1-3. (a) Wana umwe muka wamwaza atuhana Yehova, kaha tunahase kuuzachisa ngachilihi mujila yakuhenga? (b) Mujila muka tunahase kuzachishilamo ou wana wakuhanjika?

ACHISHINGANYEKENU chisemi nahane mwanenyi walunga kinga. Ou chisemi nawahilila chikuma kuhana mwanenyi ou wana waulemu. Uno ngachilihi nge ou mwana mwayitambukisa mujila yayipi nakuhitula mutu nakumukolesa? Uno ou chisemi mwevwa ngachilihi?

² Yehova apwa Muka-kuhana “mawana amwaza osena namawana akukupuka osena.” (WaYakova 1:17) Wana umwe wamwaza atuhana shina uhashi wakuhanjika. Wana kana weji kutukafwanga tuhanjike vyuma tuli nakushinganyeka nomu tuli nakwivwa. Weji kutukafwanga nawa tuhanjike vyuma vize navikafwa vakwetu nakuvevwisa kuwaha. Oloze vyuma natuhanjika vinahase kuhukanyisa vakwetu chipwe kuvevwisa kupihya kumuchima.

³ Mazu tweji kuhanjikanga atwama nangolo, kaha Yehova atulweza mwakuzachishila kanawa wana atuhana wakuhanjika. Atulweza ngwenyi: “Mutunwa twenu kanda namulovoka mazu akupolako, oloze shina aze amwaza kaha, akutunga vakwenu halwola navasakiwa kuvakafwa, mangana ahase kunganyalisa vaka-kwivwilila.” (Wavaka-Efwesu 4:29) Tushimutwilenu jino omu tunahase kuzachishilamo  ou wana atuhana Kalunga mujila yize nayimwivwisa kuwaha nakukolezeza vakwetu.

4, 5. Vyuma muka tunalinangula mumukanda waVishimo kupandama kumazu natuhanjikanga?

⁴ Mazu akwechi ngolo. Shikaho twatela kupwa vakuvanguluka hamazu natuhanjika namujila natuwahanjikilamo. Mukanda waVishimo 15:4 wamba ngwawo: “Lilimi lyalivwovu linapu nge mutondo wakuyoya, oloze kuhanjika chakutangisa cheji kuvijisanga kumuchima.” Ngana muze mutondo wamwaza weji kuhizumunanga nakuhana kuyoya, mukiko nawa namazu amwaza eji kuhizumunanga vaze navawevwilila. Oloze mazu amapi anahase kulemeka vakwetu nakuvevwisa kupihya kumuchima.—Vishimo 18:21.

⁵ Mukanda waVishimo 12:18 wamba ngwawo: “Kuhanjika chakulusuka cheji kutuvanga nge poko yamukwale.” Mazu amapi eji kwivwisanga mutu kukola kumuchima nakulingisa vatu vahone kulivwasana. Pamo munahase kwanuka mazu amapi vamyambile aze amikolele chikuma kumuchima nakumilingisa mupihilile. Oloze mukanda waVishimo wahanjika cheka ngwawo: “Lilimi lyamuka-mangana lyeji kuhindulanga.” Chikupu vene, mazu amwaza anahase kukafwa mutu uze vanakolesa kumuchima nakulingisa vatu vaze vanalimbalaka valivwasane. (Tangenu Vishimo 16:24.) Shikaho nge natwanukanga ngwetu mazu natuhanjika anahase kukolesa vakwetu kumuchima, kaha chinahase kutukafwa tuhanjikenga mazu amwaza.

6. Mwomwo ika shimbu jimwe chapwila chachikalu kupwa nahanjikiso yamwaza?

⁶ Chuma chikwavo chatela kutulingisa tupwenga vakuvanguluka hamazu natuhanjikanga, shina mwomwo tuvosena katwakupukako. Mbimbiliya yamba ngwayo: “Kujina chamumichima yavatu chinapu chachipi.” Mazu tweji  kuhanjikanga eji kusololanga vyuma vili mumichima yetu. (Kuputuka 8:21; Luka 6:45) Shimbu jimwe chinahase kupwa chachikalu kupwa nahanjikiso yamwaza. (Tangenu WaYakova 3:2-4.) Shikaho twatela kuzata nangolo mangana tuhanjikenga mazu amwaza kuli vakwetu.

7, 8. Uno mazu natuhanjika anahase kukwata ngachilihi hausoko wetu naYehova?

⁷ Twatela nawa kupwa vakuvanguluka hamazu natuhanjika mwomwo Yehova mwakatusopesa hamazu natuhanjikanga namujila natuwahanjikilamo. Mukanda WaYakova 1:26 wamba ngwawo: “Kachi nge mutu nalimono ngwenyi apwa muka-kulemesa Kalunga, oloze keshi kukasa lilimi lyenyiko, kaha ali nakutangisa muchima wenyi, kaha nawa kulemesa chenyi chinapu chaufwefwelekete.” Lizu valumuna ngwavo “ufwefwelekete,” linahase kulumbununa nawa ‘chuma chamokomoko.’ (Wavaka-Kolinde 1, 15:17) Shikaho, kachi nge natuhona kupwa vakuvanguluka hamazu natuhanjikanga, kaha tunahase kwenyeka usoko wetu naYehova.—WaYakova 3:8-10.

 ⁸ Chikupu vene, kuli vyuma vize vyatela kutulingisa tufwile kupwa vakuvanguluka hamazu natuhanjikanga namujila natuwahanjikilamo. Shikaho, twatela kutachikiza mazu aze twatela kulihendako, numba tuhase kuzachisa kanawa ou wana atuhana Yehova.

9, 10. (a) Hanjikiso muka yinalisale chikuma mukaye? (b) Mwomwo ika tweji kulihendelanga kuhanjikiso yaunyengwe?

⁹ Makumbi ano, hanjikiso yaunyengwe yinalisale chikuma mukaye. Kaha vatu vavavulu vashinganyeka ngwavo vatela kulishinga chipwe kuzachisa mazu amapi mangana vasolole ngwavo vyuma vali nakuhanjika vyamuchano. Vaka-lyepe veji kuzachisanga mazu akasautu, nakuseseka mujila yayipi mangana vasehese vatu. Oloze kaposetolo Paulu ambile ngwenyi: “Mwatela kuseza vyuma vyosenevi: utenu, namatoto, naupi, nahanjikiso yakasautu, namazu aunyengwe mukanwa kenu.” (Wavaka-Kolose 3:8) Kaha ambile nawa ngwenyi “kuseseka chakasautu” kavatela ‘kuchivulukila muli’ vaka-Kulishitu vamuchanoko.—Wavaka-Efwesu 5:3, 4.

¹⁰ Yehova navatu vaze vamuzanga vahunga hanjikiso yaunyengwe mwomwo hanjikiso kana yapwa yamajilo. MuMbimbiliya, “majilo” vawavulukila “[ha]vilinga vyakumujimba.” (Wavaka-Ngalesha 5:19-21) “Majilo” apwa vilinga vyashili vyakulisezaseza, kaha vilinga kana vyeji kusemanga vilinga vikwavo vyamajilo. Shikaho, nge mutu mwatwalaho lika kuzachisa mazu aunyengwe, kaha vanahase kumufumisa muchikungulwilo.—Wavaka-Kolinde 2, 12:21; Wavaka-Efwesu 4:19; talenu Chinyikilo chaKusongo 23.

11, 12. (a) Uno vyuma natuhanjika hali vakwetu vinahase kutulingisa tulinge ika? (b) Mwomwo ika katwatela kupwa nalusongiko?

¹¹ Twatela nawa kulihenda kukuyongolanga vakwetu. Chapwa chakutamo kuhanjika mijimbu yimwe hali  masepa navausoko wetu. Omu mukiko chapwile nakuli vaka-Kulishitu vamulikulukaji lyamyaka lyakulivanga. Ava vaka-Kulishitu vakulivanga vafwilililenga kutachikiza chiyoyelo chavandumbwavo nakuwana nawa mwakuvakafwila. (Wavaka-Efwesu 6:21, 22; Wavaka-Kolose 4:8, 9) Oloze nge katwazangamineko, kaha vyuma natushimutwila hali vakwetu vinahase kutulingisa tuputuke kuvayongola. Nge natutwalaho lika kuyongolanga vakwetu, kaha chinahase kutulingisa tuhanjike vyuma vize kavyeshi vyamuchanoko chipwe vize vyakusweka. Nge katweshi kuzangamako kaha tunahase kuhanjika navyuma vyamakuli hali vakwetu chipwe kupwa tuvaka-lusongi. VaFwaliseu vapwile vaka-lusongi mwomwo vavangijikilile Yesu. (Mateu 9:32-34; 12:22-24) Lusongi lweji kwenyekanga puho yamutu, nakuneha vikokojola nakujiha usoko.—Vishimo 26:20.

¹² Yehova asaka tuhanjikenga mazu aze nawakafwa nakukolezeza vakwetu keshi kuhanjika vyuma vize navineha vijindoko. Yehova ahunga vaze veji kunehanga “vijindo muli ava vamuwana wakwavo.” (Vishimo 6:16-19) Satana Liyavolo ikiye apwile watete kupwa nalusongi mwomwo avangijikilile Kalunga. (Kusoloka 12:9, 10) Makumbi ano, vatu mukaye vanakuvangijikilanga chikuma vakwavo. Oloze chuma kana kachatela kusoloka muchikungulwilo chavaka-Kulishituko. (Wavaka-Ngalesha 5:19-21) Shikaho twatela kuzangama navyuma natuhanjika nakuvangilanga kushinganyeka shimbu kanda tuhanjike. Shimbu kanda muhanjike mujimbu umwe munevu hali mukwenu, mwatela kulihulisa vihula vino: ‘Uno mujimbu ngunakusaka kwambulula wamuchano tahi? Kutala nachiwaha kuwambulula tahi? Uno mujimbu kana naukafwa vatu tahi? Uno nachiwaha nge mutu kana mwevwa vyuma nanguhanjika hali ikiye tahi? Uno nangwivwa ngachilihi nge mukwetu ikiye mwahanjika vyuma kana hali yami?—Tangenu Wavaka-Tesolonyika 1, 4:11.

13, 14. (a) Uno vatu veji kwivwanga ngachilihi hahanjikiso yakasautu? (b) Kusaula chapwa chika, kaha mwomwo ika vaka-Kulishitu kavatela kusaulanga vakwavoko?

 ¹³ Shimbu jimwe tuvosena tweji kuhanjikanga vyuma vize vinahase kutulingisa tuliveye. Shikaho katwatela kupwa natato yakufwefululanga chipwe kuhanjikanga vyuma vyavipi hali vakwetuko. Katwatela kupwa nahanjikiso yakasautuko. Paulu ambile ngwenyi: “Mbilenu koko yosena, namatoto, nautenu, nakukalwomwoka, nahanjikiso yakasautu.” (Wavaka-Efwesu 4:31) Mazu akwamba ngwavo “hanjikiso yakasautu” vawalumuna mujiMbimbiliya jimwe ngwavo, “mazu amapi,” “hanjikiso yakulemeka,” “hanjikiso yakutukana.” Hanjikiso yakasautu yeji kusaulanga vatu nakuvalingisa valimone kupwa vamokomoko. Mazu amapi eji kulemekanga vana kumuchima, shikaho twatela kuzangama namazu natuhanjikanga kuchina kuvalemeka.—Wavaka-Kolose 3:21.

¹⁴ Mbimbiliya yatuhuhumuna ngwayo katwatela kusaulanga vakwetuko. Kusaula mutu chapwa kumutukana nakumwivwisa kupihya. Shikaho chapwa chachipi mutu kusaula muka-mahyenyi chipwe vana venyi. Mutu uze atwama natato yakusaulanga vakwavo vanahase kumufumisa muchikungulwilo nge mwahona kwalumuka hanyima yakumukafwa kakavulu. (Wavaka-Kolinde 1, 5:11-13; 6:9, 10) Nganomu tunalinangula lyehi, nge natuhanjikanga mazu amapi, namakuli, kaha natujiha usoko wetu naYehova navakwetu vatu.

15. Hanjikiso muka yapwa yakutunga vakwetu?

¹⁵ Uno tunahase kuzachisa ngachilihi wana wakuhanjika mujila yize asaka Yehova? Numba tuhu Mbimbiliya kayatulweza hatoma vyuma twatela kuhanjika navize katwatela kuhanjikako, oloze yatukolezeza tuhanjikenga mazu ‘amwaza kaha, akutunga vakwetu.’ (Wavaka-Efwesu 4:29) Hanjikiso yakutunga vakwetu yapwa yamwenemwene,  yamuchano, kaha nawa yalikoji. Yehova asaka tuhanjikenga mazu akukolezeza vakwetu nakuvajikijisa. Chuma kana chinahase kupwa chachikalu kulinga. Kuhanjika mazu amwaza chasakiwa kukilikita, oloze kuhanjika mazu amapi chapwa chachashi. (WaChituse 2:8) Tushimutwilenu jino hajijila jimwe jize tunahase kukolezezelamo vakwetu muvyuma natuhanjika.

16, 17. (a) Mwomwo ika twatela kusangejekelanga vakwetu? (b) Vatu muka twatela kusangejeka?

¹⁶ Yehova naYesu vapwa vaka-kusangejeka, ngocho nayetu twatela kuvalondezeza. (Mateu 3:17; 25:19-23; Yowano 1:47) Hakusaka tusangejekenga vakwetu mujila yize nayivakolezeza, twatela kuvazanga nakushinganyekanga nawa havyuma vyamwaza veji kulinganga. Mukanda waVishimo 15:23 wamba ngwawo: “Mazu akuhanjika halwola lwakutamo anapu amwaza.” Tweji kwivwanga kuwaha chikuma kachi nge mukwetu mwatusangejeka chipwe kutusakwilila havyuma vyamwaza tunalingi.—Tangenu Mateu 7:12; talenu Chinyikilo chaKusongo 27.

¹⁷ Kachi nge namutalanga havyuma vyamwaza veji kulinganga vakwenu, kaha nachimikafwa muvasangejekenga namuchima wenu wosena. Chakutalilaho, munahase kusangejeka ndumbwenu umwe uze eji kuhanjikanga kanawa vihande chipwe uze eji kukumbululanga kanawa hakukunguluka, chipwe kanyike uze nomika kushikola hakuhakwila vyuma afwelela, chipwe kashinakaji uze eji kwambululanga shimbu yosena. Nge namusangejeka vatu vangana, kaha namuvakolezeza. Chapwa nawa chachilemu lunga kulweza puwenyi ngwenyi amuzanga nakumusakwilila havyuma eji kulinganga. (Vishimo 31:10, 28) Mutondo wasakiwa musana nameya numba ukole kanawa, ngocho navatu veji kwivwanga kuwaha kachi nge navavasakwilila havyuma veji kulinganga. Omu mukiko veji kwivwanga navana nge navavasakwilila. Shikaho mwatela kuwanangako lwola lwakuvasangejekanga havilinga vyavo vyamwaza  nahakukilikita chavo. Echi nachivakafwa vapwenga vakumika nakufwila kutwalaho lika kulinganga vyuma vyakwoloka.

18, 19. Mwomwo ika twatela kufwila kukolezezela vakwetu nakuvavendejekanga, kaha tunahase kulinga ngachilihi ngocho?

¹⁸ Tweji kulondezezanga Yehova hakukolezeza nakuvendejeka vakwetu. Yehova eji kuzakamanga chikuma vaze “vanahombo” navaze “vanayanjiwa.” (Isaya 57:15) Yehova asaka ‘tulikolezezenga navakwetu,’ ‘nakuvendejekanga vatu vaze vanahombo.’ (Wavaka-Tesolonyika 1, 5:11, 14) Kalunga eji kutusakwililanga hakumonomu tweji kukolezezanga vakwetu nakuvavendejeka.

¹⁹ Shimbu jimwe munahase kumona ndumbwetu umwe muchikungulwilo nahombo chipwe ali nakuyanda.  Uno vyuma muka munahase kuhanjika mangana mukolezeze mutu kana? Numba tuhu kamweshi kuhasa kukumisa ukalu wenyiko, oloze mwatela kumufwelelesa ngwenu mwamuzanga. Kaha nawa munahase kuwahisa vyuma mangana mushikame nenyi. Munahase kutanga vesi yimwe yamuMbimbiliya yize nayimukolezeza nakulombela nenyi hamwe. (Samu 34:18; Mateu 10:29-31) Lwezenunga vatu vamuyachou ngwenu, vandumbwavo muchikungulwilo vavazanga chikuma. (Wavaka-Kolinde 1, 12:12-26; WaYakova 5:14, 15) Hanjikenunga mujila yize nayisolola nge vyuma muli nakuhanjika vyamuchano kaha nawa mwavifwelela.—Tangenu Vishimo 12:25.

20, 21. Vyuma muka navilingisa vatu vetavile kuvakafwa?

 ²⁰ Tweji kukolezezanga nawa vakwetu hakuvakafwa mujila yamwaza. Tuvosena twasakiwa kutukafwa mwomwo katwakupukako. Mukanda waVishimo 19:20 wamba ngwawo: “Ivwilila kumazu akukuhuhumuna nakwitavila vakunangule, mangana ukapwe umuka-mangana kulutwe.” Vakulwane keshi vakiko kaha vatwama namulimo wakukafwa nakuhuhumuna vakwavo vaka-Kulishituko. Oloze visemi navakiko vatela kuhuhumuna vana vavo. (Wavaka-Efwesu 6:4) Kaha nawa vandumbwetu vamapwevo vanahase kukafwa vakwavo mujila yamwaza. (WaChituse 2:3-5) Hakuwana nge twazanga vandumbwetu ngocho katwatela kuvakafwa mujila yize nayivevwisa kupihya kumuchimako. Uno vyuma muka navitukafwa tulinge ngocho?

²¹ Pamo munahase kwanuka omu ndumbwenu umwe amikafwile mujila yamwaza yize yamilingishile mwitavile mazu amilwezele. Uno chuma muka chamilingishile mwitavile mazu kana? Pamo mwatachikijile ngwenu ou ndumbwetu amizakama chikuma, nyi pamo ahanjikile nayenu mujila yalikoji nazangi. (Wavaka-Kolose 4:6) Pamo vyuma ahanjikile nenu vyazamine haMbimbiliya. (WaChimoteu 2, 3:16) Kachi nge tuli nakusaka kukafwa mukwetu kaha twatela kuzachisa Mbimbiliya chipwe kuhanjika kaha mazu atwamamo. Katwatela kukafwanga vakwetu kuzachisa vyuma vyamumichima yetu, chipwe kuhingika visoneka mangana chisoloke kwijiva nge Mbimbiliya yili nakukundwiza vishinganyeka vyetuko. Kachi nge namwanuka mujila vamikafwilililemo, kaha nachimilingisa mukafwenga vakwenu mujila yamwaza.

22. Mujila muka namuzachishilamo wana wakuhanjika vamihana?

²² Uhashi wakuhanjika wapwa wana wakufuma kuli Kalunga. Ngocho kuzanga Yehova chatela kutulingisa tuzachisenga kanawa wana kana. Twatela kwanuka ngwetu mazu natuhanjika akwechi ngolo jakutunga vakwetu chipwe kuvalemeka. Shikaho, tuzatenu nangolo mangana tuhanjikenga mazu akujikijisa vakwetu nakuvakolezeza.