Kuli vosena vaze vazanga Yehova naMazu enyi, Mbimbiliya:

Yesu ambile ngwenyi: “Namutachikiza muchano, kaha muchano naumilingisa kupwa vakulihehwa.” (Yowano 8:32) Achishinganyekenu omu mwevwile halwola lwatete mwatachikijile muchano wamuMbimbiliya. Mwawahililile chikuma hakutachikiza ngwenu munahase kulinangula muchano mukaye kano kanazale namakuli.—WaChimoteu 2, 3:1.

Yehova Kalunga asaka tutachikize muchano. Kaha nayetu nawa twasaka kulwezako vatu muchano kana mwomwo twavazanga. Chipwe ngocho, kuzachila Kalunga chasakiwa kulinga vyuma vyavivulu. Hakupwa tuvaka-Kulishitu, twatela kuyoya kweseka namwaya jindongi jaYehova mwomwo twajivumbika. Yesu ahanjikile hachuma chachilemu twatela kulinga mangana tusolole ngwetu twazanga Kalunga. Ambile ngwenyi: “Kachi nge namulamanga jishimbi jami, kaha namutwamanga muzangi yami, nganomu ngunalame ami jishimbi jaTata nakutwama muzangi yenyi.”—Yowano 15:10.

Chikupu vene, Yesu azanga Ise, kaha eji kulinganga vyosena vize eji kumulwezanga Ise. Nge natulondezeza Yesu mukuyoya chetu, kaha Yehova mwatuzanga, ngocho natupwa vakuwahilila. Yesu ambile ngwenyi, “kachi nge munatachikiza vyuma kanevi, kaha namuwahilila nge namuvilinganga.”—Yowano 13:17.

Tunafwelela ngwetu mukanda uno naumikafwa muyoye kweseka namuchano wamuMbimbiliya nakupwa jino masepa jaKalunga. Shikaho, tunamilembelela mutwaleho lika kuzanga Kalunga nakutwama lika muzangi yenyi “nakuvandamina kuyoya chahaya myaka yosena.”—WaYuta 21.