1, 2. Mwomwo ika twatela kusakulanga kanawa vyakuhemahema?

ACHISHINGANYEKENU muli nakusaka kulya muhako umwe wamwaza, oloze namumona chihanda chimwe chamuhako kana chinapolo. Jino namulinga ngachilihi? Kutala namwijila kulya muhako kana tahi? Uno namuumbila tahi? Nyi namusemunako kaha chize chihanda chinapolo nakulya jino uze muhako?

² Kuhema chapwa ngana mwamuhako tunavuluka. Kuhema chimwe chapwa chamwaza, oloze kuhema chachivulu cheji kukundwizanga ujila, naulyanyi chipwe vilinga  vyaundemone. Shikaho omu mweji kusakulanga vyakuhemahema, kutala mweji kwambanga ngwenu: “Nangusakula kala kuhema ngunasake ami ivene” tahi? Nyi mweji kwambanga ngwenu: “Kuhema chosena chapwa chachipi”? Kutala mweji kusakulanga kuhema mujila yamwaza nakulihenda kukuhema chachipi tahi?

3. Chuma muka twatela kwanuka nge tuli nakusakula vyakuhemahema?

³ Tuvosena twasaka kulihizumuna nakuhema, kaha nawa twasaka kusakula kuhema chamwaza. Ngocho twatela kulihulisa etu vavene tumone numba nge kuhema chetu chinahase kutuhonesa kulemesa Yehova nyi chiku.

4. Lundongi muka lwamuMbimbiliya luze lunahase kutukafwa tusakule vyakuhemahema?

⁴ Omu tweji kulihananga kuli Yehova, tweji kumushikanga ngwetu natumuzachilanga mukuyoya chetu chosena. (Tangenu Muka-kwambulula 5:4.) Tweji kumushikanga nawa ngwetu natulinganga “vyuma vyosena mujila yize nayimutohwesa.” (Wavaka-Kolinde 1, 10:31) Echi chalumbununa nge kala kwosenokwo tuli, twatela kwanukanga ngwetu twalihana kuli Kalunga. Twatela kulinga ngocho numba tupwa nakunoka chipwe nge tuli nakuhema, keshi nge kukukunguluka chipwe mumulimo wamuwande kahako.

5. Mujila muka twatela kulemeselamo Yehova?

⁵ Vyuma vyosena tweji kulinganga mukuyoya vyakwata hausoko wetu naYehova. Paulu alumbunwine chishina kanechi hakwamba ngwenyi: “Hanenu mijimba yenu kupwa chimuna wakuvatula wamutonyi, wajila, wakwitavila kuli Kalunga.” (Wavaka-Loma 12:1) Yesu nawa ambile ngwenyi: “Zangenunga Yehova Kalunga kenu namichima  yenu yosena, namyono yenu yosena, navishinganyeka vyenu vyosena, nangolo jenu josena.” (Mako 12:30) Lwola lwosena twasaka kuzachila Yehova namichima yetu yosena. VaIsalele vakushikulu vavalwezele vahanenga chimuna wamukangule kupwa wana kuli Yehova. Kalunga akanyinenga chimuna wakatenga. (VyavaLevi 22:18-20) Namakumbi ano nawa, kulemesa chetu chinahase kupwa chamokomoko kuli Yehova. Mujila muka?

6, 7. Uno vyakuhemahema natusakula vinahase kukwata ngachilihi hajila tweji kulemeselangamo Yehova?

⁶ Yehova atulweza ngwenyi: “Pwenunga mwajila mwomwo ami ngwajila.” (WaPetulu 1, 1:14-16; WaPetulu 2, 3:11) Yehova mwetavila kulemesa chetu kuvanga kaha nge nachipwa chajila chipwe chitoma. (Lushimbi lwamuchivali 15:21) Kulemesa chetu kacheshi kuhasa kupwa chitomako kachi nge natulinganga vyuma ahunga Yehova vyakufwana nge vilinga vyaujila, naulyanyi chipwe vize navikundwiza vilinga vyaundemone. (Wavaka-Loma 6:12-14; 8:13) Kaha nawa tunahase kwivwisa Yehova kupihya kachi nge natuhakanga mangana kuvilinga kana nakuvivwila kuwaha. Echi nachilingisa kulemesa chetu chihone kupwa chitoma nakuhona kuchitavila kuli Yehova, ngocho usoko wetu naikiye unahase kulyenyeka.

⁷ Tunahase kusakula ngachilihi vyakuhemahema mujila yamwaza? Kaha jindongi muka najitukafwa tutachikize vyakuhemahema vize etavila Kalunga navize ahunga?

8, 9. Kuhema muka chize tweji kulihendangako, kaha mwomwo ika?

⁸ Makumbi ano, kuli vyakuhemahema vyakulisezaseza. Kuhema chimwe chapwa chize vetavila navaka-Kulishitu, oloze kuhema chachivulu kavachitavilako. Tuvangilenu kushimutwila hali chize twatela kulihendako.

 ⁹ Mijimbu yayivulu yahaInternet nahajitelevijini, nakuhema chajivindiyo namyaso, vyatwama namijimbu yauvumbi, neyi yaulyanyi chipwe yize yeji kukundwizanga vilinga vyaundemone. Vyuma kanevi vyavipi veji kuvisololanga mujila yize nayisoloka nge kavyeshi vyavipiko, kaha nawa vyakwivwisa chiseke. Oloze vaka-Kulishitu veji kulihendanga kukuhema chize chalimbalaka najishimbi jaYehova. (Vilinga 15:28, 29; Wavaka-Kolinde 1, 6:9, 10) Nge natulihendanga kukuhema kana, kaha natusolola kuli Yehova ngwetu twahunga vyuma vyavipi.—Samu 34:14; Wavaka-Loma 12:9.

10. Ukalu muka unahase kufumamo nge katweshi kusakulanga kanawa vyakuhemahemako?

¹⁰ Vatu vamwe veji kushinganyekanga ngwavo, kachapwa chakuhenga kutala vyakuhemahema vize vyakundwiza ulyanyi, naujila chipwe vilinga vyaundemoneko. Veji kwambanga ngwavo: ‘Uno kutala vyuma kana chapihila halihi? Ami kangweshi kukavilingako.’ Nge omu mukiko tweji kushinganyekanga, kaha tuli nakulitangisa etu vavene. Mbimbiliya yamba ngwayo: “Muchima wapwa uka-kutangisa kuhambakana vyuma vyosena, kaha wafwila kulinga cheshocho unasake.” (Yelemiya 17:9) Jino natuhasa ngachilihi kuhanjika ngwetu twahunga kuhema chize ahunga Yehova, kachi nge tweji kwivwanga kuwaha kuchitala? Kachi nge natutalanga kuhema kana lwola lwosena, kaha tunahase kuputuka kuchimona nge kachapwa chachipiko. Mukuhita chalwola, chivezu chetu chinahase kuzeya nakuhona kutuhuhumuna havyuma vimwe vyavipi vize natusaka kulinga.—Samu 119:70; WaChimoteu 1, 4:1, 2.

11. Uno mukanda Wavaka-Ngalesha 6:7 nautukafwa ngachilihi hakusakula vyakuhemahema?

¹¹ Mazu aKalunga atulweza ngwawo: “Vyeshovyo ali nakukuva mutu, vikiko vene mwakaha nawa.” (Wavaka-Ngalesha  6:7) Kuhanjika muchano, nge natutalanga vyuma vyavipi, kaha mukuhita chalwola natukalinga vyuma kana. Chakutalilaho, vatu vamwe vanalinginga ujila mwomwo yakutalanga kuhema chize chakundwiza ujila. Oloze Yehova atukafwa tutachikize mwakusakwila kanawa vyakuhemahema.

12. Chuma muka nachitukafwa tusakulenga kanawa vyakuhemahema?

¹² Kuhema chimwe Yehova kachitavilako, ngocho twatela kulihendako. Nyi ngachilihi kuhema chize kavasoneka muMbimbiliyako? Yehova katuhana mukana wavyuma vize katwatela kutala, nakwivwilila chipwe kutangako. Oloze azanga tuzachise chivezu chetu chize vanangula naMbimbiliya. (Tangenu Wavaka-Ngalesha 6:5.) Yehova atuhana jindongi chipwe ngwetu muchano wamaputukilo uze watunangula tutachikize omu amona vyuma. Eji jindongi jikiko jeji kunangulanga chivezu chetu. Jeji kutukafwanga tutachikize “mwaya muchima waYehova.”—Wavaka-Efwesu 5:17.

13. Mwomwo ika vaka-Kulishitu vazenekela kusakula muyachi woumwe wakuhema, kaha chuma muka chapwa chachilemu kuli vaka-Kulishitu vosena?

¹³ Etu vaka-Kulishitu katwasakula muyachi woumwe wakuhemako. Mwomwo ika? Mwomwo katwasaka vyuma vyovimweko. Kaha nawa vyuma mwasaka mutu umwe keshi vikiko mwasaka namukwavoko. Chipwe ngocho, vaka-Kulishitu vosena vatela kukavangizanga jindongi jamuMbimbiliya numba vasakulenga kanawa vyakulinga. (Wavaka-Fwilipi 1:9) Jindongi kana najitukafwa tusakule kuhema chize etavila Kalunga.—Samu 119:11, 129; WaPetulu 1, 2:16.

14. (a) Chuma muka twatela kwanuka kutalisa kujila tweji kuzachishilangamo lwola lwetu? (b) Mazu muka akuhuhumuna aze Paulu asonekelele vaka-Kulishitu?

 ¹⁴ Chuma chikwavo nawa twatela kwanuka shina lwola natuzachisa kuvyakuhemahema. Lwola natuzachisa kukuhema nalusolola omwo chalema kuhema kuli etu. Hakupwa tuvaka-Kulishitu, twamona kuzachila Yehova kupwa chachilemu chikuma mukuyoya chetu. (Tangenu Mateu 6:33.) Oloze nge katweshi kwanukanga chishina kanako, kaha tunahase kuzachisa lwola lwaluvulu chikuma kuvyakuhemahema. Paulu atukafwa etu vaka-Kulishitu ngwenyi: “Nyingililenu ngwenu kutambuka mweji kutambukanga, kamweshi nakutambuka nge vaka-kuhona manganako, oloze nge vaka-mangana, zachisenunga kanawa lwola lwenu.” (Wavaka-Efwesu 5:15, 16) Shikaho katwatela kwenyekela  chikuma lwola kukuhemako, oloze twatela kuhakanga milimo yaKalunga kulutwe mukuyoya chetu.—Wavaka-Fwilipi 1:10.

15. Uno tweji kulikinganga ngachilihi kukuhema chize chinahase kwenyeka usoko wetu naYehova?

¹⁵ Chikupu vene, twatela kukana kuhema chize ahunga Yehova. Nyi ngachilihi kuhema chize tunahase kuhuhwasana numba nge Kalunga achitavila nyi chiku? Uno twatela kupwa vakuvanguluka lika tahi? Achishinganyekenu hachuma chino. Kachi nge muli nakutambuka mujila yinahichi kungenge yapili, kutala munahase kutambukila kukulo yajila tahi? Nduma. Shikaho nge mwamona kuyoya chenu kupwa chachilemu, kaha munahase kulihenda kuponde. Chochimwe nawa, twatela kuzangama chikuma hakusakula vyakuhemahema. Mazu aKalunga atulweza ngwawo: “Kinga mahinji ove kujijila jajipi.” (Vishimo 4:25-27) Katwalihenda kaha kukuhemahema chize twatachikiza ngwetu chapwa chakuhengako, oloze tweji kulihendanga nakukuhemahema chize tweji kuhuhwasananga ngwetu chinahase kupwa chachipi kuli yetu mwomwo chinahase kwenyeka usoko wetu naYehova.

16. (a) Vyuma muka vize ahunga Yehova? (b) Tunahase kusolola ngachilihi ngwetu twahunga vyuma vize ahunga Yehova?

¹⁶ Muka-kwimba jisamu ambile ngwenyi: “Enu mwazanga Yehova, hungenunga vyuma vyavipi.” (Samu 97:10) Mbimbiliya yatulweza vyuma eji kushinganyekanga Yehova nomwo eji kwivwanga. Shinganyekenu omu vyuma mweji kulinangulanga vinahase kumikafwa mumonenga vyuma ngana muze avimona Yehova. Chakutalilaho, tweji kulinangulanga nge Yehova ahunga “lilimi lyakwonga, namavoko akumwanga manyinga amutu wakuzeneka mulonga, namuchima wakujina vyuma vyavipi, namahinji akwanguhwila kukulinga upi.” (Vishimo 6:16-19) Mbimbiliya yatulweza  ngwayo twatela kulihenda “[ku]ujila, . . . kulemesa makombelo, kupanda, . . . lisungu, matoto, . . . lushiushiu, kupenda, viwanyino vyaliuya, navyuma vyakufwana ngana.” (Wavaka-Ngalesha 5:19-21) Kutala munamono omu jindongi jamuMbimbiliya jinahase kumikafwa musakulenga kanawa vyakuhemahema tahi? Tuvosena twatela kukavangizanga jindongi jaYehova mukuyoya chetu chosena, numba nge tuli navakwetu chipwe nge tuli uka wetu. (Wavaka-Kolinde 2, 3:18) Tachikizenu nawa ngwenu vyuma namulinga kupenge vikiko vyeji kumisololanga omu mwapwa.—Samu 11:4; 16:8.

17. Vihula muka twatela kulihulisa shimbu kanda tusakule vyakuhemahema?

¹⁷ Shimbu kanda musakule vyakuhemahema, lihulisenu ngwenu: ‘Uno vyuma nangusakula kulinga navyenyeka usoko wami naYehova tahi? Uno chivezu chami nachipwa ngachilihi nge nangulinga vyuma kana?’ Tutalenu hajindongi jikwavo jize najitukafwa tusakulenga kanawa vyakuhemahema.

18, 19. (a) Vyuma muka Paulu ahuhumwine vaka-Kulishitu? (b) Jindongi muka twatela kukavangiza hakusakula vyakuhemahema?

¹⁸ Tachikizenu ngwenu, vyakuhemahema namusakula vikiko navipwanga muvishinganyeka vyenu. Paulu asonekele ngwenyi: “Vyeshovyo vyuma vinapu vyamuchano, vyeshovyo vyuma vinapu vyavilemu, vyeshovyo vyuma vinapu vyakwoloka, vyeshovyo vyuma vinapu vitoma, vyeshovyo vyuma navilingisa vatu vavizange, vyeshovyo vyuma vili napuho yamwaza, vyeshovyo vyuma vinapu vyamwenemwene, vyeshovyo vyuma vyakwalisa, shinganyekenunga lika havyuma kanevi.” (Wavaka-Fwilipi 4:8) Shikaho, nge natushinganyekanga havyuma kanevi vyamwaza, kaha tunahase kwamba ngwetu: “Mazu amukanwa kami nakushinganyeka chamumuchima wami vikwivwisenga kuwaha, ove Yehova.”—Samu 19:14.

 ¹⁹ Lihulisenu jino ngwenu: ‘Uno vyuma muka ngweji kutalanga? Hakukumisa kutala mivwimbimbi yimwe chipwe chilika, kutala ngweji kushinganyekanga havyuma vyamwaza tahi? Kutala ngweji kupwanga nachivezu chamwaza tahi, nyi chiku? (Wavaka-Efwesu 5:5; WaChimoteu 1, 1:5, 19) Kutala ngweji kusuulukanga kulomba kuli Yehova tahi, nyi cheji kungukaluhwilanga? Uno vyakuhemahema ngweji kutalanga vyeji kungulingisanga ngushinganyeke havyuma vyaulyanyi naujila tahi? (Mateu 12:33; Mako 7:20-23) Uno vyakuhemahema ngweji kusakulanga, vyeji kulingisanga “katwamino kamyaka yino” kangwalumune tahi?’ (Wavaka-Loma 12:2) Jila natukumbulwilamo vihula kana nayitukafwa tumone vyuma twatela kulinga mangana tuzamise usoko wetu naYehova. Twatela kulomba ngana muze alombele muka-kwimba jisamu ngwenyi: “Talisa meso ami kweka mangana nguzeneke kutala vyuma vyamokomoko.” *—Samu 119:37.

20, 21. Mwomwo ika twatela kushinganyekelako vakwetu hakusakula kuhema chimwe?

²⁰ Lundongi lukwavo lwalulemu twatela kukavangiza shina elu: “Vyuma vyosena vavitavisa mujishimbi, oloze keshi vyosena vika-kutungako. Mutu himutu kanda mwasakanga kulinganyalisa iveneko, oloze anganyalisenga vakwavo.” (Wavaka-Kolinde 1, 10:23, 24) Shikaho, kupwa nalisesa lyakulinga vyuma vimwe kachalumbununa nge kuvanga tuvilingeko. Twatela kushinganyeka kanawa havyuma natusakula kulinga mangana tuwane numba nge vinahase kuhukanyisa vandumbwetu nyi chiku.

 ²¹ Tachikizenu ngwenu katwatwama navivezu vyakulifwanako. Chakutalilaho, namulinga ngachilihi nge chivezu chenu chinamitavisa kutala polongalamu yimwe hachisaji chamivwimbimbi, oloze hinamwanuka ngwenu vivezu vyavandumbwenu vamwe kavyavetavisa kutala polangalamu kanako? Numba tuhu mukwechi lisesa lyakutala polongalamu kana, oloze munahase kulitwamina kuyitala. Mwomwo ika? Mwomwo kamweshi nakusaka kulinga “shili kuli vandumbwenu” chipwe ‘kulinga shili kuli Kulishituko.’ (Wavaka-Kolinde 1, 8:12) Katwatela kulinga vyuma vize navihukanyisa vandumbwetuko.—Wavaka-Loma 14:1; 15:1; Wavaka-Kolinde 1, 10:32.

22. Natusolola ngachilihi ngwetu tweji kushinganyekelangako vandumbwetu hakusakula vyakulinga?

²² Vyuma muka namulinga kachi nge chivezu chenu kachamitavishile kutala, chipwe kutanga chipwe kulinga vyuma vimwe vize vamona vakwenu kupwa vyakwoloka? Hakuwana nge mwazanga vandumbwenu nakuvavumbika, ngocho kamweshi kuvashinyinyika vasakule vyuma vize mwasaka enuko. Nyamutekenya ejiva ngwenyi, vakwavo vamwe veji kulahisanga chikuma minyau kuhambakana ikiye, kaha veka veji kutambukisanga chindende. Oloze vosena vapwa vaka-kutambukisa kanawa. Chochimwe nawa, yenu navandumbwetu veka munahase kukavangiza jindongi jamuMbimbiliya, oloze namusakula vyakuhemahema vyakulihandununa.—Muka-kwambulula 7:16; Wavaka-Fwilipi 4:5.

23. Chuma muka nachitukafwa tusakule kanawa vyakuhemahema?

²³ Chuma muka nachitukafwa tusakule kanawa vyakuhemahema? Nge natukavangiza kanawa chivezu chetu chize vanangula najindongi jamuMbimbiliya, nakuzakama nawa vivezu vyavandumbwetu, kaha nachitukafwa tusakule kanawa vyakuhemahema. Ngocho natupwa vakuwahilila hakutachikiza ngwetu tuli nakulinga “vyuma vyosena mujila yize nayimutohwesa Kalunga.”