1-3. (a) Uno vatu vavavulu vamona ngachilihi milimo vazata? (b) Vihula muka natushimutwila mukapetulu uno?

VATU vavavulu makumbi ano vali nakuzata nangolo mangana valizakame vavene nakuzakama jitanga javo. Vatu vavavulu kavazanga milimo yavoko, kaha veka nawa kavasaka kuya kumilimo hakumbi hakumbiko. Shikaho nge omu mukiko mweji kwivwanga nayenu, kaha vyuma muka mwatela kulinga mangana mulivwisenga kuwaha kuzata milimo yenu? Munahase kusuuluka ngachilihi namilimo yenu?

² Yehova atulweza ngwenyi: “Vatu vosena vatela kulya nakunwa nakulivwisa kuwaha hamilimo yavo veji kukilikitanga. Chinapu wana wakufuma kuli Kalunga.” (Muka-kwambulula 3:13) Yehova atutenga namuchima wakufwila kuzata milimo. Shikaho asaka tulivwisenga kuwaha kuzata milimo yetu.—Tangenu Muka-kwambulula 2:24; 5:18.

³ Vyuma muka navitukafwa tulivwisenga kuwaha kuzata milimo yetu? Milimo muka yize vaka-Kulishitu kavatela kuzatako? Chuma muka nachitukafwa kuwana lwola lwakuzata milimo yetu oku nawa tuli nakuzachila Yehova? Uno mulimo muka waulemu chikuma uze twatela kuzata?

4, 5. Uno Yehova amona ngachilihi kuzata milimo?

⁴ Yehova azanga kuzata milimo. Chisoneka chaKuputuka 1:1 chamba ngwacho: “Hakuputuka Kalunga atangile melu  namavu.” Kaha omu Kalunga akumishile kutenga mavu navyuma vyosena vyatwamaho ambile ngwenyi: “Vinawahe chikuma.” (Kuputuka 1:31) Tengi yetu asuulukile navyuma atengele ivene.—WaChimoteu 1, 1:11.

⁵ Yehova kecha kuzatako. Yesu ambile ngwenyi: “Tata achili nakuzata lika nakulelo lino.” (Yowano 5:17) Numba tuhu katwatachikiza vyuma vyamwaza vyosena nalinginga Yehovako, oloze twatachikizako vyuma vimwe napunga nakulinga. Napunga nakusakula vatu vaze navakayula hamwe naMwanenyi Yesu Kulishitu muWangana. (Wavaka-Kolinde 2, 5:17) Kaha nawa achili lika nakutwaminyina vatu nakuvazakama. Shikaho kuhichila mumulimo wakwambulula, vatu vavavulu vali nakutachikiza Yehova nakupwa nalutalililo lwakukayoya haya myaka yosena mupalachise hano hamavu.—Yowano 6:44; Wavaka-Loma 6:23.

6, 7. Uno Yesu apwa muka-kuzata wakufwana ngachilihi?

⁶ Yesu nawa azanga kuzata milimo ngana mwaIse. Shimbu kanda Yesu ezenga hano hamavu, apwile “kuluwa muka-kuzata,” mwomwo azachililenga hamwe naIse hakutenga vyuma vyosena vyamwilu nevi vyahano hamavu. (Vishimo 8:22-31; Wavaka-Kolose 1:15-17) Yesu akilikichilenga lika nomu apwilenga hano hamavu. Omu apwile mukweze alinangwile kusonga maliva. Pamo asongelenga vyuma vyamujizuvo nakusoka jizuvo. Kutwala muze, apwile jino kuluwa mumulimo kana, kaha vatu vamutachikijile ngwavo “muka-kusonga maliva.”—Mako 6:3.

⁷ Chipwe ngocho, mulimo wakwambulula mujimbu wamwaza nakunangula vatu vyaYehova, ukiko wapwile waulemu chikuma kuli Yesu. Azachile mulimo kanou waulemu chikuma hamyaka yitatu nachimbwa. Aputukilenga kuzata nachimene palanga nakuufuku. (Luka 21:37, 38; Yowano 3:2) Yesu atambukilenga jitunda jajisuku hamavu mumikwakwa yalukungu nakuya nakwambulila vatu mujimbu wamwaza.—Luka 8:1.

8, 9. Chuma muka chalingishile Yesu alivwise kuwaha kuzata milimo yenyi?

 ⁸ Yesu amwenenga kuzata milimo yaKalunga kupwa nge hikulya chenyi. Milimo kana yamujikijishilenga kushipilitu nakumuhana ngolo. Makumbi amwe, Yesu azachilenga nangolo chikuma, kaha lwola lumwe kahashilenga nakulyako. (Yowano 4:31-38) Azachishilenga lwola lwenyi hakukafwa vatu valinangule vyaIse. Echi chikiko chamulingishile ahanjike kuli Yehova ngwenyi: “Ami ngunakutohwesa lyehi hamavu, hakuwana nge ngunakumisa lyehi mulimo wanguhanyine kuzata.”—Yowano 17:4.

⁹ Chamuchano vene, Yehova naYesu veji kuzatanga nangolo nakusuuluka namilimo yavo. Shikaho twatela ‘kulondezeza Kalunga,’ ‘nakukavangiza kanawa mujitambo jaYesu.’ (Wavaka-Efwesu 5:1; WaPetulu 1, 2:21) Evi vikiko tweji kuzachilanga nangolo jetu josena hakuzata kala milimo.

10, 11. Chuma muka nachitukafwa tuzange milimo twazata?

¹⁰ Hakupwa tuvatu jaYehova, tweji kuzatanga nangolo mangana tuzakame jitanga jetu. Numba tuhu twasaka kulivwisa kuwaha kuzata milimo yetu, oloze chinahase kutukaluhwila kulinga ngocho. Jino vyuma muka twatela kulinga kachi nge katweshi nakulivwisa kuwaha kuzata milimo yetuko?

¹¹ Twatela kuzanga milimo yetu. Lwola lumwe katweshi kuhasa kuya nakuzachila kuchihela cheka chipwe kulitomena seteko yamilimo twatela kuzatako. Olozenyi tunahase kwalumuna vishinganyeka vyetu mangana tumonenga milimo yetu mujila yamwaza. Kutachikiza vyuma asaka Yehova nachitukafwa tuzange milimo twazata. Chakutalilaho, Yehova asaka mutwe watanga azakamenga vakuzuvo yenyi kweseka noho hakumina ngolo jenyi. Kaha nawa Mbimbiliya yamba ngwayo, mutu uze mwahona kuzakama tanga  yenyi “napihi chikuma kuhambakana mutu uze keshi nalufweleloko.” (WaChimoteu 1, 5:8) Kachi nge wapwa umutwe watanga, kaha watela kuzata nangolo mangana uzakame tanga yove. Chamokomoko namilimo mweji kuzatanga, kachi nge namuyizata nangolo nakuzakama tanga yenu kaha namwivwisa Yehova kuwaha.

12. Uno kuzata nangolo nakupwa vakashishi cheji kuminganyalisanga ngachilihi?

¹² Zatenunga nangolo nakupwa vakashishi. Nge namuzata nangolo kaha namulivwisa kuwaha kuzata milimo yenu. (Vishimo 12:24; 22:29) Kaha nawa vakulwane jenu vamilimo navamifwelela chikuma. Vakulwane vamilimo vazanga chikuma vatu vakushishika mwomwo vatachikiza ngwavo kaveshi kwiva jimbongo, chipwe vinoma vyakuzachisa chipwe kwenyeka lwolako. (Wavaka-Efwesu 4:28) Chuma chachinenenyi shina kutachikiza ngwenu Yehova eji kumonanga kukilikita chenu nakushishika chenu. Kutachikiza ngwenu muli nakusuulwisa Kalunga uze mwazanga, nachimilingisa mupwenga “nachivezu chamwaza.”—WavaHepeleu 13:18; Wavaka-Kolose 3:22-24.

13. Vyuma vyeka muka vinahase kusoloka nge natusololanga vilinga vyamwaza kumilimo?

¹³ Tachikizenu ngwenu vilinga vyamwaza namusololanga kumilimo vinahase kutohwesa Yehova. Echi hichuma chikwavo chatela kutulingisa tulivwise kuwaha kuzata milimo yetu. (WaChituse 2:9, 10) Ngocho chakutalilaho chenu chamwaza chinahase kulingisa vakwenu vaka-milimo vafwile kulinangula Mbimbiliya.—Tangenu Vishimo 27:11; WaPetulu 1, 2:12.

14-16. Vyuma muka twatela kushinganyekaho kachi nge tuli nakusakula milimo yakuzata?

¹⁴ Mbimbiliya kayalumbununa milimo yakumujimba yosena twatela kuzata nayize katwatela kuzatako. Oloze yatwama  najindongi jize jinahase kutukafwa tusakule kanawa milimo twatela kuzata. (Vishimo 2:6) Chuma nachitukafwa tukavangize jindongi jamuMbimbiliya shina kulihulisa vihula vinakavangizaho.

¹⁵ Uno kuzata mulimo kana mwaliweza kulinga navyuma vize amona Yehova ngwenyi vyakuhenga tahi? Tunatachikiza jino vyuma vize ahunga Yehova, vyakufwana nge kwiva namakuli. (Kulovoka 20:4; Vilinga 15:29; Wavaka-Efwesu 4:28; Kusoloka 21:8) Ngocho katwatela kwitavila kuzata milimo yize nayitulingisa tulinge vyuma vize  vyalimbalaka najindongi jaYehovako.—Tangenu WaYowano 1, 5:3.

¹⁶ Uno mulimo kana wakundwiza vilinga vize ahunga Yehova tahi? Chakutalilaho, namulinga ngachilihi nge vanamilweze kuzata muchitanda chakulanjisa makanya? Numba tuhu kachapwa chakuhenga kulanjisa vyuma kanako, oloze mwatachikiza omu Yehova amona kunwa makanya. Shikaho numba tuhu nge enu kamweshi kuwanwako, oloze kutala kamweshi nakukundwiza vatu valinge vyuma vize vyeji “kupihisanga mujimba” tahi?—Wavaka-Kolinde 2, 7:1.

17. Chuma muka nachitukafwa tusakule milimo yize nayivwisa Kalunga kuwaha?

¹⁷ Nge natukavangizanga jindongi jaKalunga, kaha natupwa tuvatu vaze vavuluka hali WavaHepeleu 5:14 ngwavo, “vaze vakwechi uhashi wakukekesa vyuma uze valongesa lyehi mwomwo yakuuzachisa mangana vahandunune kwoloka nakuhenga.” Lihulisenu ngwenu: ‘Uno kwitavila milimo kana nachihukanyisa vakwetu tahi? Uno mulimo kana nausakiwa ami kuseza muka-mahyami navana vami nakuya nakuzachila kulifuchi lyeka tahi? Uno nge nangwitavila, kaha ukalu muka navamona?’

18. Chinahase kupwa ngachilihi chachikalu kuzata kanawa milimo yaYehova?

¹⁸ Chinahase kutukaluhwila kuhaka milimo yaYehova kulutwe omu tuli nakuyoyela muno ‘mulwola lwalukalu.’ (WaChimoteu 2, 3:1) Chapwa chachikalu nawa kuwana milimo yakumujimba nakushimbula hamilimo kana. Numba tuhu twatela kuzata mangana tuzakame kanawa jitanga jetu, oloze kulemesa Kalunga chikiko chatela kupwa chachilemu mukuyoya chetu. Katwatela kumonanga vyuma vyamukuyoya kupwa vyavilemu chikumako. (WaChimoteu  1, 6:9, 10) Jino natuhasa kusolola ngachilihi ngwetu tuli ‘nakukekesa tumone vyuma vyavilemu’ oku nawa tuli nakuzakama tanga yetu?—Wavaka-Fwilipi 1:10.

19. Uno kufwelela chikuma Yehova chinahase kutukafwa ngachilihi tuhone kulizakamina chikuma?

¹⁹ Fwelelenu Yehova namuchima wenu wosena. (Tangenu Vishimo 3:5, 6.) Twejiva ngwetu Kalunga atachikiza kanawa vyuma vyasakiwa kuli etu, kaha nawa eji kutuzakamanga. (Samu 37:25; WaPetulu 1, 5:7) Mazu enyi amba ngwawo: “Kutwama chenu chipwenga chakuzeneka kuzanga jimbongo, oku munasuuluka navyuma muli navyo. Mwomwo [Kalunga] nambe ngwenyi: ‘Kangweshi kukakusezako, kangweshi kukakumbilako.’” (WavaHepeleu 13:5) Yehova kasaka tulizakaminenga chikuma mwakuzakamina jitanga jetuko. Hamyaka yayivulu, nasololanga ngwenyi nahase kuhana vatu jenyi vyuma vyasakiwa. (Mateu 6:25-32) Shikaho mweshomwo nachipwa chiyoyelo chetu, natutwalangaho lika kutanganga Mazu aKalunga, nakwambulula mujimbu wamwaza nakupwanga kukukunguluka chavaka-Kulishitu.—Mateu 24:14; WavaHepeleu 10:24, 25.

20. Chuma muka nachitukafwa twashiwiseko chiyoyelo chetu?

²⁰ Talisenu liso lyenu mumwe kaha. (Tangenu Mateu 6:22, 23.) Kutalisa liso mumwe kaha chalumbununa kwashiwisa chiyoyelo chenu mangana muzachile chikuma Yehova. Twatachikiza ngwetu chapwa hiuleya nge natumona jimbongo, nachiyoyelo chauhando namakina vanakusungumuka kupwa vyavilemu kuhambakana usepa wetu naKalunga. Jino chuma muka nachitukafwa tuhakenga vyuma vyavilemu kulutwe mukuyoya chetu? Twatela kuzata nangolo mangana tulihende kumikuli. Kachi nge muli namukuli, kaha kilikitenu mufwete mukuli kana chipwe vene kufwetako chimbwa. Oloze nge katwazangamineko, kaha vyuma vyamukuyoya vinahase kutulila lwola nangolo jetu nakuhona jino kuwana lwola lwakulomba, nakulinangula nakwambulula. Katwatela kwitavila vyuma vyamukuyoya  vikaluhwise chiyoyelo chetuko, oloze twatela kusuulukanga navyuma tuli navyo vyakufwana nge “vyakulya nauvwalo.” (WaChimoteu 1, 6:8) Chamokomoko nomwo chili chiyoyelo chetu, twatela kukekesanga tumone vyuma twatela kulinga mangana tuzachile chikuma Yehova.

21. Mwomwo ika twatela kusakulanga kulinga vyuma vize vyapwa vyavilemu chikuma mukuyoya chetu?

²¹ Litomenenunga kulinga vyuma vyavilemu. Twatela kuzachisanga kanawa lwola lwetu, nangolo jetu navikumba vyetu. Nge katwazangamineko, kaha lwola lwetu  nalukuminanga kuvyuma vyamokomoko vyakufwana nge kutanga shikola chipwe kutonda jimbongo. Yesu ambile ngwenyi: “Tondenunga lika chatete Wangana.” (Mateu 6:33) Vyuma tweji kusakulanga, navijililo, navyuma tweji kulinganga hakumbi hakumbi navyuma twalitomena, vikiko navisolola chuma chize chapwa chachilemu mukuyoya chetu.

22, 23. (a) Mulimo muka waulemu chikuma twatela kuzata etu vaka-Kulishitu? (b) Chuma muka nachitukafwa tulivwise kuwaha kuzata milimo yetu?

²² Mulimo waulemu twatela kuzata shina kuzachila Yehova nakwambulila vatu mujimbu wamwaza. (Mateu 24:14; 28:19, 20) Shikaho twatela kuuzata natwima ngana muze alingile Yesu. Vandumbwetu vamwe veji kuyanga nakuzachila kuze kuli nakusakiwa chikuma vaka-kwambulula. Veka veji kulinangulanga malimi eka mangana vahase kwambulila vaze vahanjika malimi kana. Shimutwilenunga navaze vazataho lyehi milimo kana mangana vamilweze mwakuyizachila. Navamilweza ngwavo vapwa jino vakuwahilila nakusuuluka mukuyoya chavo.—Tangenu Vishimo 10:22.

²³ Etu vavavulu tweji kuzatanga jola jajivulu kumilimo mangana tuwaneko vyakulikafwa navyo natanga yetu. Anukenu ngwenu, Yehova atachikiza chishina kana, kaha nawa eji kwivwanga kuwaha kutumona tuli nakutondela vaka-tanga yetu vyuma vyasakiwa mukuyoya. Shikaho twatela kulondezeza Yehova naYesu mangana kala milimo twazata tuyizatenga namuchima wakusuuluka. Kaha nawa twatela kwanuka ngwetu, kuzachila Yehova nakwambulula mujimbu wamwaza waWangana waKalunga chikiko chachilemu chikuma, mwomwo nachitunehela kuwahilila chamwenemwene.