1, 2. (a) Iya atela kututwaminyina? (b) Vihula muka natushimutwila mukapetulu uno?

OMU mwapwile muvanyike, visemi jenu vamilwezelenga lwola lumwe kulinga vyuma vize kamwasakile kulingako. Olozenyi, mwazangile visemi jenu nakufwila kuvononoka. Chipwe ngocho, pamo kamwachiwanyinenga kupwa chachashi kuvononoka shimbu yosenako.

² Twatachikiza ngwetu Setu Yehova atuzanga. Eji kutuzakamanga nakutuhana vyuma vyosena vyasakiwa mangana tulivwise kuwaha kuyoya. Eji kutulwezanga vyuma twatela kulinga mangana tuyoye mujila yize nayimwivwisa kuwaha. Shimbu jimwe eji kuzachisanga vakwetu mangana vatutwaminyine. Twatela kuvumbika wata waYehova. (Vishimo 24:21) Mwomwo ika chapwila chachikalu shimbu jimwe kwitavila vyuma vize navatulweza kulinga? Mwomwo ika Yehova asaka tukavangize vyuma atulweza kulinga? Vyuma muka navisolola nge twavumbika wata wenyi?—Talenu Chinyikilo chaKusongo 9.

3, 4. Uno chuma muka chalingishile vatu vahone kupwa kukupuka, kaha mwomwo ika chapwila chachikalu kwitavila vakwetu vatutwaminyine?

³ Etu vatu twatwama natato yakusaka kulikanga. Omu  mukiko chinapunga kufuma vene halwola luze vaAlama naEve valingile shili. Numba tuhu vapwile vatu vakukupuka, oloze valikangile kuwata waKalunga. Kufuma vene halwola luze vatu vosena kavapwa vakukupukako. Chuma chimwe cheji kutulingisanga tuchiwane kupwa chachikalu kwitavila vyuma mwatulweza Yehova navakwetu vatu, shina mwomwo yakuhona kukupuka. Chuma chikwavo shina vatu vaze eji kuzachisanga Yehova vatutwaminyine kavakupukako ngana mwayetu.—Kuputuka 2:15-17; 3:1-7; Samu 51:5; Wavaka-Loma 5:12.

⁴ Kuhona kukupuka cheji kutulingisanga tulivwimbe. Kaha kulivwimba cheji kutulingisanga tuhone kwitavila vakwetu vatutwaminyine. Chakutalilaho, kushikulu Yehova asakwile Mose atwaminyine vaIsalele. Oloze Kola uze azachililenga Yehova hamyaka yayivulu, alivwimbile chikuma nakuhona kuvumbika Mose. Numba tuhu Mose vamusakwile atwaminyine vatu jaKalunga, oloze ikiye kalivwimbileko. Mose vamuvuluka kupwa mutu wakulinyisa chikuma havatu vayoyelenga halwola luze. Oloze Kola ketavilile kumutwaminyina kuli Moseko. Kaha nawa akunywile vakwavo mangana navakiko valikange kuli Mose. Chuma muka chasolokele kuli Kola navakwavo vaze valikangile? Vavajihile. (Kulava 12:3; 16:1-3, 31-35) MuMbimbiliya mwatwama mijimbu yayivulu yize yasolola hatoma ngwayo kulivwimba cheji kunehanga ponde.—Mijimbu 2, 26:16-21; talenu Chinyikilo chaKusongo 10.

5. Vatu vamwe vanazachisanga ngachilihi ngolo javo mujila yakuhenga?

⁵ Kufuma vene kushikulu, vatu vavavulu vanazachisanga ngolo javo mujila yakuhenga. (Tangenu Muka-kwambulula 8:9.) Chakutalilaho, Saulu apwile mutu wamwaza, wakulinyisa omu Yehova amusakwile kupwa mwangana wavaIsalele. Oloze aputukile kulivwimba  nakwivwila lwiso Ndavichi, kaha aputukile kumuyanjisa chakuhona mulonga. (Samwele 1, 9:20, 21; 10:20-22; 18:7-11) Mukuhita chamyaka, Ndavichi vamusakwile kupwa mwangana, kaha apwile mwangana wamuchima wamwaza havamyangana vosena vayulile muIsalele. Kutwala muze, Ndavichi naikiye azachishile ngolo jenyi mujila yakuhenga. Alingile ukoji naMbate-sheva pwevo lyaUliya, kufumaho himwasweka shili alingile hakutuma Uliya mangana vakamujihe kujita.—Samwele 2, 11:1-17.

6, 7. (a) Chuma muka twatela kulinga chize nachisolola nge twazanga Yehova? (b) Vyuma muka navitukafwa twononoke Yehova numba tuhu shimbu jimwe chachikalu kulinga ngocho?

⁶ Hakuwana nge twazanga Yehova, shikaho twatela kumwitavila atutwaminyine. Twafwila kumwivwisa kuwaha mwomwo twamuzanga chikuma kuhambakana vyuma vyosena. (Tangenu Vishimo 27:11; Mako 12:29, 30.) Kufuma vene halwola luze vaAlama naEve vapwile mumilemba yaEtene, Satana nafwilanga kuhungumwisa vatu valikange kuwata waYehova. Liyavolo asaka etu tushinganyeke ngwetu Yehova katwama nangolo jakutulweza vyuma twatela kulingako. Oloze vishinganyeka kana vyakuhenga. Twetavila mazu akwamba ngwavo: “Ove Yehova Kalunga ketu, ove watamo kutambula upahu nakavumbi nangolo, mwomwo ove yove watangile vyuma vyosena.”—Kusoloka 4:11.

⁷ Omu mwapwile muvanyike, mwononokelenga visemi jenu numba tuhu kamwazangile kulinga vyuma vize vamilwezelengako. Chochimwe nayetu vangamba jaYehova, shimbu jimwe chinahase kutukaluhwila kupwa vakwononoka. Twazanga Yehova nakumuvumbika, ngocho  twatela kumwononoka. Yesu atusela chakutalilaho chamwaza. Atwalileho lika kwononoka Yehova numba tuhu shimbu jimwe chapwilenga chachikalu kulinga ngocho. Shikaho ahanjikilile kuli Ise ngwenyi: “Kanda ulinga munayi muchima wamiko, shina omu munayi muchima wove.”—Luka 22:42; talenu Chinyikilo chaKusongo 11.

8. Jijila muka eji kuzachisanga Yehova hakututwaminyina? (Talenu lipwata lyakwamba ngwavo “ Ivwililenunga kuVyuma Navamihuhumuna.”)

⁸ Makumbi ano, Yehova ali nakututwaminyina kuzachisa jijila jakulisezaseza. Chakutalilaho, natuhane Mbimbiliya navakulwane muchikungulwilo. Nge natwononoka vaze ali nakuzachisa Yehova hakututwaminyina, kaha nachisola nge twavumbika wata wenyi. Nge natukana vyuma vali nakutulweza, kaha nachisolola nge tuli nakukana Yehova. Omu vaIsalele vakanyine vyuma avalwezele Mose, Yehova evwile kupihya chikuma. Yehova amwene chikupu ngwenyi vamukanyine ikiye.—Kulava 14:26, 27; talenu Chinyikilo chaKusongo 12.

9. Uno zangi yeji kutukafwanga ngachilihi tukavangize vyuma navatulweza?

⁹ Kuvumbika wata waYehova chasolola nge twazanga vandumbwetu vosena. Chakutalilaho, nge kunasoloka ponde yakulijila, kweji kupwanga lizavu lyavatu vaze navazachila hamwe mangana vayovole vakwavo vali muponde. Oloze hakusaka eli lizavu lizate kanawa, kwatela kupwa mutu umwe uze mwavatwaminyina. Kaha mutu himutu wamuze mulizavu atela kutambula jindongi jize navamulweza kukavangiza. Jino nachipwa ngachilihi nge mutu umwe mwakana vyuma navamulweza nakulinga vyuma vize nasake ivene? Numba tuhu vishinganyeka vyenyi vyakwoloka, oloze nahase kunehela vakwavo ukalu nakuvengisa muponde. Chochimwe nayetu nawa,  nge natukana kututwaminyina kuli Yehova nakuhona kukavangiza vyuma navatulweza vatu vaze ali nakuzachisa, kaha chinahase kulingisa vakwetu vengile muukalu. Oloze nge natwononoka Yehova, kaha nachisolola nge twazanga vandumbwetu nakuvumbika vyuma alongesa Yehova.—Wavaka-Kolinde 1, 12:14, 25, 26.

10, 11. Vyuma muka natushimutwila?

¹⁰ Vyuma eji kutulwezanga Yehova tulinge vyeji kutunganyalisanga. Nge natuvumbika wata ahakako Yehova mutanga, namuchikungulwilo nomu tunahase kuliluula kuvilolo jafulumende, kaha tuvosena natunganyala.—Lushimbi lwamuchivali 5:16; Wavaka-Loma 13:4; Wavaka-Efwesu 6:2, 3; WavaHepeleu 13:17.

¹¹ Kutachikiza ovyo Yehova asakila etu tuvumbike vakwetu nachitukafwa twononoke kuwata ahakako Yehova. Tushimutwilenu jino hajijila jitatu natuhasa kusolwelamo kavumbi.

12. Lunga nahase kusolola ngachilihi ngwenyi avumbika wata ahakako Yehova mutanga?

¹² Yehova ikiye ahakileko tanga, kaha mutu himutu mutanga vamuhana mulimo wakuzata. Kachi nge mutu himutu mutanga mwatachikiza mulimo amuhana Yehova, kaha vyuma vyosena navitambuka kanawa mutanga nakutwama mukuunda. (Wavaka-Kolinde 1, 14:33) Yehova atongola lunga kupwa mutwe watanga. Asaka lunga azakame pwevo lyenyi navana venyi nakuvatwaminyina muzangi. Ngocho, lunga mwakalyambulula yivene kuli Yehova mujila ali nakuzakaminamo tanga yenyi. Lunga uze apwa muka-Kulishitu eji kuzakamanga tanga yenyi muzangi ngana muze Yesu eji kuzakamanga chikungulwilo. Kuzakama tanga mujila kana, nachisolola nge avumbika Yehova.—Wavaka-Efwesu 5:23; talenu Chinyikilo chaKusongo 13.

13. Uno pwevo nahase kusolola ngachilihi ngwenyi avumbika wata ahakako Yehova mutanga?

 ¹³ Pwevo muka-Kulishitu nayikiye vamuhana mulimo waulemu mutanga. Eji kukafwanga lunga lyenyi atesemo kanawa mulimo vamuhana wakupwa mutwe watanga. Pwevo naikiye atwama namulimo wakunangula vana. Jila yimwe eji kuvanangwilangamo vana mangana vapwenga nakalemesa shina kuvasolwela chakutalilaho chamwaza. (Vishimo 1:8) Eji kuvumbikanga lunga lyenyi nakukundwiza vyuma nasakula kulinga. Nge kasakile vyuma vimwe vize nasake lunga lyenyiko, kaha atela kushimutwila kanawa nalunga lyenyi mukavumbi. Nge pwevo muka-Kulishitu mwasomboka kuli lunga uze kapwa Chinjihoko, kaha nahase kumona ukalu wauvulu. Oloze nge mwatwalaho lika kuzanga lunga lyenyi nakumuvumbika, kaha pamo kulutwe naikiye mwakasaka kulinangula vyaYehova nakumuzachila.—Tangenu WaPetulu 1, 3:1.

14. Uno vana vanahase kusolola ngachilihi ngwavo vavumbika wata ahakako Yehova mutanga?

¹⁴ Vana vapwa vavalemu kuli Yehova, ngocho vasakiwa kuvakinga nakuvatwaminyina. Nge navononoka visemi javo, kaha visemi navawahilila. Kaha nachisolola nawa nge vavumbika Yehova nakumwivwisa kuwaha. (Vishimo 10:1) Mujitanga jajivulu, vana veji kuvalelanga kuli chisemi umwe. Echi chinahase kuneha ukalu kuli chisemi navana. Oloze nge vana navononoka chisemi chavo, kaha navatwama kanawa mutanga. Tachikizenu ngwenu jitanga josena kajakupukako. Oloze nge vatu vosena mutanga navatesamo milimo yavo avahana Yehova, kaha tanga yavo nayipwa yakuwahilila. Echi cheji kutohwesanga Yehova uze ahakileko jitanga josena.—Wavaka-Efwesu 3:14, 15.

15. Natusolola ngachilihi ngwetu twavumbika wata ahakako Yehova muchikungulwilo?

¹⁵ Yehova eji kuzachisanga chikungulwilo hakututwaminyina, kaha atongola Yesu kupwa mutwe wachikungulwilo. (Wavaka-Kolose 1:18) Yesu nawa ahana “ndungo wakushishika wakuzangama” mulimo wakuzakama vatu jaKalunga hamavu. (Mateu 24:45-47) Makumbi ano, Lizavu Lyakutwaminyina likiko lyapwa “ndungo wakushishika wakuzangama.” Eli Lizavu Lyakutwaminyina lyeji kutuhananga kulya chakushipilitu halwola lwakutamo mangana tuzamise lufwelelo lwetu. Vakulwane, navaka-kuzachila natulama vakujinguluka veji kutambulanga jindongi kufuma kuLizavu Lyakutwaminyina nakukafwa vikungulwilo mukaye kosena. Ava vandumbwetu vosena vavahana mulimo wakutuzakama. Ngocho, navakalyambulula kuli Yehova mujila vanakuzachilamo mulimo vavahana. Nge natuvumbika ava malunga vatongola, kaha tuli nakuvumbika Yehova.—Tangenu Wavaka-Tesolonyika 1, 5:12; WavaHepeleu 13:17; talenu Chinyikilo chaKusongo 14.

16. Mwomwo ika natwambila ngwetu vakulwane navaka-kuzachila veji kuvatongolanga nashipilitu yajila?

¹⁶ Vakulwane navaka-kuzachila veji kukafwanga vatu muchikungulwilo vapwenga vakushishika nakulinunga. Chipwe ngocho navakiko kavakupukako ngana mwayetu. Uno veji kuvatongolanga ngachilihi? Veji kutesangamo vyuma vyasakiwa vize vasoneka muMbimbiliya. (WaChimoteu 1, 3:1-7, 12; WaChituse 1:5-9) Yehova azachishile shipilitu yenyi yajila yikafwe vaze vasonekele Mbimbiliya valumbunune vyuma kanevi vyasakiwa. Vakulwane veji kuvangilanga kulomba Yehova avatetekele nashipilitu yenyi yajila hakushimutwila hali ndumbwetu walunga uze vatela kutongola kupwa mukulwane  chipwe muka-kuzachila. Echi chasolola nge vikungulwilo vyosena veji kuvitwaminyinanga kuli Yesu naYehova. (Vilinga 20:28) Ngocho malunga vaze vatongola mangana vatukafwe nakutuzakama vapwa wana wakufuma kuli Kalunga.—Wavaka-Efwesu 4:8.

17. Vyuma muka nahase kulinga ndumbwetu wapwevo shimbu jimwe, hakusaka kusolola kavumbi muchikungulwilo?

¹⁷ Lwola lumwe muchikungulwilo kamweshi kupwa vakulwane chipwe vaka-kuzachila vaze vatela kuzata milimo yamuchikungulwiloko. Halwola lwangana, vandumbwetu veka vamalunga vakumbapachisa vanahase kuzata milimo kana. Jino nge ava vandumbwetu vamalunga vauchimo, kaha vandumbwetu vamapwevo vanahase kuzata milimo kana. Nge chili ngocho, kaha ava vandumbwetu vamapwevo vatela kuvwala vitambala chipwe matepa kumitwe yavo. (Wavaka-Kolinde 1, 11:3-10) Echi nachisolola nge mapwevo vavumbika wata ahakako Yehova mutanga namuchikungulwilo.—Talenu Chinyikilo chaKusongo 15.

18, 19. (a) Vyuma muka natulinangula kumazu atwama hali Wavaka-Loma 13:1-7? (b) Uno tweji kuhananga ngachilihi kavumbi vaka-fulumende?

¹⁸ Makumbi ano, Yehova ahana ngolo jakuyula kuli vaka-fulumende, ngocho twatela kuvavumbika. Ava vaka-fulumende veji kuwahisanga vyuma mumafuchi namuvitungilo mangana vitambuke kanawa nakukafwa vatu vatwamamo. Etu vaka-Kulishitu tweji kukavangizanga jindongi jatwama hali Wavaka-Loma 13:1-7. (Tangenu.) Tweji kuvumbikanga “vaze vali nawata” nakukavangiza jishimbi jamulifuchi namuchitungilo twatwama. Jishimbi kana jeji kuzatanga mujitanga jetu, mukusekasana chetu chipwe kuvikumba vyetu. Chakutalilaho, tweji kufwetanga mitelo nakulweza vaka-fulumende vyuma vanakusaka.  Natulinga ngachilihi nge vaka-fulumende navatulweza tulinge vyuma vize vyalimbalaka najishimbi jaKalunga? Kaposetolo Petulu ambile ngwenyi: “Twatela kwononoka Kalunga hakupwa ikiye muka-kuyula, kuhambakana vatu.”—Vilinga 5:28, 29.

¹⁹ Twatela kusolola kavumbi nge tuli nakuhanjika navilolo jafulumende vakufwana nge vachambamilonga chipwe tupokola. Vaka-Kulishitu vavanyike veji kuvumbikanga valongeshi javo naveka vaze vahana milimo yakuzata hashikola. Etu vaka-Kulishitu tweji kuvumbikanga vakulwane vamilimo numba tuhu vakwetu mutwazachila kavavavumbikako. Ngocho tweji kulondezezanga kaposetolo Paulu uze avumbikilenga vilolo jafulumende numba tuhu shimbu jimwe chapwile chachikalu kulinga ngocho. (Vilinga 26:2, 25) Numba tuhu vatu navatulinga mwamupi, oloze twatela kuvavumbikanga.—Tangenu Wavaka-Loma 12:17, 18; WaPetulu 1, 3:15.

20, 21. Vyuma muka vyamwaza vyeji kufumanga hakuvumbika vakwetu?

²⁰ Vatu vavavulu mukaye kavavumbika chikuma vakwavoko. Oloze etu vatu jaYehova katwapwa ngochoko. Tweji kufwilanga kuvumbika vatu vosena. Tweji kukavangizanga mazu ahanjikile kaposetolo Petulu ngwenyi: “Vumbikenunga vatu vosena.” (WaPetulu 1, 2:17) Vatu veji kutumonanga omu tweji kuvumbikanga vakwetu. Yesu atulweza ngwenyi: “Kumunyika chenu chimunyikenga kuvatu mangana vamonenga vilinga vyenu vyamwenemwene nakumutohwesanga Senu.”—Mateu 5:16.

²¹ Nge natuvumbikanga vakwetu mutanga namuchikungulwilo namuvyuma vyeka, kaha chakutalilaho chetu chamwaza nachilingisa veka vafwile kutachikiza chikuma Yehova. Kuvumbika vakwetu cheji kusololanga nge twavumbika Yehova. Kulinga ngocho cheji kwivwisanga Yehova kuwaha nakusolola nge twamuzanga.