingisa Yehova amone kulemesa chamutu kupwa chamokomoko?

¹² Jila namuhanjikilamo namuka-mahyenu kupenge chipwe mukachi kavatu yapwa yayilemu kuli Yehova. (Tangenu WaPetulu 1, 3:7.) Mukanda WaYakova 1:26 wamba ngwawo: “Kachi nge mutu nalimono ngwenyi apwa  muka-kulemesa Kalunga, oloze keshi kukasa lilimi lyenyiko, kaha ali nakutangisa muchima wenyi, kaha nawa kulemesa chenyi chinapu chaufwefwelekete.”

13. Mujila muka yikwavo yize mutu nahase kwivwishilamo kupihya muka-mahyenyi?

¹³ Valunga napwevo nawa vatela kupwa vakuvanguluka chikuma. Chakutalilaho, muka-mahyenu mwevwa ngachilihi kachi nge namuputuka kushimutwilanga shimbu yosena namutu uze kapwa muka-mahyenuko? Numba tuhu namulinga ngocho chakuhona kutachikiza, pamo hakuzachila hamwe muwande chipwe kumukafwa muukalu ali nawo, kutala muka-mahyenu mwapihilila tahi? Muka-Kulishitu umwe wapwevo ambile ngwenyi: “Ngweji kwivwanga kukola kumuchima hakumona lunga lyami ali nakushimutwilanga chikuma nandumbwetu umwe wapwevo muchikungulwilo nakumuzakama. Echi cheji kungulingisanga ngulivwe nge nguwamokomoko.”

14. (a) Chishina muka natulinangula hali Kuputuka 2:24? (b) Chihula muka twatela kulihulisa?

¹⁴ Etu vaka-Kulishitu twatwama namulimo wakuzakamanga visemi jetu hamwe kaha navandumbwetu muchikungulwilo. Chipwe ngocho, nge tunengila muulo kaha chuma chachilemu twatela kulinga shina kuzakama muka-mahyetu. Yehova ambile ngwenyi lunga ‘mwakalipanjika napwevo lyenyi.’ (Kuputuka 2:24) Shikaho twatela kuzanga chikuma vaka-mahyetu. Lihulisenu ngwenu: ‘Uno ngweji kuzanganga chikuma muka-mahyami nakuwanangako lwola lwakushikamanga nenyi tahi?’

15. Mwomwo ika vaka-Kulishitu vaze vatwama mumalo kavatela kulijilila chikuma navatu vausonyi wekako?

¹⁵ Kachi nge natulijililanga chikuma navatu vausonyi weka vaze kavapwa vaka-mahyetuko, kaha chinahase kuneha ukalu muulo wetu. Mwomwo chuma kana nachitulingisa tupandame chikuma kuli mutu kana nakumuzanga.  (Mateu 5:28) Kaha nachitulingisa jino tulinge vyuma vize navihona kuneha kavumbi muulo wetu.

16. Mbimbiliya yahana lushimbi muka haulo?

¹⁶ Mbimbiliya yamba ngwayo “ulo vauvumbikenga,” kaha kufumaho yahanjika cheka nawa ngwayo: “Kahela kaulo kanda vakakapihisako, mwomwo Kalunga mwakasopesa vaka-ujila navaka-ukoji.” (WavaHepeleu 13:4) Mazu akwamba ngwavo “kahela kaulo,” atalisa kukulisavala chalunga napwevo. (Vishimo 5:18) Uno tunahase kusolola ngachilihi ngwetu twavumbika kahela kaulo nakuhona kukapihisa?

17. (a) Uno vatu vavavulu makumbi ano vamona ngachilihi ukoji? (b) Uno vaka-Kulishitu vatela kumona ngachilihi ukoji?

¹⁷ Vatu vamwe makumbi ano vachimona kupwa chakwoloka kulisavala namutu uze kavalimbata nenyiko. Katwatela kupwa ngana mwavatu kanako. Yehova ahanjika hatoma ngwenyi ahunga ujila naukoji. (Tangenu Wavaka-Loma 12:9; WavaHepeleu 10:31; 12:29) Shikaho kachi nge natulisavalanga namutu uze kapwa muka-mahyetuko kaha tuli nakupihisa ulo wetu. Echi nachisolola nawa nge katwavumbika jishimbi jaYehovako, kaha nachitulingisa tujihe usoko wetu naikiye. Shikaho twatela kulihenda kuvyuma vize navitulingisa tulinge ukoji. Chakutalilaho, katwatela kupwa navishinganyeka vyavipi hali mutu umweko.—Yopa 31:1.

18. (a) Uno ukoji nakulemesa tulunga vamakuli vyalifwana ngachilihi? (b) Yehova amwene ngachilihi ukoji?

¹⁸ Mujishimbi jize Kalunga ahanyine Mose jize vakavangijilenga vaIsalele kushikulu, ukoji nakulemesa tulunga vamakuli vyapwilenga mulonga waunene. Mutu uze alingilenga vyuma kana vamujihilenga. (VyavaLevi 20:2, 10) Uno ukoji nakulemesa tulunga vamakuli vyalifwanyine ngachilihi? KaIsalele uze alemeselenga tulunga vamakuli  ahokwelenga lushiko lwenyi lwakupwa wakushishika kuli Yehova. Chochimwe nawa, kaIsalele uze alingilenga ukoji ahokwelenga lushiko lwenyi lwakupwa wakushishika kuli muka-mahyenyi. (Kulovoka 19:5, 6; Lushimbi lwamuchivali 5:9; tangenu Malaki 2:14.) Chikupu vene, Yehova amwene ukoji kupwa mulonga washili waunene.

19. Chuma muka nachitukafwa tuhone kulinga ukoji?

¹⁹ Nyi ngachilihi makumbi ano? Numba tuhu katwakavangiza Jishimbi vahanyine Moseko, oloze nashimbu yino Yehova ahunga ukoji. Kachi nge twalihenda kukulemesa tulunga vamakuli, kaha twatela nawa kupwa vakushishika kuli vaka-mahyetu. (Samu 51:1, 4; Wavaka-Kolose 3:5) Mwomwo kachi nge natulinganga ukoji nakulemesanga tulunga vamakuli, kaha natusolola nge katwavumbika Yehova Kalunga hamwe kaha naulo wetuko.—Talenu Chinyikilo chaKusongo 26.

20. Uno kupwa namangana nachiminganyalisa ngachilihi muulo?

²⁰ Uno munahase kuzamisa ngachilihi ulo wenu? Mazu aKalunga amba ngwawo: “Zuvo veji kuyitunganga mwomwo yamangana, kaha veji kuyizamisanga mwomwo yakunangakana.” (Vishimo 24:3) Zuvo yinahase kupwa yamwaza chipwe yayipi kutwamamo, kaha nawa yinahase kupwa yakukingiwa chipwe chiku. Chochimwe nawa, mutu wamangana eji kukilikitanga nakumona chikupu ngwenyi ulo wenyi uli nakumusuulwisa, wakukingiwa kaha nawa wamwaza.

21. Uno chinyingi chinahase kuzamisa ngachilihi ulo?

²¹ Mbimbiliya yahanjika hazuvo kana ngwayo: “Chinyingi cheji kulingisanga tupete twayo tuzale navikumba vyamwaza, vyandando yayinene.” (Vishimo 24:4) Ngocho vyuma namulinangula muMazu aKalunga vinahase kumilingisa mupwenga vakuwahilila muulo wenu. (Wavaka-Loma  12:2; Wavaka-Fwilipi 1:9) Omu namutanganga Mbimbiliya namikanda yetu, shimutwilenunga omu munahase kuzachisa vyuma namulinangula. Wanenungako jijila jakusolwelangamo muka-mahyenu zangi, nakumuvumbika, nakumutetela nakumwivwishisa. Lombenunga Yehova amikafwe mangana mupwenga navilinga vize navizamisa ulo wenu nakulingisa muka-mahyenu amizange chikuma.—Vishimo 15:16, 17; WaPetulu 1, 1:7.

22. Mwomwo ika twatela kuzanga muka-mahyetu nakumuvumbika?

²² Twatela kukilikita chikuma mangana tuzange muka-mahyetu nakumuvumbika. Kahechi nachitukafwa tuzange chikuma muka-mahyetu nakuzamisa ulo wetu. Kaha chuma chachilemu chikumanyi, natwivwisa Yehova kuwaha.—Samu 147:11; Wavaka-Loma 12:10.