1, 2. Vyuma muka twatela kulinga mangana tutwamenga lika muzangi yaKalunga?

TUVOSENA twasaka kupwa najingolo mumujimba nakupwa vakulikangula. Ngocho twafwila kulya vyakulya vyamwaza nakunyuka mujimba nakuuzakama kanawa. Numba tuhu kulinga vyuma kana chasakiwa kuzata nangolo, oloze katwalitwaminako mwomwo cheji kutunganyalisanga. Twatela nawa kupwa najingolo nakulikangula mujila yeka.

² Twatela kutwalaho lika kuzamisa usoko wetu naYehova, numba tuhu tunamutachikiza. Omu Yuta akolezezele vaka-Kulishitu vatwamenga lika “muzangi yaKalunga,” avalwezele navyuma vatelelele kulinga mangana vatwamenga lika muzangi yaKalunga. Avalwezele ngwenyi: “Litungenu mulufwelelo lwenu lwajila chikuma.” (WaYuta 20, 21) Uno tunahase kuzamisa ngachilihi lufwelelo lwetu?

3-5. (a) Satana asaka mumonenga ngachilihi jishimbi jaYehova? (b) Uno mwamona ngachilihi jishimbi jaYehova najindongi jenyi?

³ Chapwa chachilemu kuli enu kukunyuka ngwenu jishimbi jaYehova japwa jamwaza. Satana ali nakusaka kumihungumwisa mumone jishimbi jaYehova kupwa jajikalu kukavangiza, nakumilingisa mushinganyeke ngwenu namupwa vakuwahilila kachi nge namulisakwila enu vavene vyakulinga. Satana nahungumwisanga vatu vafwelele vyuma kana, putu vene mumilemba yaEtene. (Kuputuka 3:1-6) Kahomu mukiko ali nakulinga namakumbi ano.

 ⁴ Uno vyuma ajina Satana vyapwa vyamuchano tahi? Kutala jishimbi jaYehova japwa jajikalu kujikavangiza tahi? Nduma. Achishinganyekenu muli nakutambuka mumilemba yamwaza, kaha namuwana chihela chimwe vanachihake muchipato. Pamo munahase kulihulisa ngwenu, ‘Mwomwo ika echi chihela vanachihakila muchipato?’ Oloze shimbu muchili nakushinganyeka, namwivwa ndumba ali nakutahwoka muchipato kana. Uno vyuma muka namushinganyeka kutalisa kuchipato kana? Namwijiva jino ngwenu echi chipato chinamikingi kuchina ndumba mwamiyenga maji. Shikaho jishimbi jaYehova jinafwane nge chize chipato, kaha uze ndumba nafwane nge Liyavolo. Mazu aKalunga atuhuhumuna ngwawo: “Tonenunga. Muka-kole wenu Liyavolo eji kuhitangana nge ndumba wakutahwoka, nakutondatonda weshowo mwawana amulye.”—WaPetulu 1, 5:8.

⁵ Yehova asaka tuyoyenga mujila yamwaza. Ngocho kasaka Satana atuhungumwiseko. Kahechi chikiko chamulingisa atuhane jishimbi najindongi jenyi mangana jitukafwe tupwenga vakuwahilila mukuyoya chetu. (Wavaka-Efwesu 6:11) Yakova asonekele ngwenyi: “Ou mwashishika mujishimbi eji jakulihehwa jakukupuka mwosena nakukakachila kujikiko . . . mwawahililanga navyuma mwalinganga.”—WaYakova 1:25.

6. Chuma muka nachitukafwa tukunyuke ngwetu jishimbi jaKalunga japwa jamwaza?

⁶ Kukavangizanga jishimbi jaYehova cheji kutulingisanga tupwenga nachiyoyelo chamwaza nakuzamisa usoko wetu nayikiye. Chakutalilaho, atulweza tulombenga kuli ikiye, kaha kulinga chuma kana cheji kutunganyalisanga chikuma. (Mateu 6:5-8; Wavaka-Tesolonyika 1, 5:17) Kaha nawa tweji kunganyalanga hakukavangiza lushimbi atuhana lwakulikungulwilanga hamwe navakwetu, nakulikolezeza nakwazananga mumulimo wakwambulula nakunangula vatu. (Mateu 28:19 20; Wavaka-Ngalesha 6:2; WavaHepeleu 10:24, 25) Nge natushinganyekanga omu jishimbi  kana jinatukafwe tuzamise lufwelelo lwetu, kaha nachitukafwa tukunyuke chikupu ngwetu jishimbi jaYehova japwa jamwaza.

7, 8. Vyuma muka navitukafwa tuhone kulizakamina havyeseko natukamona kulutwe?

⁷ Shimbu jimwe tunahase kulizakamina ngwetu pamo kulutwe natukengila mucheseko chize nachikatukaluhwila kufungulula. Kachi nge omu mukiko mweji kushinganyekanga, kaha mwatela kwanuka mazu ahanjikile Yehova akwamba ngwenyi: “Ami Yehova yami Kalunga kenu, ou eji kuminangulanga mangana munganyale, ou eji kumitwaminyinanga mujila yize mwatela kuya. Kachi nge namwivwililanga jishimbi jami kaha kuunda chenu nachipwanga nge kalwiji, kwoloka chenu nachipwanga nge makimba akalungalwiji.”—Isaya 48:17, 18.

⁸ Kachi nge natwononokanga Yehova, kaha kuunda chetu nachipwa nge kalwiji wakuzeneka kuma. Kwoloka chetu nawa nachipwa nge makimba akalungalwiji aze eji kunganjanganga  lika. Shikaho, tunahase kutwalaho lika kupwa vakushishika chamokomoko naukalu natumona. Mbimbiliya yatufwelelesa ngwayo: “Mbila chiteli chove hali Yehova, kaha ikiye mwakuzamikisa. Keshi kuketavila muka-kwoloka alimbukeko.”—Samu 55:22.

9, 10. Uno kukula kushipilitu chalumbununa ika?

⁹ Kachi nge namukilikita chikuma mangana muzamise usoko wenu naYehova, kaha ‘namukula’ kushipilitu. (WavaHepeleu 6:1) Uno kukula chalumbununa ika?

¹⁰ Kukula kushipilitu kachalumbununa kukola kumujimbako, oloze chalumbununa kulingisa Yehova kupwa Sepa lyetu nakumonanga vyuma ngana muze avimona ikiye. (Yowano 4:23) Paulu asonekele ngwenyi: “Vaze vayoya mwaya mujimba, vajika vishinganyeka vyavo havyuma vyamujimba, oloze vaze vayoya mwaya shipilitu, vajika vishinganyeka vyavo havyuma vyashipilitu.” (Wavaka-Loma 8:5) Mutu wakuhya kushipilitu kajika vishinganyeka vyenyi haviseke navyuma vyamukuyoyako. Oloze ajika vishinganyeka vyenyi hakuzachila Yehova nakusakula kanawa vyuma atela kulinga mukuyoya. (Vishimo 27:11; tangenu WaYakova 1:2, 3.) Kaha nawa keshi kwitavila vakwavo vamuhungumwise alinge vyuma vyakuhengako. Mutu kana atachikiza vyuma vyakwoloka nakufwila kuvilinga.

11, 12. (a) Paulu ahanjikile ika ‘hauhashi wamuka-Kulishitu wakukekesa vyuma’? (b) Uno kukula kushipilitu chalifwana ngachilihi namuka-kulaha wakwipangweji?

¹¹ Kukula kushipilitu chasakiwa kuzata nangolo. Kaposetolo Paulu asonekele ngwenyi: “Kulya chakutafunya chapwa chavatu vanakolo lyehi, vaze vakwechi uhashi wakukekesa vyuma uze valongesa lyehi mwomwo yakuuzachisa mangana vahandunune kwoloka nakuhenga.” (WavaHepeleu 5:14) Lizu vazachisa hano lyakwamba ngwavo “valongesa,” linahase kutulingisa tushinganyeke hali muka-kulaha.

 ¹² Kachi nge tunamono mutu uze eji kulahanga kanawa, kaha twatela kwanuka ngwetu akilikichile chikuma nakulinangula numba ahase kulaha kanawa, mwomwo mutu kana kasemukile nauhashi wakulahako. Omu kemba eji kusemukanga, keshi kutachikiza mwakuzachishila kanawa mavoko namahinji enyiko. Oloze mukuhita chalwola, eji kulilongesanga mwakukwachila vyuma nakulilongesa kutambuka. Kaha nge nakolo nahase kukapwa muka-kulaha wakwipangweji, kachi nge mwalilongesa chikuma. Chochimwe nawa, kupwa vakuhya kushipilitu cheji kumbatanga lwola nakulinangula chikuma.

13. Vyuma muka navitukafwa tushinganyekenga ngana muze eji kushinganyekanga Yehova?

¹³ Mumukanda uno tunakekesa havyuma twatela kulinga mangana tushinganyekenga ngana muze eji kushinganyekanga Yehova, nakumona nawa vyuma ngana muze avimona ikiye. Tunalinangula nawa omu tunahase kumona jishimbi jaYehova kupwa jajilemu nomu tunahase kujizanga. Shikaho kala vyuma natusakula kulinga, twatela kulihulisa ngwetu: ‘Jishimbi chipwe jindongi muka jamuMbimbiliya jahanjika havyuma nguli nakusaka kulinga? Uno nanguhasa kujizachisa ngachilihi? Yehova ali nakusaka ngulinge ika?’—Tangenu Vishimo 3:5, 6; WaYakova 1:5.

14. Vyuma muka twatela kulinga mangana tuzamise lufwelelo lwetu?

¹⁴ Twatela kutwalaho lika kujikijisa lufwelelo lwetu. Ngana muze vyakulya vyamwaza vyeji kukafwanga mijimba yetu yipwenga yakukingiwa, mukiko nakulinangula vyaYehova cheji kutukafwanga tuzame lika mulufwelelo. Omu twaputukile kulinangula Mbimbiliya, twavangililile kutachikiza muchano wamaputukilo waYehova. Oloze twatela kuzata nangolo mangana tulinangule muchano wamuMbimbiliya wakujiminyina. Kaha nakaposetolo Paulu ahanjikile hachishina kana omu ambile ngwenyi: “Kulya chakutafunya chapwa chavatu vanakolo lyehi.”  Kachi nge namukavangizanga vyuma muli nakulinangula, kaha namupwa namangana. Mbimbiliya yamba ngwayo: “Mangana apwa amalemu chikuma.”—Vishimo 4:5-7; WaPetulu 1, 2:2.

15. Mwomwo ika chapwila chachilemu kuzanga Yehova navandumbwetu?

¹⁵ Hakusaka mutu apwenga lika wakujikiza nakupwa wakukingiwa, atela kutwalaho lika kulilama kanawa. Chochimwe nawa, mutu uze nakulu lyehi kushipilitu atela kukilikita mangana azamise usepa wenyi naYehova. Paulu ambile ngwenyi: “Lyesekenunga enu vavene mumone numba nge muli mulufwelelo, lishishikenunga enu vavene mumone omu mwapwa.” (Wavaka-Kolinde 2, 13:5) Kuli vyuma vikwavo twatela kulinga keshi kuzamisa kaha lufwelelo lwetuko. Twatela kufwila kuzanga lika Yehova navandumbwetu. Paulu ambile ngwenyi: “Kachi nge nguli . . . nachinyingi chosena, kaha nawa nge nguli nalufwelelo lwakuhasa kunungulula jipili, oloze kangweshi nazangiko, kaha nguwamokomoko.”—Wavaka-Kolinde 1, 13:1-3.

16. Satana asaka etu tulinge ika?

¹⁶ Satana asaka etu tushinganyekenga ngwetu katweshi kuhasa kwivwisa Yehova kuwahako. Asaka kutulingisa tuhombe nakumona ngwetu ukalu tuli nakuhitamo kaweshi kukakumako. Kaha nawa Satana kasaka etu tulifwelele navandumbwetu nakupwa vakuwahililako. (Wavaka-Efwesu 2:2) Satana atachikiza ngwenyi nge natupwa navishinganyeka vyavipi, kaha nachituhombesa nakutulingisa twenyeka usoko wetu naYehova. Oloze Yehova atuhana chuma chize nachitukafwa tuhonesenga vishinganyeka vyavipi. Chuma kana shina lutalililo.

17. Mujila muka lutalililo lwetu lwapwila lwalulemu?

¹⁷ Mukanda Wavaka-Tesolonyika 1, 5:8, wafwanyisa lutalililo lwetu kulitepa lyakukola lize lyeji kukinganga liswalale hakwasa jita, kaha wafwanyisa litepa kana “[ku]lutalililo  lwaulwilo.” Kutalilila vyuma atushika Yehova nachikinga vishinganyeka vyetu nakutukafwa tuhonesenga vishinganyeka vyavipi.

18, 19. Uno lutalililo lwakafwile ngachilihi Yesu?

¹⁸ Lutalililo apwile nalwo Yesu lukiko lwamukafwile omike. Haufuku wamakumishilo hano hamavu, Yesu ahichile muukalu wakulisezaseza. Sepa lyenyi umwe amusolwele kuli vaka-kole. Kaha sepa lyenyi mukwavo amukanyine ngwenyi kamutachikizako. Kaha masepa jenyi veka vaze vasalileho vamuchinyine. Vatu vamungalila yenyi nawa vamufumbukilile nakwamba ngwavo vamupapalile hachitondo mangana afwenga. Vyuma muka vyamukafwile omike muukalu wosena ou? Mukanda WavaHepeleu 12:2 wamba ngwawo: “Mwomwo yakuwahilila chize vamuvulukilile ngwavo mwakevwa kulutwe, omikile hachitondo chakuyanjishila, alumbilishile sonyi, kaha natwame lyehi kuchilyo kulitanda lyaKalunga.”

¹⁹ Yesu ejivile ngwenyi, nge mwomika, kaha mwalingisa  lijina lyaIse lipwenga lyajila, nakusolola nawa ngwenyi Satana apwa chikupu muka-makuli. Vyuma kanevi apwile nakutalilila Yesu vyamulingishile apwenga wakuwahilila. Atachikijile nawa ngwenyi kalinwomu ayenga mwilu muli Ise. Lutalililo kanelu lwamulingishile omike. Nayetu nawa twatela kushinganyekanga havyuma twatalilila ngana muze alingile Yesu. Echi nachitukafwa tupwenga vakumika chamokomoko naukalu natumona.

20. Vyuma muka navimikafwa mushinganyekenga havyuma vyamwaza?

²⁰ Yehova eji kumonanga lufwelelo lwenu nakushishika chenu. (Isaya 30:18; tangenu Malaki 3:10.) Yehova amifwelelesa ngwenyi, ‘mwakamihana vyuma yafwila michima yenu.’ (Samu 37:4) Shikaho shinganyekenunga chikuma havyuma mwatalilila, mwomwo Satana asaka kumilingisa muhone kutalilila vyuma mwafwelela, nakumilingisa nawa mushinganyeke ngwenu vyuma amishika Yehova kavyeshi kukatesamoko. Kanda namwechelela vishinganyeka  vyavipi vyakano kaye kaSatana vimihungumwiseko. Kachi nge munaputuka kukakasana havyuma mwatalilila, kaha mwatela kulomba chikuma Yehova mangana amikafwe. Anukenunga mazu atwama hamukanda Wavaka-Fwilipi 4:6, 7, akwamba ngwavo: “Kanda namulizakamina hachuma numba chimweko, oloze muvyuma vyosena, hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu kuhichila muli Kulishitu Yesu.”

21, 22. (a) Vyuma muka ajina Yehova kukalingila vatu hano hamavu? (b) Vyuma muka muli nakufwila kulinga?

²¹ Fwilenunga kushinganyeka havyuma vyamwaza vize vatushika. Kalinwomu vatu vosena valemesele Yehova hamwe. (Kusoloka 7:9, 14) Achishinganyekenu hakuyoya chize namukapwa nacho mukaye kakahya. Nachikapwa chamwaza chikuma. Halwola kana Satana navandemone jenyi navatu vakuhuka vosena kaveshi kukapwako chekako. Kamweshi kukaviza chipwe kufwako. Oloze namukahindukanga namijimba yakulikangula nakulivwisa kuwaha kuyoya. Vatu vosena navakazachilanga hamwe nakulingisa mavu kupwa palachise. Kaha vatu vosena navakapwanga navyakulya vyamwaza vyavivulu nakutwama kuvihela vyakukingiwa. Vatu kaveshi kukapwanga vikenya chipwe vilyanyiko, oloze navakalizanganga umwe namukwavo. Kaha mukuhita chalwola, vatu vosena jino hamavu navakalivwisa kuwaha “kwingila mukulihehwa chaupahu chavana vaKalunga.”—Wavaka-Loma 8:21.

²² Yehova ali nakusaka mupwenga mumasepa jenyi vamwenemwene. Shikaho fwilenunga kuzata nangolo jenu josena mangana mwononokenga Yehova nakupandama chikuma kuli ikiye lwola lwosena. Ngocho, tutwalenuho lika kutwamanga muzangi yaKalunga haya myaka yosena.—WaYuta 21.