1, 2. (a) Vyuma muka veji kutalililanga valunga napwevo vaze vanengila muulo? (b) Vihula muka natushimutwila mukapetulu uno?

ACHISHINGANYEKENU samwenga namwenga wenyi vanawahilila chikuma halikumbi lyavo lyakulimbata, nakushinganyeka nawa havyuma vyamwaza navakalivwisa kuwaha muulo wavo. Vanafwelela chikupu ngwavo ulo wavo naukelila, kaha nawa navapwanga vakuwahilila.

² Chipwe ngocho, malo amavulu eji kupwanga akuwahilila hakuputuka, oloze kutwala muze kuwahilila kana cheji kukumanga. Hakusaka valunga napwevo vapwenga vakuwahilila nakulingisa ulo wavo wilile, vatela kuvatwaminyina kuli Kalunga. Shikaho tushimutwilenu jino omu Mbimbiliya yakumbulula vihula vino: Nganyo muka yatwama muulo? Kachi nge namusaka kumbata chipwe kusomboka, kaha munahase kusakula ngachilihi mutu wamwenemwene wakulimbata nenyi? Vyuma muka vinahase kumikafwa mupwenga malunga, chipwe mapwevo vamwenemwene? Kaha vyuma muka navikafwa ulo wilile?—Tangenu Vishimo 3:5, 6.

3. Uno mwashinganyeka ngwenu mutu kupwa wakuwahilila kuvangila nengila muulo tahi? Lumbununenu.

³ Vatu vamwe vashinganyeka ngwavo, hakusaka mutu apwenga wakuwahilila atela kwingila muulo. Oloze omu  keshi mukikoko. Yesu ambile ngwenyi ujike wapwa wana. (Mateu 19:11, 12) Nakaposetolo Paulu nawa avulukile nganyo yatwama muujike. (Wavaka-Kolinde 1, 7:32-38) Shikaho mutu nahase kusakula kutwama ujike chipwe kwingila muulo. Kamwatela kwitavisa vaka-tanga yenu, namasepa jenu chipwe chisemwa chenu vimishinyinyike mwingile muuloko.

4. Uno ulo wamwaza weji kunehanga nganyo muka?

⁴ Mbimbiliya yamba ngwayo, ulo naukiko wapwa wana wakufuma kuli Kalunga, kaha watwama nanganyo. Yehova ahanjikile kuli mutu watete Alama ngwenyi: “Kachawahile lunga kutwama uka wenyiko. Nangumutengela muka-kumukafwako, apwenga wakulisoka nenyi.” (Kuputuka 2:18) Yehova atengele Eve mangana apwenga pwevo lyaAlama, kaha vakiko vapwile vatu vatete kutunga tanga. Kachi nge vapwevo nalunga vali navana, kaha vatela kuzata nangolo mangana vahase kuvalela kanawa. Olozenyi, kusema vana keshi chikiko kaha chatela kulingisa vatu valimbateko.—Samu 127:3; Wavaka-Efwesu 6:1-4.

5, 6. Uno ulo unahase kupwa ngachilihi nge “mukole wajitondo jitatu”?

⁵ Mwangana Solomone asonekele ngwenyi: “Vavali vanawahe kuhambakana mutu umwe, mwomwo veji kupwanga nafweto yamwaza kumilimo yavo navakilikita. Kachi nge umwe nalimbuka, mukwavo mwamuhindula. Nyize ou nazeneka mutu wakumuhindula mwalinga muka kachi nge nalimbuka? . . . Mukole wajitondo jitatu kaveshi kuhasa kuumbitula muwashiwashiko.”—Muka-kwambulula 4:9-12.

⁶ Ulo unahase kupwa wamwaza nge vaze vanalimbate navalizanga chikuma, nakulikafwa, nakulivendejeka nakulikinganga. Zangi yeji kulingisanga ulo uzame, oloze ulo unahase kuzama chikuma nge valunga napwevo navalemesanga Yehova. Ngocho ulo wavo unahase kupwa nge  “mukole wajitondo jitatu,” uze vanahoso kanawa. Mukole kana wapwa ukola chikuma kuhambakana mukole wajitondo jivali. Shikaho, ulo unahase kuzama kachi nge vaze vanalimbate navapendaminanga hali Yehova.

7, 8. Mazu muka asonekele Paulu aze nawakafwa vaze navasaka kwingila muulo?

⁷ Vatu vaze vali muulo veji kulivwisanga kuwaha kulisavala. (Vishimo 5:18) Oloze nge mutu mwafwila kwingila muulo mwomwo yakusaka kaha kulisavala, kaha keshi kuhasa kusakula kanawa mutu wakulimbata nenyiko. Echi chikiko chalingisa Mbimbiliya yambenga ngwayo, mutu atela kwingila muulo nge nahichi “hatwitwi yaukweze,” kulumbununa nge nahichi lyehi halwola luze peha yakufwila kulisavala namutu yeji kutohwanga. (Wavaka-Kolinde 1, 7:36) Shikaho, nachiwaha mutu kwingila muulo nge peha yakufwila kulisavala yinakehe. Echi chatela kulingisa mutu ashinganyeke kanawa hakusakula vyuma atela kulinga.—Wavaka-Kolinde 1, 7:9; WaYakova 1:15.

⁸ Nge munakushinganyeka kwingila muulo, kaha mwatela kutachikiza kanawa chiyoyelo chamuulo nakwijiva nawa ngwenu muulo mwatwama ukalu. Paulu ambile ngwenyi, vosena vaze navengila muulo “navamonanga luyando mumijimba yavo.” (Wavaka-Kolinde 1, 7:28) Shikaho, numba vene ulo wamwaza chikuma unahase kwingila muukalu. Ngocho, nge munakusaka kumbata chipwe kusomboka, kaha mwatela kusakula kanawa mutu wakulimbata nenyi.

9, 10. Vyuma muka vinahase kusoloka nge mutu mwambata chipwe kusomboka kumutu uze kazachila Yehovako?

⁹ Tutalenu halundongi lwamuMbimbiliya luze nalutukafwa tusakule kanawa mutu wakulimbata nenyi. Lundongi kana lwamba ngwalwo: “Kanda namulikasa toka navatu vaze kavetavako.” (Wavaka-Kolinde 2, 6:14) Chifwanyisa  kana chapendaminyine hamulimo waunjimi. Njimi keshi kukasa mutoka yimwe tunyama vavali vaze valihandununa chikuma mukutohwa namungoloko, mwomwo vosena navapwa muukalu. Chochimwe nawa, nge muka-kwitava mwalimbata namutu wakuhona kwitava, kaha vosena navamona ukalu muulo wavo. Evi vikiko Mbimbiliya yatukolezezela tumbachilenga “muli Mwata kaha.”—Wavaka-Kolinde 1, 7:39.

¹⁰ Vaka-Kulishitu vavajike vamwe veji kushinganyekanga ngwavo, kulimbata namutu uze kalemesa Yehovako chinawahe kuhambakana kutwama kaha muujike. Oloze kuhona kukavangiza jindongi jamuMbimbiliya cheji kunehanga ukalu waunene nakulingisa mutu akaliveye. Twatela kutachikiza ngwetu, kulemesa Yehova chikiko chuma chachilemu chikuma mukuyoya chetu hakupwa tuvatu jenyi. Uno munahase kwivwa ngachilihi nge muka-mahyenu keshi kuzachila Yehova hamwe nayenuko? Vandumbwetu vavavulu vanasakula kutwama muujike muchishishisa chakumbata chipwe kusomboka kumutu uze kazanga Yehova nakumuzachilako.—Tangenu Samu 32:8.

11. Vyuma muka navimikafwa musakule kanawa mutu wakulimbata nenyi?

¹¹ Chipwe ngocho, echi kachalumbununa nge mwatela kumbata chipwe kusomboka kukala ndumbwetuko. Oloze nge namusaka kwingila muulo, kaha tondenu mutu uze mwazanga chikuma uze akwechi vilinga vize vyalitombola navilinga vyenu. Shikaho mwatela kuvandamina noho namukawanyina mutu uze afwila kulinga vyuma vize mwafwila nayenu, uze nawa ahaka kuzachila Kalunga kulutwe mukuyoya chenyi. Kaha nawa wanenungako lwola lwakutanga nakushinganyekanga havyuma vize navikafwa vaze valimbata vize vasoneka mumikanda yakufuma kuli ndungo wakushishika.—Tangenu Samu 119:105.

12. Vyuma muka natulinangula kumijimbu yamuMbimbiliya yize yahanjika hakusakwila vana mutu wakulimbata nenyi?

 ¹² Muvisemwa vimwe, visemi vakiko veji kusakwilanga vana vavo vatu vakulimbata navo. Muvisemwa kana vamba ngwavo, visemi vakiko vanahase kutachikiza mutu wamwaza atela kumbata chipwe kusombokako mwanavo. Omu mukiko chapwilenga nakushikulu. Shikaho, nge visemi jenu veji kukavangizanga chisemwa kana, kaha Mbimbiliya yinahase kuvakafwa vatachikize vyuma vatela kumona hali mutu uze navasakula. Chakutalilaho, omu Apalahama asakwile pwevo atelelele kumbata mwanenyi Isaka, kahakile muchima kujimbongo namilimo azachilengako, oloze asakwile mutu uze azangilenga Yehova.—Kuputuka 24:3, 67; talenu Chinyikilo chaKusongo 25.

13-15. (a) Vyuma muka atela kulinga mutu uze mwasaka kumbata, numba atengamo kupwa lunga wamwenemwene? (b) Vyuma muka atela kulinga mutu uze mwasaka kusomboka, numba atengamo kupwa pwevo wamwenemwene?

¹³ Kachi nge muli nakushinganyeka kumbata chipwe kusomboka, kaha mwatela kumona chikupu ngwenu munalizange kwingila muulo. Munahase kumona ngwenu munaliwahisa, oloze tushimutwilenu havyuma vize vyeji kusololanga nge chikupu vene mutu nalizange kwingila muulo. Pamo munahase kulikomokela havishina natushimutwila.

¹⁴ Mbimbiliya yahanjika ngwayo, lunga napwevo vatwama namilimo yakulihandununa mutanga. Shikaho, nachipwa chakutamo kwamba ngwetu, mutu himutu, apwa lunga chipwe pwevo, akwechi vyuma atela kulinga numba alizange kwingila muulo. Kachi nge lunga ali nakushinganyeka kumbata, kaha atela kulihulisa mangana amone nge natemo kupwa mutwe watanga. Yehova asaka lunga azakame puwenyi navana venyi kumujimba namuvishinganyeka. Chuma chachilemu atela kulinga lunga shina kutwaminyina vaka-tanga yenyi hakulemesa Kalunga mwatanga. Mbimbiliya yahanjika ngwayo, lunga uze mwahona kuzakama tanga yenyi “napihi chikuma kuhambakana mutu uze keshi nalufweleloko.” (WaChimoteu 1, 5:8) Shikaho, kachi nge munakusaka kumbata, kaha mwatela kushinganyeka halundongi lwamuMbimbiliya lwakwamba ngwavo: “Zata milimo yove yakuweluka, nakulongesa vyuma muwande wove, kufumaho numbanyi utunge zuvo yove.” Kulumbununa nge shimbu kanda lunga ambate pwevo, atela chikupu kumona ngwenyi natesamo vyuma vize Yehova asaka lunga alingenga.—Vishimo 24:27.

 ¹⁵ Pwevo uze anakushinganyeka kusomboka, atela kumona chikupu ngwenyi natemo kukazata milimo yasakiwa hakupwa somboki chipwe chisemi. Mbimbiliya yavuluka jijila jize pwevo eji kuzakaminangamo lunga lyenyi navana venyi. (Vishimo 31:10-31) Chaluvinda, vatu vavavulu makumbi ano veji kushinganyekanga kaha havyuma vatela kukavalingila vaka-mahyavo. Oloze Yehova asaka tushinganyekenga vyuma natukalingila vaka-mahyetu.

16, 17. Vyuma muka mwatela kushinganyekaho kachi nge munakusaka kumbata chipwe kusomboka?

¹⁶ Mutu atela kushinganyeka hamilimo yize Yehova ahana valunga napwevo shimbu kanda engile muulo. Kupwa mutwe watanga kachalumbununa nge lunga atela kuyanjisa puwenyi kumujimba chipwe muvishinganyekako. Oloze atela kulondezeza Yesu uze eji kuzanganga nakutetela vaze eji kutwaminyinanga. (Wavaka-Efwesu 5:23) Kaha pwevo nawa atela kushinganyeka mujila nahase kukakundwijilamo vyuma mwakakasa lunga lyenyi nakuzachila nenyi hamwe. (Wavaka-Loma 7:2) Kaha nawa atela kulihulisa ngwenyi, kutala ngunahase kukaliluula kumutu wakuhona kukupuka tahi? Kachi nge namono ngwenyi keshi kukahasa kulinga ngochoko, kaha katela kusombokako.

¹⁷ Kaha nawa mutu himutu muulo atela kuzakama chikuma vyuma vize asaka muka-mahyenyi kuhambakana vize asaka ikiye. (Tangenu Wavaka-Fwilipi 2:4.) Paulu asonekele ngwenyi: “Mutu himutu azangenga pwevo lyenyi nganomu alizanga ivene. Kaha nawa pwevo atela kupwa nakalemesa chikuma kuli lunga lyenyi.” (Wavaka-Efwesu 5:21-33) Vapwevo nalunga vatela kumona chikupu ngwavo valizanga kaha nawa valivumbika. Oloze hakusaka ulo ufukile, lunga atela kutachikiza chikupu ngwenyi pwevo lyenyi amuvumbika, kaha nawa pwevo atela kutachikiza chikupu ngwenyi lunga lyenyi amuzanga.

18. Mwomwo ika vaze vali nakulisesembwa vatela kupwila vakuvanguluka?

 ¹⁸ Lwola lwakulisesembwa, lwapwa hilwola lwamwaza luze vatu vaze navafwila kukalimbata vatela kulitachikiza kanawa. Kaha nawa vatela kupwa vakashishi hakushimutwilanga mangana valitachikize kanawa nakumona numba nge nachipwa chakutamo kulimbata, nyi chiku. Halwola lwakulisesembwa, hakiko vatu vaze vanakusaka kulimbata vatela kushimutwilanga mangana vatachikize vyuma afwila mutu himutu. Kaha nawa kweseka nomu vatutenga, mukuhita chalwola vanahase kulizanga chikuma kwijiva nge vanalimbate lyehi. Oloze  vatela kupwa namuchima wakulikanyisa mangana chivakafwe vahone kulinga ujila. Zangi yamwenemwene nayivakafwa vapwenga namuchima wakulikanyisa, kaha echi nachivakafwa vahone kwenyeka usoko wavo naYehova namutu uze navakalimbata nenyi.—Wavaka-Tesolonyika 1, 4:6.

19, 20. Uno vaka-Kulishitu vatela kumona ngachilihi ulo?

¹⁹ Mikanda yayivulu najivindiyo vyeji kusololanga vilika vyakulimbata vyavatu vaze vanawahilila chikuma. Oloze chilika chakulimbata chapwa kaha maputukilo aulo. Omu Yehova ahakileko ulo ajinyine ngwenyi wililenga.—Kuputuka 2:24.

²⁰ Vatu vavavulu makumbi ano vamona ulo kupwa wakashimbu kakandende kaha. Ngocho vamona kwingila muulo nakulilukulula kupwa vyuma vyavyashi kulinga. Vamwe vashinganyeka ngwavo nge muulo muli ukalu, kaha vatela kulilukulula. Oloze anukenu ngwenu Mbimbiliya yafwanyisa ulo kumukole wajitondo jitatu uze vanahoso. Mukole kana kaweshi kuhasa kumbituka numba nge navaukoka nangoloko. Ngocho nge natulombanga Yehova atukafwe, kaha ulo wetu nawilila. Yesu ambile ngwenyi: “Chuma chize Kalunga nanungu hamwe mutu kanda achihandununako.”—Mateu 19:6.

21. Vyuma muka navikafwa vaze valimbata valizangenga?

²¹ Tuvosena twatwama noho twajikijila noho twahehelela. Shikaho chinahase kupwa chachashi kutala hatutenga twavakwetu chikumanyi twamuka-mahyetu. Oloze kulinga ngocho nachitulingisa tuhone kupwa vakuwahilila. Shikaho nge natutalanga havilinga vyamwaza atwama navyo muka-mahyetu, kaha natulingisa ulo wetu upwenga wakuwahilila. Uno chapwa chachashi kuli etu vatu vakuhona kukupuka kutala havilinga vyamwaza vyamuka-mahyetu  tahi? Eyo. Yehova ejiva ngwenyi etu vatu katwakupukako, oloze eji kutalanga havilinga vyamwaza twatwama navyo. Uno kachi chapwa ngachilihi nge Yehova katalilenga havilinga vyamwaza twatwama navyoko? Muka-kwimba jisamu ambile ngwenyi: “Ove Ya, kachi nge weji kulamanga jishili, Ove Yehova, kachi iya mwemana kumeso ove?” (Samu 130:3) Vatu vaze valimbata vanahase kulondezeza Yehova hakutalanga havilinga vyamwaza vyamuka-mahyavo nakulikonekelanga.—Tangenu Wavaka-Kolose 3:13.

22, 23. Uno Apalahama naSala vahana ngachilihi chakutalilaho chamwaza kuli vaze valimbata?

 ²² Mukuhita chamyaka ulo weji kuzamanga. Apalahama napuwenyi Sala vashimbwile chikuma muulo, kaha nawa vapwilenga vakuwahilila. Halwola luze Yehova alwezele Apalahama aseze nganda yaUle, Sala apwile namyaka yakuhambakana 60. Kachapwile chachashi Sala kuseza limbo lyenyi lyauhando nakuya nakutwama mujimbalakako. Chipwe ngocho, Sala apwile lika pwevo wamwenemwene, kaha nawa avumbikilenga chikuma Apalahama. Ngocho akundwijilenga vyuma alingilenga lunga lyenyi nakumukafwa avitesemo.—Kuputuka 18:12; WaPetulu 1, 3:6.

²³ Chipwe ngocho, kupwa naulo wamwenemwene kachalumbununa nge valunga napwevo navalivwasananga muvyuma vyosenako. Lwola lumwe Apalahama akanyine vyuma amulwezele puwenyi Sala, oloze Yehova amulwezele ngwenyi: “Mwivwilile.” Ngocho Apalahama akavangijile vyuma amulwezele puwenyi, kaha chuma kana chavanganyalishile. (Kuputuka 21:9-13) Oloze kachi nge shimbu jimwe munalimbalaka namuka-mahyenu, kaha kamwatela kupihililako. Shikaho, chapwa chachilemu vatu vaze valimbata kutwalaho lika kulizanganga nakulivumbika numba nge vanalimbalaka.

24. Uno ulo wenu unahase ngachilihi kuvumbika Yehova?

²⁴ Muchikungulwilo chavaka-Kulishitu mwatwama vatu vavavulu chikuma vaze vapwa vakuwahilila mumalo avo. Ngocho, nge namusaka kumbata chipwe kusomboka, kaha tachikizenu ngwenu chapwa chachilemu kusakula kanawa mutu wakulimbata nenyi. Shikaho mwatela kulomba Yehova amitwaminyine, mwomwo vyuma namusakula vinahase kukaminganyalisa chipwe kukaminehela ukalu mukuyoya chenu. Kushinganyeka havyuma kana nachimikafwa muhase kusakula kanawa mutu wakulimbata nenyi, nakulizanga vyakwingila muulo, nakukazamisa ulo wenu, nakufwila kulizanga namuka-mahyenu, nakuvumbika Yehova.