1-3. (a) Vyuma muka natulinangula hali Vishimo 13:20? (b) Mwomwo ika twatela kusakula kanawa masepa?

MWAMONAHO lyehi omu kemba eji kutalanga visemi jenyi tahi? Shimbu kanda aputuke kuhanjika, eji kulinangulanga kuli visemi jenyi vyuma vize eji kumonanga nakwivwa. Omu ali nakuya nakukola, eji kulondezezanga visemi jenyi chakuzeneka vakiko kutachikiza. Evi vikiko vyeji kulingisanga navakulwane kuputuka kushinganyeka nakulinga vyuma vyavatu vaze veji kupwanga navo lwola lwosena.

² Mukanda waVishimo 13:20 wamba ngwawo: “Ou mwatambuka navaka-mangana mwakapwa muka-mangana.” Eli lizu vazachisa hano lyakwamba ngwavo “mwatambuka,” lyalumbununa kusakula mutu uze namupwanga nenyi lwola lwosena. Echi chalumbununa kulikata namutu lwola lwosena keshi kupwa nenyi kaha halwola lwalundendeko. Mutu umwe alinangula chikuma vyaMbimbiliya ambile ngwenyi kutambuka namutu chalumbununa kuzanga mutu kana nakupandama chikuma kuli ikiye. Chikupu vene, vatu tweji kulikatanga navo chikuma lwola lwosena vanahase kwalumuna vilinga vyetu.

³ Masepa jetu vanahase kutulingisa tupwenga navilinga vyamwaza chipwe vyavipi. Mukanda waVishimo 13:20 wamba ngwawo: “Ou mwalikatanga naviheu  mwakamona lupi.” MuchiHepeleu, lizu ‘kulikata’ namutu linahase kulumbununa kupwa sepa lyove. (Vishimo 22:24; Vaka-kuyula 14:20) Masepa jetu vaze vazanga Kalunga veji kutukolezezanga tupwenga lika vakushishika kuli ikiye. Tushimutwilenu jino havatu vaze eji kusakulanga Yehova kupwa masepa jenyi, mangana tuhase kusakula kanawa masepa.

4. Mwomwo ika chapwila hikutokwa chachinene kupwa sepa lyaKalunga, kaha mwomwo ika Yehova avulukilile Apalahama ngwenyi, ‘sepa lyami’?

⁴ Yehova uze apwa Mwata Wakulitulaho havyuma vyakutenga vyosena atwitavisa tupwenga tumasepa jenyi. Echi chapwa hikutokwa chachinene. Yehova eji kusakulanga kanawa vatu vaze vatela kupwa masepa jenyi. Asaka kulikata navatu vaze vamuzanga kaha nawa vaze vamufwelela. Achishinganyekenu Apalahama uze alisuwile kulinga kala vyuma vize amulwezele Kalunga. Vyuma alingilenga Apalahama vyasolwele nge apwile wakushishika kuli Kalunga nakumwononoka. Alisuwile kuhana mwanenyi Isaka kupwa wana wakulumba kuli Kalunga. Chikupu vene, Apalahama afwelelele ngwenyi ‘Kalunga nahase kusangula mwanenyi kuvafu.’ (WavaHepeleu 11:17-19; Kuputuka 22:1, 2, 9-13) Apalahama apwile wakushishika kuli Yehova nakumwononoka, echi chikiko chalingishile Yehova ambenga ngwenyi ‘sepa lyami.’—Isaya 41:8; WaYakova 2:21-23.

5. Uno Yehova amona ngachilihi vatu vaze vapwa vakushishika kuli ikiye?

⁵ Yehova amona masepa jenyi kupwa vavalemu chikuma. Ava masepa jenyi vamona kushishika kuli ikiye kupwa chachilemu chikuma kuhambakana kala vyuma. (Tangenu Samwele 2, 22:26.) Veji kumwononokanga  nakupwa vakushishika mwomwo vamuzanga. Mbimbiliya yamba ngwayo, Kalunga “apwa sepa lyavaka-kusungama,” kulumbununa nge veji kumwononokanga. (Vishimo 3:32) Yehova eji kulwezanga masepa jenyi vapwenga “mumbalaka” yenyi. Shikaho, avalweza vamulemesenga lwola lwosena nakulombanga kuli ikiye.—Samu 15:1-5.

6. Tunahase kusolola ngachilihi ngwetu twazanga Yesu?

⁶ Yesu ambile ngwenyi: “Kachi nge mutu anguzanga, mwalamanga mazu ami, kaha navamuzanga kuli Tata.” (Yowano 14:23) Shikaho, hakusaka tupwenga tumasepa jaYehova, twatela nawa kuzanga Yesu nakukavangiza vyuma vize mwatulweza kulinga. Chakutalilaho, tweji kwononokanga Yesu hakukavangiza lushimbi lwakwambulula mujimbu wamwaza nakunangula vatu vapwenga tumbaji. (Mateu 28:19, 20; Yowano 14:15, 21) Tweji ‘kukavangizanga kanawa mujitambo’ jaYesu mwomwo twamuzanga. (WaPetulu 1, 2:21) Yehova eji kwivwanga kuwaha omu tweji kukilikitanga mangana tulondezeze Mwanenyi muvilinga namuhanjikiso.

7. Mwomwo ika chapwila chamwaza kulikata navatu vaze vazanga Yehova?

⁷ Masepa jaYehova vapwa vakushishika, vakwononoka, kaha nawa vazanga Mwanenyi. Kutala nayetu tweji kusakulanga masepa ngana vaze atwama navo Yehova tahi? Kachi nge masepa jenu veji kulondezezanga chakutalilaho chaYesu, nakunangula vatu vyaWangana waKalunga, kaha vanahase kumikafwa mupwenga muvatu vamwenemwene nakupwa vakushishika kuli Yehova.

8. Vyuma muka vinamivwisa kuwaha hausepa waLute naNowemi?

⁸ MuMbimbiliya mwatwama mijimbu yayivulu yavatu vaze valikachilenga usepa, vakufwana nge Lute  nanayewenu Nowemi. Ava mapwevo vafumine kumafuchi nakuvisemwa vyakulihandununa, kaha Nowemi apwile mukulwane kuhambakana Lute. Oloze vapwile nausepa wakukola mwomwo vosena vazangile Yehova. Omu Nowemi asezele lifuchi lyaMowave nakukinduluka kulifuchi lyenyi kuIsalele, “Lute amukakachilile.” Alwezele Nowemi ngwenyi: “Vatu jove navakapwanga vatu jami, kaha Kalunga kove mwakapwanga Kalunga kami.” (Lute 1:14, 16) Lute azangile chikuma Nowemi. Omu vahetele muIsalele, Lute azachile nangolo mangana azakame sepa lyenyi. Nowemi azangilenga chikuma Lute nakumulweza vyuma vyamwaza atelelele kulinga. Lute evwilililenga vyuma vamulwezelenga kuli Nowemi, kaha vosena vavakiswile.—Lute 3:6.

9. Vyuma muka vinamivwisa kuwaha hausepa waNdavichi naYonatane?

⁹ Ndavichi naYonatane navakiko vapwile nausepa wamwenemwene, kaha nawa vapwilenga vakushishika kuli Yehova. Yonatane apwile mukulwane chikuma kuhambakana Ndavichi, valihandunwine namyaka kafwe 30. Kaha nawa Yonatane ikiye atelele kuswana ise hawangana wavaIsalele. (Samwele 1, 17:33; 31:2; Samwele 2, 5:4) Oloze omu atachikijile ngwenyi Yehova nasakula Ndavichi apwenga mwangana, kevwile lwiso chipwe kupwa namuchima wakufulilila Ndavichiko. Chipwe ngocho, Yonatane alisuwile kukundwiza Ndavichi. Chakutalilaho, omu Ndavichi apwile muponde, Yonatane amukafwile “mangana afwelele lika muli Yehova.” Ahakile nakuyoya chenyi muponde mwomwo yakusaka kukafwa Ndavichi. (Samwele 1, 23:16, 17) Ndavichi naikiye azangile Yonatane. Kaha amufwelelesele ngwenyi mwakazakamanga tanga yenyi, kaha alamine lushiko kana nahalwola afwile Yonatane.—Samwele 1, 18:1; 20:15-17, 30-34; Samwele 2, 9:1-7.

10. Vyuma muka namulinangula kuli ava vakweze vatatu vavaHepeleu?

 ¹⁰ Vakweze vatatu vavaHepeleu, Shatalake, naMeshake naAvete-nengo, vavatwalile muundungo omu vapwile vanyike. Numba tuhu vasezele vausoko wavo kwakusuku, oloze valikafwilenga mangana vapwenga vakushishika kuli Yehova. Omu vakolele, vapwile mucheseko chakulifukula kulikombelo lyaulu avalwezele Mwangana Nevukataneza. Shatalake, naMeshake naAvete-nengo vakanyine kulifukula kulikombelo nakulweza mwangana ngwavo: “Etu tunakane kuzachila tulunga twove chipwe kulifukula kulikombelo lyaulu lize unajiki.” Ava vakweze vatatu vapwile lika vakushishika kuli Kalunga chamokomoko nacheseko vahichilemo.—Ndanyele 1:1-17; 3:12, 16-28.

11. Tunatachikiza ngachilihi ngwetu Paulu naChimoteu vapwile nausepa wamwenemwene?

¹¹ Omu kaposetolo Paulu awanyine Chimoteu, amumwene kupwa mukweze uze azangilenga Yehova nakuzakama vandumbwenyi muchikungulwilo. Shikaho Paulu anangwile Chimoteu mangana akafwe vandumbwenyi muvikungulwilo vyakulisezaseza. (Vilinga 16:1-8; 17:10-14) Chimoteu azachilenga nangolo kahechi chalingishile Paulu ambenga ngwenyi: “Azachile nayami hamwe nakutwala mujimbu wamwaza kulutwe.” Paulu atachikijile ngwenyi Chimoteu “mwazakama kanawa” vandumbwenyi. Omu Paulu naChimoteu vazachililenga Yehova, chavakafwile vapwenga nausepa wamwenemwene.—Wavaka-Fwilipi 2:20-22; Wavaka-Kolinde 1, 4:17.

12, 13. (a) Mwomwo ika twatela kuzangama hakusakula masepa muchikungulwilo? (b) Mwomwo ika Paulu asonekelele mazu akuhuhumuna atwama hamukanda Wavaka-Kolinde 1, 15:33?

¹² Tunahase kulinangula vyavivulu kuli vandumbwetu  muchikungulwilo nakulikafwa mangana tutwaleho lika kupwa vakushishika. (Tangenu Wavaka-Loma 1:11, 12.) Oloze twatela kuzangama chikuma navatu natulikata navo muchikungulwilo, mwomwo tuli navandumbwetu vakufuma kuvisemwa nachiyoyelo chakulisezaseza. Vamwe vachili vavahya muchikungulwilo oloze veka vanazachila Yehova hamyaka yayivulu. Ngana muze muhako weji kumbatanga lwola numba uhyenga, mukiko cheji kupwanga nakuli vatu hakupwa nausoko wakukola naYehova. Shikaho twatela kutalilila vandumbwetu chikoki nakuvazanga numba tuhase kusakula kanawa masepa.—Wavaka-Loma 14:1; 15:1; WavaHepeleu 5:12–6:3.

 ¹³ Lwola lumwe muchikungulwilo munahase kupwa ukalu ngocho twatela kupwa vakuzangama. Ndumbwetu walunga chipwe ndumbwetu wapwevo nahase kulinga vyuma vize yakanyisa Mbimbiliya. Chipwe ndumbwetu umwe nahase kuneha ukalu muchikungulwilo mwomwo yakupwa namuchima wakuyayavalanga. Nge vyuma kana vinasoloka, kaha katwatela kulikomokelako mwomwo namulikulukaji lyamyaka lyakulivanga, muvikungulwilo mwapwilenga ukalu. Kaha nawa kaposetolo Paulu ahuhumwine vaka-Kulishitu halwola kana ngwenyi: “Kanda navamihungumwisako. Kulikata navatu vavapi cheji kwenyekanga vilinga vyamwaza.” (Wavaka-Kolinde 1, 15:12, 33) Paulu ahuhumwine nawa Chimoteu azangame hakusakula masepa. Namakumbi ano twatela kuzangama.—Tangenu WaChimoteu 2, 2:20-22.

14. Uno kuhona kusakula kanawa masepa chinahase kuneha ukalu muka hausoko wetu naYehova?

¹⁴ Twatela kulama usoko wetu naYehova mwomwo wapwa waulemu chikuma. Ngocho twatela kulihenda kuvatu vaze vanahase kuzeyesa lufwelelo lwetu nakwenyeka usoko wetu naKalunga. Anukenu ngwenu, ngana muze lipayi vanahake mumeya lyeji kukokanga meya, nayetu nawa nge natulikata namasepa vaze vatwama navilinga vyavipi chinahase kupwa chachashi nayetu kupwa navilinga kana. Shikaho twatela kusakulanga kanawa masepa.—Wavaka-Kolinde 1, 5:6; Wavaka-Tesolonyika 2, 3:6, 7, 14.

15. Vyuma muka mwatela kulinga numba mupwenga namasepa vamwenemwene muchikungulwilo?

¹⁵ Muchikungulwilo munahase kuwanamo vatu vaze vazanga Yehova vaze munahase kulikata navo chikuma. (Samu 133:1) Chipwe ngocho, kanda kupwa kaha namasepa vaze munateseka hamwe mumyaka yakusemuka chipwe vaze vakwechi chiyoyelo nge chenuko. Anukenu ngwenu Yonatane apwile mukulwane chikuma  kuhambakana Ndavichi, kaha nawa Lute apwile kanyike kuli Nowemi. Shikaho twafwila kukavangiza mazu vatuhuhumuna muMbimbiliya akwamba ngwawo: “Kasununenu chikuma michima yenu.” (Wavaka-Kolinde 2, 6:13; tangenu WaPetulu 1, 2:17.) Nge natulondezezanga Yehova, kaha vakwetu vanahase kupandama kuli etu nakupwa masepa jetu.

16, 17. Vyuma muka vize katwatela kulingako nge mutu umwe muchikungulwilo natwivwisa kumuchima kupihya?

¹⁶ Mujitanga mwatwama vatu vakwechi vilinga navishinganyeka vyakulisezaseza, kaha najijila jakulingilamo vyuma jalihandununa. Namuchikungulwilo nawa mwatwama vatu vavilinga navishinganyeka vyakulihandununa. Echi chatela kutulingisa tulinangule vyuma vimwe kuli vakwetu. Oloze shimbu jimwe kupwa navishinganyeka navilinga vyakulihandununa vinahase kutulingisa tulimbalake navandumbwetu. Shimbu jimwe tunahase kwivwa kupihya havyuma navatulinga vakwetu. (Vishimo 12:18) Uno twatela kwechelela ukalu kana utuhombese chipwe kutulingisa tulitwamine kukungulukanga navandumbwetu tahi? Nduma.

¹⁷ Numba tuhu vakwetu navalinga vyuma vimwe vize navitwivwisa kupihya, katwatela kwecha kukungulukako mwomwo keshi Yehova ikiye natwivwisa kumuchima kupihyako. Atuhana kuyoya navyuma vyeka vyamukuyoya. Asaka tumuzange nakupwa vakushishika kuli ikiye. (Kusoloka 4:11) Vandumbwetu muchikungulwilo vapwa wana uze atuhana Yehova utukafwe tupwenga nalufwelelo lwakukola. (WavaHepeleu 13:17) Katweshi kuhasa kukana wana atuhana Yehova mwomwo yamutu umwe kaha natwivwisa kumuchima kupihyako.—Tangenu Samu 119:165.

18. (a) Vyuma muka navitukafwa tutwame kanawa navandumbwetu? (b) Mwomwo ika twatela kukonekelanga vakwetu?

 ¹⁸ Hakuwana nge twazanga vandumbwetu, ngocho twatela kutwama navo kanawa. Tachikizenu ngwenu Yehova kasaka ngwenyi kuvanga tupwenga vakukupukako, ngocho nayetu twatela kupwa navishinganyeka kana. (Vishimo 17:9; WaPetulu 1, 4:8) Tuvosena tweji kulimbenjanga, oloze zangi yatela kutukafwa ‘tulikonekelenga navakwetu namuchima wakusuuluka.’ (Wavaka-Kolose 3:13) Kaha nawa zangi yinahase kutukafwa tuhonese kutohwesa ukalu waundende. Chikupu vene, nge mutu natwivwisa kumuchima kupihya, kachapwa chachashi kulitwamina kushinganyeka havyuma natulingiko. Kahechi chinahase kutulingisa twivwenga kupihya nakumulamina koko. Oloze kulama koko chinahase kutulingisa tuhone kupwa vakuwahilila. Shikaho, nge natukonekelanga mutu uze natwivwisa kumuchima kupihya, kaha tunahase kupwa vakuunda, nakuneha kuunda muchikungulwilo, chachinenenyi nachitukafwa tupwenga nausoko wamwaza naYehova.—Mateu 6:14, 15; Luka 17:3, 4; Wavaka-Loma 14:19.

19. Lwola muka twatela kulitwamina kulikata namutu muchikungulwilo?

¹⁹ Mutu himutu mutanga eji kufwilanga kulinga vyuma vize navivwisa vakwavo kumuchima kuwaha. Achishinganyekenu nge umwe mutanga mwasolola muchima wakulikanga. Kaha vakwavo vosena mutanga vaneseka kumukafwa oloze ikiye kate. Ngocho vanahase kumuhanga hembo kuli mutwe watanga, chipwe kulifuminaho ivene. Chuma kana chinahase kusoloka namuchikungulwilo. Mutu nahase kutwalaho lika kulinga vyuma vize navivwisa Yehova kupihya nakwenyeka chikungulwilo. Nahase nawa kukana kukavangiza vyuma navamukafwa, kaha  vilinga vyenyi navisolola nge keshi nakusaka kutwalaho lika kupwa muchikungulwiloko. Ngocho, nahase kuseza chikungulwilo ivene, chipwe kumufumisamo. Nge chuma kana chinasoloka, Mbimbiliya yatulweza hatoma ngwayo twatela ‘kulitwamina kulikata’ namutu kana. (Tangenu Wavaka-Kolinde 1, 5:11-13; WaYowano 2, 9-11) Chuma kana chinahase kupwa chachikalu nge mutu kana apwa sepa lyetu chipwe muka-tanga yetu. Chipwe ngocho, elu hilwola twatela kupwa vakushishika kuli Yehova kuhambakana kuli kala mutu.—Talenu Chinyikilo chaKusongo 8.

20, 21. (a) Kufumisa mutu muchikungulwilo cheji kusololanga ngachilihi zangi hali mutu kana? (b) Mwomwo ika chapwila chachilemu kusakula kanawa vatu twatela kulikata navo?

²⁰ Kufumisa mutu muchikungulwilo chasolola zangi atwama nayo Yehova. Cheji kukinganga chikungulwilo kuvatu vaze kavamona jishimbi jaYehova kupwa jajilemuko. (Wavaka-Kolinde 1, 5:7; WavaHepeleu 12:15, 16) Cheji kutukafwanga tuzange Yehova, nalijina lyenyi lize lyapwa lyajila najishimbi jenyi. (WaPetulu 1, 1:15, 16) Kufumisa mutu muchikungulwilo cheji kusololanga nge mutu uze nakane kulikata nachikungulwilo vamuzanga. Kuzangamisa kana cheji kulingisanga mutu kana ashinganyeke ngwenyi vyuma alingile vyavipi nakumukafwa alumuke. Vatu vavavulu vaze vafumishile muchikungulwilo vanazatenga nangolo nakukinduluka kuli Yehova, kaha chikungulwilo chavatambwile nakuwahilila.—WavaHepeleu 12:11.

²¹ Shikaho twatela kusakula kanawa vatu twatela kulikata navo mwomwo vyuma navalinga vinahase kukwata hakuyoya chetu. Nge natulikata navatu vaze azanga Yehova, kaha vatu kana navatukafwa tupwenga lika vakushishika kuli ikiye haya myaka yosena.