1, 2. Vyuma muka twatela kutachikiza hali Satana navandemone jenyi?

CHIYOYELO nachikawaha chikuma mukaye kakahya, kaha natukayoya mujila yize Kalunga asakile tuyoyenga. Oloze oholyapwa tunakuyoyela mukaye kaze vanakuyula kuli Satana navandemone jenyi. (Wavaka-Kolinde 2, 4:4) Numba tuhu katweshi kuhasa kumona Satana navandemone jenyiko, oloze twatachikiza ngwetu kuvatwama, kaha nawa vatwama nangolo chikuma.

² Mukapetulu uno, natushimutwila vyuma vize navitukafwa tupandame lika kuli Yehova nakumwimanyina Satana nakole. Numba tuhu Yehova atufwelelesa ngwenyi mwatukafwanga, oloze twatela kutachikiza tufuta eji kuzachisanga Satana navandemone jenyi hakusaka kutwonga nakutuhungumwisa.

3. Vyuma muka Liyavolo asaka kulinga kuli yetu?

³ Satana eji kutuvangijikilanga ngwenyi tweji kulemesanga Yehova mwomwo yavyuma eji kutuhananga, kaha amba nawa ngwenyi tunahase kulitwamina kumuzachila kachi nge natumona ukalu. (Tangenu Yopa 2:4, 5.) Satana navandemone jenyi veji kufwilanga kuhonesa kala mutu uze mwasaka kulinangula vyaYehova. Kaha nawa veji kwivwanga kupihya chikuma kachi nge vanamono mutu nalihane kuli Yehova nakumumbapachisa. Ngocho,  Mbimbiliya yamba ngwayo, Liyavolo eji kuhitangananga nge “ndumba wakutahwoka, nakutondatonda weshowo mwawana amulye.” (WaPetulu 1, 5:8) Chikupu vene, Satana asaka kwenyeka usoko wetu naYehova.—Samu 7:1, 2; WaChimoteu 2, 3:12.

4, 5. (a) Vyuma muka vize Satana keshi kuhasa kulingako? (b) Uno ‘kwimanyina Liyavolo nakole’ chalumbununa ika?

⁴ Chipwe ngocho, etu katwatela kwivwa woma Satana navandemone jenyiko, mwomwo Yehova keshi kuvechelela vatweseke kuhambakana hakumina ngolo jetuko. Yehova atufwelelesa ngwenyi, “liyongomena lyalinene” lyavaka-Kulishitu  vamuchano nalikayovoka ‘haluyando lwalunene.’ (Kusoloka 7:9, 14) Shikaho, Liyavolo keshi kuhasa kuhonesa chuma kanako mwomwo Yehova ali nakukinga vatu jenyi.

⁵ Satana keshi kuhasa kwenyeka usoko wetu naYehovako kachi nge natupandama lika kuli Yehova. Mazu aKalunga atufwelelesa ngwawo: “Yehova mwapwanga nayenu kachi nge nayenu nawa namupwanga lika naikiye.” (Mijimbu 2, 15:2; tangenu Wavaka-Kolinde 1, 10:13.) Malunga namapwevo vakushishika vakufwana nge Avele, naEnoke, naNowa, naSala naMose vemanyinyine Liyavolo nakole hakupendamina chikuma hali Yehova. (WavaHepeleu 11:4-40) Kaha omu mukiko twatela kulinga nayetu. Mazu aKalunga atulweza ngwawo: “Mwimanyinenu Liyavolo nakole, kaha mwamichina.”—WaYakova 4:7.

6. Uno Satana eji kutwesekanga ngachilihi?

⁶ Numba tuhu Satana atachikiza ngwenyi Yehova keshi kumwechelela atweseke mukala jila nasakeko, oloze afwila kuzachisa jijila jakulisezaseza mangana enyeke usoko wetu naYehova. Makumbi ano, Liyavolo eji kutwesekanga mujijila jakulisezaseza kuzachisa tufuta tuze nazachisanga hamyaka yayivulu chikuma. Uno tufuta muka vene etu?

7. Mwomwo ika Satana ali nakwesekela vatu jaYehova?

⁷ Kaposetolo Yowano ambile ngwenyi: “Kaye kosena katwama mumavoko ayauze wakuhuka.” (WaYowano 1, 5:19) Kano kaye kakuhuka vali nakukayula kuli Satana, kaha afwila nakuyula vatu jaYehova. (Mika 4:1; Yowano 15:19; Kusoloka 12:12, 17) Liyavolo ali nakuzata chikuma nangolo mangana atuhonese kuzachila Kalunga mwomwo natachikiza ngwenyi ali nakashimbu kakandende kaha. Shimbu jimwe, Liyavolo eji kuzachisanga vyeseko vize natumona, oloze shimbu jikwavo nawa eji kutwesekanga mukuswama.

8. Vyuma muka vatela kutachikiza vaka-Kulishitu vosena?

 ⁸ Mukanda Wavaka-Efwesu 6:12 wamba ngwawo, tuli “nakulipika [“nakulwa” kwinyikila chamwishi] . . . namazavu avashipilitu vakuhuka vaze vali muvihela vyamwilu.” Ngocho vaka-Kulishitu vosena vali nakulwa jita naLiyavolo hamwe kaha navandemone jenyi. Shikaho twatela kutachikiza ngwetu, vatu vosena vaze veji kulihananga kuli Yehova veji kulwanga jita kaneyi. Echi chikiko chalingishile kaposetolo Paulu ahanjike mapapa katatu mumukanda asonekelele vaka-Efwesu ngwenyi, “imanenu mbe.”—Wavaka-Efwesu 6:11, 13, 14.

9. Uno Satana navandemone jenyi vafwila kulinga vyuma muka kuli yetu?

⁹ Satana navandemone jenyi vasaka kutuhungumwisa mujijila jakulisezaseza. Ngocho nge tunomika mucheseko chimwe, kachalumbununa nge tunahase kumika namucheseko chikwavoko. Ngocho Liyavolo navandemone jenyi veji kutondanga haze twazeyela mangana vatunehele cheseko chize chinahase kutwoza. Shikaho hakuwana nge Mbimbiliya yatulweza tufuta twaLiyavolo, ngocho keshi kuhasa kutwozako. (Wavaka-Kolinde 2, 2:11; talenu Chinyikilo chaKusongo 31.) Kafuta kamwe eji kuzachisanga shina kupanda.

10. (a) Kupanda chapwa chika? (b) Uno Yehova amona ngachilihi kupanda?

¹⁰ Kupanda chapwa kulinga kala vyuma vyakukomwesa vize navilingisa vatu valivwasane navandemone. Vyuma vimwe shina kulweza vyuma vyakulutwe, nauloji, nakuhelama, chipwe kuhanjika navafu. Mbimbiliya yahanjika ngwayo kupanda chapwa chuma ‘chaunyengwe’, shikaho katweshi kuhasa kulemesa Kalunga oku tunapandeko. (Lushimbi lwamuchivali 18:10-12; Kusoloka 21:8) Ngocho  vaka-Kulishitu vosena vatela kulihenda kukala vyuma vize vyakundwiza kupanda.—Wavaka-Loma 12:9.

11. Uno kufwila kutachikiza vyuma vyakukomwesa vyaundemone nachitulingisa tulinge vyuma muka?

¹¹ Satana atachikiza ngwenyi kachi nge mwazachisa vyuma vyakukomowesa vyaundemone, kaha nachipwa chachashi kutuhungumwisa tufwile vyuma vyakupanda. Shikaho twatela kutachikiza ngwetu kachi nge natukundwiza kala vyuma vyakupanda, kaha usoko wetu naYehova naufwa.

12. Uno Satana nahase kuluwanganyisa ngachilihi vishinganyeka vyetu?

¹² Satana afwila kuluwanganyisa vishinganyeka vyavatu. Eji kulingisanga vatu vahuhwasane palanga nomu mwavalingisa vaputuke kumona ‘vyuma vyamwaza ngwavo vyavipi, kaha vyuma vyavipi ngwavo vyamwaza.’ (Isaya 5:20) Liyavolo afwila kulingisa vatu vamone ngwavo, jindongi jamuMbimbiliya kajeshi kuhasa kuvakafwako, nakumona nawa ngwavo navapwa vakuwahilila mukuyoya chavo, kachi nge navahona kukavangiza jishimbi jaKalunga.

13. Satana asakile kulingisa veya vahuhwasane, kaha mujila muka?

¹³ Satana asaka kutulingisa tuhuhwasane, kaha nazachisanga jila kana putu vene kushikulu. Alingishile Eve ahuhwasane omu amuhulishile mumilemba yaEtene ngwenyi: “Uno Kalunga nambe chikupu ngwenyi kamwatela kulya kumitondo yoseneyi yili mumilembako nyi?” (Kuputuka 3:1) Mumakumbi aYopa nawa, Satana ahulishile Yehova hameso avangelo ngwenyi: “Unamono ngwove Yopa akwivwa ove Kalunga woma wanganavene tahi?” (Yopa 1:9) Omu nawa valingile Yesu vanamumbapachisa lyehi, Satana esekele Yesu hakumwamba ngwenyi: “Kachi nge umwanaKalunga, amba malolwa awa alumuke kupwa mbolo.”—Mateu 4:3.

14. Uno Satana eji kulingisanga ngachilihi vatu vamone kupanda kupwa chamwaza?

 ¹⁴ Namakumbi ano nawa, Liyavolo ali nakuzachisa muheto kana. Ali nakulingisa vatu vamone ngwavo kupanda chapwa chamwaza mwomwo yavyuma eji kulinganga vize vyasolola nge kupanda kachapihyako. Chaluvinda, nalingisa navaka-Kulishitu vamwe vahone kumona ponde yatwama mukupanda. (Wavaka-Kolinde 2, 11:3) Uno natuhasa kulikinga ngachilihi kumuheto kana? Vyuma muka twatela kulinga numba Satana ahone kutuhungumwisa? Tushimutwilenu hajijila jivali jize Satana nahase kutuhungumwishilamo. Jijila kana shina: Vyakulihizumuna najijila jakutukilamo kumisongo.

15. Vyakulihizumuna natusakula vinahase kutulingisa ngachilihi twazane muvilinga vyaundemone?

¹⁵ Makumbi ano, vilinga vyaundemone vali nakuvisololanga chikuma mujivindiyo, nahavisaji vyamivwimbimbi, namuvyakuhemahema chahajikopyuta nahaInternet. Vatu vavavulu vamona vyuma kana kupwa vyamwaza, kahechi cheji kuvalingisanga vahone kumona ponde yatwama hakulikata navandemone. Liyavolo eji kulingisanga vatu vahone kumona ponde yatwama hakulinga vyuma kana, nakuvalingisa vamone vyuma kana kupwa vyakukomwesa, kaha nawa vyamwaza chikuma chipwe kuvimona nge viseke kaha. Mutu nahase kushinganyeka ngwenyi kutala vyuma vyaundemone kachatwama napondeko chikalu kaha nge mwahona kwazana muvyuma kana. Mwomwo ika vishinganyeka kana vyapwila vyakuhenga?—Wavaka-Kolinde 1, 10:12.

16. Mwomwo ika twatela kulihendela kuvyakulihizumuna vize vyakundwiza vandemone?

¹⁶ Satana navandemone jenyi kaveshi kuhasa kumona  vyuma tweji kushinganyekangako. Oloze veji kutachikizanga vyuma twafwila navyuma tweji kushinganyekanga hakutala vyakulihizumuna tweji kusakulanga. Shikaho kachi nge natusakula jivindiyo, namyaso namikanda vize vyahanjika havisava, nahauloji, nahamisalu nahavyuma vyeka vyakufwana ngana, kaha Satana navandemone jenyi navamona ngwavo tuli nakusaka kulikata navo. Kaha vanahase kutulingisa tukundwize chikuma vilinga vyakupanda.—Tangenu Wavaka-Ngalesha 6:7.

17. Uno Satana nahase kuzachisa ngachilihi jijila jakutukilamo mangana atuhungumwise?

¹⁷ Satana nahase nawa kuzachisa jijila jakutukilamo misongo mangana atuhungumwise. Makumbi ano vatu  vanakuvizanga chikuma. Kaha mutu nahase kuzachisa jijila jajivulu jakumukilamo kumusongo wenyi, oloze musongo kukuma chauchi. (Mako 5:25, 26) Ngocho nahase kwitavila kala jila yakumukilamo kumusongo wenyi. Oloze etu vaka-Kulishitu twatela kuzangama chikuma mangana tuhonenga kusakula vitumbo vize vyazata “[na]visava.”—Isaya 1:13.

18. Jila muka yakukilamo misongo yize atela kukana muka-Kulishitu?

¹⁸ MuIsalele mwapwilenga vatu vamwe vaze valingilenga “visava.” Kaha Yehova avalwezele ngwenyi: “Omu mweji kwololanga mavoko enu, ami ngweji kufwikanga kumeso ami. Numba tuhu namulomba mapapa kakavulu, kangweshi kumivwililako.” (Isaya 1:15) Achishinganyekenu hachuma kana, Yehova kevwililile kukulomba chavoko. Katwatela kulinga vyuma vize navyenyeka usoko wetu naYehova chipwe kulingisa Yehova ahone kutukafwa chikumanyi nge tuli muukaluko. (Samu 41:3) Shikaho twatela kukekesa kanawa tumone numba nge jila natusakula kutukilamo yakundwiza vandemone nyi chiku. (Mateu 6:13) Kachi nge natuwana ngwetu, jila kana yakundwiza vandemone, kaha katwatela kuyitavilako.—Talenu Chinyikilo chaKusongo 32.

19. Uno Liyavolo nalingisa ngachilihi vatu vamwivwe woma?

¹⁹ Vatu vamwe vashinganyeka ngwavo Liyavolo navandemone jenyi kavatwamako, oloze veka nawa vetavila ngwavo kuvatwama mwomwo yavyuma vanamono mukuyoya chavo. Vatu vavavulu veji kwivwanga woma Satana navandemone jenyi, kaha vatwama muundungo wavyuma kana. Vatu veji kwivwisanga vakwavo woma hakwambulula mijimbu yavyuma vyakuhuka veji kulinganga vandemone kuli vatu. Kakavulu vatu veji kwivwanga kuwaha chikuma hamijimbu kana, kahechi cheji kuvalingisanga valwezeko vakwavo. Mijimbu kana yeji kulingisanga vatu vevwenga woma Liyavolo.

20. Uno tunahase kutanjisa ngachilihi mijimbu yaSatana yakwivwisa woma?

 ²⁰ Mwatela kutachikiza ngwenu Satana asaka vatu vamwivwenga woma. (Wavaka-Tesolonyika 2, 2:9, 10) Apwa muka-kwonga uze atachikiza mwakuluwanganyishila vishinganyeka vyavaze vafwelela mukupanda mangana vafwelele vyuma vize kavyapwa vyamuchanoko. Vatu kana veji kwambululanga mijimbu yavyuma vize vanashinganyeka ngwavo vanavimono chipwe vize vanevu. Kaha hakuwana nge veji kutwalangaho lika kwambulula mijimbu kana, ngocho veji kulingisanga vatu vaputuke kukakisa vyuma kana. Katwatela kukafwa Satana kutandakanyisa mijimbu kanako.—Yowano 8:44; WaChimoteu 2, 2:16.

21. Vyuma muka twatela kushimutwilanga navize katwatela kushimutwilangako?

²¹ Kachi nge ngamba yaYehova umwe namono vyuma vyaundemone, kaha katela kuvitandakanyisako. Vatu jaYehova kavatela kwivwa woma wavyuma eji kulinganga Liyavolo navandemone jenyiko. Oloze twatela kushishika hali Yesu mwomwo vamuhana ngolo kuli Yehova. (WavaHepeleu 12:2) Yesu kalwezelenga tumbaji tweji vyuma vyavandemoneko. Oloze ashishikile kaha “[ha]vyuma vyaukelenga waKalunga” nahakwambulula mujimbu waWangana.—Vilinga 2:11; Luka 8:1; Wavaka-Loma 1:11, 12.

22. Vyuma muka muli nakufwila kulinga?

²² Shimbu yosena twatela kwanukanga ngwetu Satana afwila kujiha usoko wetu naYehova. Shikaho mwazachisanga jijila jakulisezaseza mangana ajihe usoko wetu naYehova. Oloze twatachikiza tufuta twaLiyavolo, kaha tuli nakufwila kulihenda kukala vyuma vize vyakundwiza kupanda. Shikaho katwatela “kusela Liyavolo kengililo” mangana atuhoneseko. (Tangenu Wavaka-Efwesu 4:27.) Chikupu vene, kachi nge natwimanyina Liyavolo nakole, kaha katweshi kufwa mumiheto yenyiko, kaha nawa Yehova mwatukinganga.—Wavaka-Efwesu 6:11.