1. Chuma muka twatela kulinga mangana kulemesa chetu vachivwile uselewa kuli Yehova, kaha mwomwo ika?

YESU ambile ngwenyi: “Vaka-kulemesa vamuchano navakalemesanga Tata mushipilitu namumuchano, mwomwo chikupu vene Tata ali nakutondatonda vatu vangana vamulemesenga.” (Yowano 4:23; 6:44) Ngocho, tuvosena twatela kutwalaho lika ‘kukekesanga tumone vyuma vize etavila Mwata.’ (Wavaka-Efwesu 5:10) Oloze kachapwa chachashi kulinga ngocho shimbu yosenako, mwomwo Satana asaka kutuhungumwisa tulinge vyuma vize navivwisa Yehova kupihya.—Kusoloka 12:9.

2. Lumbununenu vyuma vyasolokele omu vaIsalele vapwile kwakamwihi naPili yaShinai.

² Uno Satana eji kutuhungumwisanga ngachilihi? Jila yimwe eji kuzachisanga shina yakutuluwanganyisa havyuma vyamwaza nevi vyavipi. Achitalenu havyuma vyasolokele kuli vaIsalele omu vapwile kwakamwihi naPili yaShinai. Mose akandukile kupili, kaha vatu vapwile nakumuvandamina akinduluke. Kutwala muze vazeyele nakuvandamina, kaha valwezele Alone avatengele kalunga. Atengele likombelo lyamwanangombe waulu. Kaha vatu valingile chiwanyino. Vakinyine oku vali nakujinguluka kuli uze mwanangombe nakulifukula kuli ikiye. Vashinganyekele ngwavo kulifukula kuli lize likombelo chapwile kwijiva  nge vapwile nakulemesa Yehova. Numba tuhu vatu vashinganyekele ngwavo vapwile ‘nakulingila Yehova chiwanyino,’ oloze kachapwile ngochoko, mwomwo Yehova achimwene kupwa hikulemesa makombelo, kaha vatu vavavulu vavajihile. (Kulovoka 32:1-6, 10, 28) Vyuma muka natulinangulako? Kanda navamihungumwisako. “Kanda namukwata kuchuma chimwe chachipiko,” oloze itavilenu Yehova aminangule mutachikize vyuma vyakwoloka nevi vyakuhenga.—Isaya 52:11; Ezekele 44:23; Wavaka-Ngalesha 5:9.

3, 4. Mwomwo ika chapwila chakutamo kukekesa vilika vimwe nokwo vyafuma?

³ Omu Yesu apwile hano hamavu, anangwile vaposetolo jenyi jila yakwoloka yakulemeselamo Kalunga. Omu alingile hanafu lyehi, vaposetolo vatwalilileho lika kunangula tumbaji vavahya jindongi jamuMbimbiliya. Omu valingile vaposetolo vanafu lyehi, vaka-kunangula vamakuli vaputukile kunangula vatu vishinganyeka vyavo vyakuhenga, navisemwa navilika vyamakuli muchikungulwilo. Valumwine vilika vimwe vyamukwitava chamakuli nakuvivuluka majina eka mangana visoloke nge vyavaka-Kulishitu. (Wavaka-Tesolonyika 2, 2:7, 10; WaYowano 2, 6, 7) Vilika vyakufwana ngana vyavivulu vinalisale namakumbi ano, kaha vichili lika nakukundwiza kwitava chamakuli navandemone. *—Kusoloka 18:2-4, 23.

⁴ Mukaye kosena makumbi ano, vatu vamona vilika kanevi namakumbi akunoka kupwa vyavilemu chikuma mukuyoya chavo. Oloze omu namutwalaho lika kulinangula vyuma asaka Yehova, namumona jino ngwenu mwatela kwalumunako vishinganyeka vyenu havilika vimwe. Chinahase kusoloka kupwa chachikalu, oloze Yehova mwamikafwa. Tuchishimutwilenu havilika vimwe vize vyalisala  chikuma muno mukaye mangana tumone omu Yehova eji kwivwanga havilika kana.

5. Unjiho muka wasolola nge haDecember 25 keshi hakiko asemukile Yesuko?

⁵ Mumafuchi amavulu muno mukaye, vatu vavavulu veji kulinganga chilika chaKulisimasi halikumbi lyaDecember 25, mwomwo ngwavo likiko likumbi asemukile Yesu. Mbimbiliya kayatulweza kakweji chipwe likumbi asemukile Yesuko, oloze yasolola vyuma vyasolokele mulwola asemukile. Luka nawa asonekele ngwenyi, omu asemukile Yesu muMbetelema, “tufunga vatwaminenga muchipapa nakulama vimuna javo.” (Luka 2:8-11) Munganda yaMbetelema mukakweji waDecember, mweji kupwanga chishika, navula nambundu, ngocho tufunga kavahashilenga kutwama muchipapako. Vyuma muka natulinangula kumujimbu kana? Yesu kasemukile mukakweji waDecemberko. Mbimbiliya namijimbu yakunyima yasolola nge Yesu kasemukile muvulako, oloze asemukile kafwe muSeptember chipwe muOctober.

6, 7. (a) Uno vilika vyaKulisimasi vyaputukile ngachilihi?(b) Mwomwo ika twatela kuhanyina vakwetu mawana?

⁶ Uno Kulisimasi yaputukile ngachilihi? Yafuma kuviwanyino vyakwitava chamakuli vyakufwana nge chiwanyino chavaLoma chaSaturnalia chize valingililenga kalunga waunjimi vavuluka ngwavo Saturn. Mukanda waThe Encyclopedia Americana wamba ngwawo: “Chiwanyino chaSaturnalia vachilingilenga mukakweji waDecember chize chalingishile jino vatu vaputuke kulinga vilika vize vyatalishile kuKulisimasi. Chakutalilaho, hachiwanyino kanechi vatu valilenga kulya chamwaza, nakulihana mawana nakumunyika jikandulu.” Kaha nawa vatu vamuPeleja valingilenga chilika chalikumbi lyakusemuka kalunga kavo walikumbi vavuluka ngwavo Mithra haDecember 25.

 ⁷ Vatu vavavulu vaze veji kulinganga chilika chaKulisimasi makumbi ano, kavashinganyeka ngwavo chilika kana chafuma mukwitava chamakuliko. Veji kufwilanga kaha kupwa nachilika kana mangana vapwenga hamwe navaka-tanga yavo, nakulivwisa kuwaha kulya chamwaza nakulihana mawana. Nayetu vangamba jaYehova twazanga vausoko namasepa jetu, kaha nawa Yehova asaka vatu jenyi vapwenga namuchima wakuhana. Mukanda Wavaka-Kolinde 2, 9:7 watulweza ngwawo: “Kalunga azanga muka-kuhana nakuwahilila.” Yehova kasaka vangamba jenyi  vahanenga vakwavo mawana halwola lumwe lwakulipwila kahako. Vatu jaYehova veji kulihananga mawana navakwavo nakupwa hamwe namasepa javo navaka-tanga yavo hakala lwola. Kaha nawa kaveshi kufwelela kuvashishishilamo hawana navahanako. Veji kuhananga vakwavo mwomwo vavazanga.—Luka 14:12-14.

8. Uno vaze vaka-kuzachisa vatanganyika vahanyine Yesu mawana halwola apwile kemba tahi? Lumbununenu.

⁸ Hakusaka kukundwiza kulihananga mawana hachilika chaKulisimasi, vatu vavavulu vamba ngwavo halikumbi asemukile Yesu kwejile malunga vatatu vamangana vaze vanehelele Yesu mawana muulilo wavimuna. Chikupu vene, vatu vavavulu vayile nakumeneka Yesu nakumuhana mawana. Kushikulu, vatu vahanyinenga vatu vavalemu mawana. (Vamyangana 1, 10:1, 2, 10, 13) Tachikizenu ngwenu Mbimbiliya yahanjika ngwayo vaze malunga vatwalililile Yesu mawana vapwile vaka-kuzachisa vatanganyika vaze valingilenga visava, kaha nawa kavalemeselenga Yehovako. Ava malunga kavayile nakumeneka Yesu halwola apwile kemba muulilo wavimunako, oloze vayile nakumumeneka halwola luze apwile nakutwama navisemi jenyi muzuvo. Kaha chasoloka nge ava vaka-kuzachisa vatanganyika vatambukile tukweji vavavulu kufuma Kumusamuko hakuya nakumeneka Yesu. Ngocho vamuwanyine nakoloko lyehi.—Mateu 2:1, 2, 11.

9. Vilika muka vyamakumbi akusemuka vavuluka muMbimbiliya?

⁹ Likumbi eji kusemukanga kemba lyapwa hilikumbi lyakuwahilila. (Samu 127:3) Oloze echi kachalumbununa nge twatela kulinganga vilika vyamakumbi akusemukako. Tachikizenu ngwenu muMbimbiliya vavulukamo vilika vivali vyamakumbi akusemuka. Chatete, likumbi asemukile Fwalo wamuEjipitu, kaha chamuchivali, likumbi asemukile  Helote Andepa. (Tangenu Kuputuka 40:20-22; Mako 6:21-29.) Vatu kana ava kavapwile vaka-kuzachila Yehovako. Kaha nawa kanda tutangengaho lyehi muMbimbiliya ngwavo muka-kulemesa Yehova umwe alingile chilika chalikumbi lyakusemuka.

10. Uno vaka-Kulishitu vakulivanga vamwenenga ngachilihi vilika vyamakumbi akusemuka?

¹⁰ Mukanda waThe World Book Encyclopedia wamba ngwawo, vaka-Kulishitu vakulivanga “vamwenenga chilika chakwanuka kusemuka chamutu kupwa hichilika chavatu vakuzeneka kwitava.” Vilika kana vyapendaminyine hakwitava chamakuli. Chakutalilaho, vaHelase vakushikulu vafwelelelenga ngwavo mutu himutu vamukingilenga kuli mutu wakushipilitu halikumbi lyakusemuka. Vatu kana valingilenga vilika vyamakumbi akusemuka mwomwo vashinganyekelenga ngwavo kulinga vilika kana nachilingisa tulunga twavo vakinge mutu uze nasemuka. Kaha nawa vilika vyamakumbi akusemuka vyakundwiza vilinga vyavandemone vyakuzachisa vatanganyika hakusaka kutachikiza vyakulutwe.

11. Uno Yehova asaka tulingenga vyuma muka?

¹¹ Vatu vavavulu vashinganyeka nge likumbi vasemukile lyapwa hilikumbi vatela kusolola zangi namuchima wakusakwilila kuli vakwavo. Oloze tunahase kusolola muchima wazangi nakusakwilila kuli vausoko wetu chipwe masepa jetu hakala likumbi keshi halikumbi limwe kaha mumwakako. Yehova asaka tupwenga valikoji namuchima wakuhana lwola lwosena. (Tangenu Vilinga 20:35.) Tweji kusakwililanga Kalunga makumbi osena hakutuhana kuyoya, keshi halikumbi kaha lize twasemukileko.—Samu 8:3, 4; 36:9.

12. Uno likumbi lyakufwa lyawaha ngachilihi kuhambakana likumbi lyakusemuka?

¹² Mukanda waMuka-kwambulula 7:1 wamba ngwawo: “Lijina lyamwaza linawahe kuhambakana maji amwaza, kaha likumbi lyakufwa linawahe kuhambakana  likumbi lyakusemuka.” Uno likumbi lyakufwa linawahila halihi kuhambakana likumbi lyakusemuka? Omu tweji kusemukanga, katwasolola unjiho wavyuma vimwe vyamwaza chipwe vyavipi tunalingi mukuyoya chetuko. Oloze omu tweji kukolanga, tweji kuzachilanga Yehova nakulingila vakwetu vyuma vyamwaza. Ngocho tweji kutunganga jino “lijina lyamwaza” chipwe kupwa napuho yamwaza. Kaha Yehova mwakatwanuka numba nge tunafu. (Yopa 14:14, 15) Vatu jaYehova kavalinga vilika vyamakumbi avo akusemuka  chipwe likumbi asemukile Yesuko. Oloze Yesu atuhana lushimbi lwakulinga kaha chilika chaKwanuka Kufwa chenyi.—Luka 22:17-20; WavaHepeleu 1:3, 4.

13, 14. Uno chilika chaIshita chafuma kulihi?

¹³ Vatu vavavulu nge vanakulinga chilika chaIshita veji kwambanga ngwavo, veji kulinganga chilika chakusanguka chaYesu. Chilika chaIshita chafuma kuli Eostre, kalunga wapwevo wavaka-Anglo-Saxon wakututuka chalikumbi nachivatuko chavula. Mukanda waThe Dictionary of Mythology walumbununa ngwawo naikiye apwile kalunga walusemo. Visemwa vyaIshita vyakundwiza kalunga kana. Chakutalilaho, mukanda waEncyclopædia Britannica wamba ngwawo, maulu “apwa hichifwanyisa chachilemu chakusolola kusemuka chamutu nakusanguka.” Kaha nawa hamyaka yayivulu vambwanda vanavasololanga kupwa chinjikizo chalusemo mukwitava chamakuli. Echi chasolola hatoma nge chilika chaIshita kachapwa hikusanguka chaYesuko.

¹⁴ Yehova eji kwivwanga kupihya nge vatu navafutula vilika vyamukwitava chamakuli nakusanguka chaMwanenyi. (Wavaka-Kolinde 2, 6:17, 18) Ngocho Yehova katulweza tulingenga chilika chakusanguka chaYesuko.

15. Uno chilika chamwaka wauhya chafuma kulihi?

¹⁵ Lifuchi hilifuchi lyatwama najila yalyo yeji kulingilangamo chilika chamwaka wauhya. Chipwe ngocho, mumafuchi amavulu vatu veji kunyingamanga haDecember 31. Kaha nawa kakavulu omu veji kunyingamanga, vatu veji kulinganga ujila nakupenda. Chilika chamwaka wauhya chafuma mukwitava chamakuli. Mukanda waThe World Book Encyclopedia wamba ngwawo: “VaLoma vakunjikile likumbi kaneli kuli kalunga wavikolo namaputukilo, vavuluka ngwavo Janus. Lijina lyakakweji waJanuary lyafuma  kuli Janus, kalunga uze apwile navihanga vivali, chimwe kulutwe chikwavo kunyima.” Shikaho, viwanyino vyaMwaka Wauhya vyafuma kuvisemwa vyavaze vazeneka kwitava.

16, 17. Vyuma muka twatela kushinganyekela chimweza nge tunakusaka kupwa nachilika chakulimbata?

¹⁶ Chilika chakulimbata cheji kwivwisanga vatu kuwaha. Vatu muno mukaye veji kulinganga vilika vyakulimbata mujijila jakulisezaseza. Kakavulu, vatu kavashinganyeka okwo kwafuma visemwa veji kulinganga vatu havilika vyakulimbatako, ngocho kaveshi kuhasa kutachikiza ngwavo visemwa vimwe vyafuma mukwitava chamakuliko. Oloze vaka-Kulishitu vaze navasaka kulimbata vatela kumona ngwavo chilika chavo chakulimbata nachivwisa Yehova kuwaha. Nge vatachikiza kwafuma visemwa veji kulinganga vatu havilika vyakulimbata, kaha nachivakafwa vasakule kanawa vyakulinga.—Mako 10:6-9.

¹⁷ Vatu vafwelela ngwavo, visemwa vimwe veji kulinganga havilika vyakulimbata vyeji kunehanga ‘kutokwa’ kuli vaze navalimbata. (Isaya 65:11) Chakutalilaho, kuvihela vimwe vatu veji kumwangilanga loso chipwe vyuma vyeka mwilu nakuholokela hali samwenga namwenga. Vatu veji kulinganga ngocho mwomwo yakushinganyeka ngwavo vyuma kana navikafwa vaze vanalimbate vapwenga vakuwahilila, nakupwa navana, nakushimbula muulo wavo nakuvakinga kuvyuma vyavipi. Oloze vaka-Kulishitu vatela kulihenda kukala chuma chize chakundwiza kwitava chamakuli.—Tangenu Wavaka-Kolinde 2, 6:14-18.

18. Jindongi muka jikwavo jamuMbimbiliya jize munahase kuzachisa kuvilika vyakulimbata?

¹⁸ Chilika chakulimbata chavaka-Kulishitu chatela kupwa chamwaza, chakavumbi nakulingisa vatu vosena  vawahilile. Vatu vaze naveza kuchilika chakulimbata chavaka-Kulishitu kavatela kupwa nahanjikiso yakasautu, chipwe kuhanjika vyuma vize navineha peha chipwe vyuma vize navihona kuvumbika vasamwenga namwenga navatu vaze vaneza kuchilikako. (Vishimo 26:18, 19; Luka 6:31; 10:27) Chilika chakulimbata chavaka-Kulishitu kachakundwiza muchima ‘wakutembesa vyuma atwama navyo mutu mukuyoya chenyiko.’ (WaYowano 1, 2:16) Mwatela kuwahisa chilika chenu chakulimbata mujila yamwaza, mangana nge chinakumu mukapwe vakuwahilila hakushinganyeka ngwenu vyuma vyosena mwavilingile kanawa.—Talenu Chinyikilo chaKusongo 28.

19, 20. Uno chisemwa chakulinjengula jipasa chafuma kulihi?

¹⁹ Kakavulu havilika vyakulimbata nahaviwanyino vyeka, vatu veji kulinjengulanga jipasa. Omu vatu veji kulinjengulanga jipasa, mutu umwe eji kuhanjikanga mazu akukisula kaha vakwavo navazundula jipasa. Uno vaka-Kulishitu vatela kumona ngachilihi echi chisemwa chakulinjengulanga jipasa?

²⁰ Mukanda waInternational Handbook on Alcohol and Culture wahanjika ngwawo, chisemwa chakulinjengula jipasa chafuma mukwitava chamakuli chakushikulu muze “vahanyinenga wana wajila wakuhingunwina tulunga twavo.” Valingilenga ngocho “mangana vavakisule, nakulomba mukavatu ngwavo ‘vayoye myaka yayivulu’ chipwe ‘valikangule kumijimba.’” Kushikulu, vatu vazundwilenga jipasa javo, mangana valombe kutulunga twavo vavakisule. Oloze Yehova kakisula vatu jenyi mujila kaneyiko.—Yowano 14:6; 16:23.

21. Vilika vyeka muka vatela kulihendako vaka-Kulishitu?

²¹ Nge muli nakusaka kwazana muvilika vimwe, kaha chatete vangilenu kushinganyeka havisemwa navilinga vimwe vyakundwiza chilika kana. Chakutalilaho, kuvilika vimwe kweji kupwanga kukina chize cheji kusangumunanga peha yakusaka kulisavala, nakupenda naujila. Vilika kana vinahase nawa kukundwiza kulisavala chavatu vausonyi woumwe chipwe muchima wakulitala hamalimi. Nge natwazana muvilika kanevi, kutala tuli nakuhunga vyuma vize ahunga Yehova tahi?—Samu 1:1, 2; 97:10; 119:37.

22. Vyuma muka navikafwa muka-Kulishitu asakule kuya kuchilika chipwe chiku?

²² Vaka-Kulishitu vatela kuzata nangolo mangana valihende kuvilika vize kavyavumbika Kalungako. Paulu asonekele ngwenyi: “Numba nge muli nakulya chipwe muli nakunwa, chipwe cheshocho muli nakulinga, lingenunga vyuma vyosena mujila yize nayimutohwesa Kalunga.” (Wavaka-Kolinde 1, 10:31; talenu Chinyikilo chaKusongo 29.) Echi kachalumbununa nge vilika vyosena vyakundwiza ujila, nakwitava chamakuli chipwe muchima wakulitala hamalimiko. Nge chilika kana kachalimbalaka najindongi jamuMbimbiliyako, kaha twatela kulisakwila etu vavene kuyako nyi chiku. Kaha nawa twatela kushinganyeka omwo navevwa vakwetu havyuma natusakula kulinga.

23, 24. Tunahase kulumbunwina ngachilihi vausoko wetu vaze kavapwa Vinjiho jaYehovako ovyo twalihendela kuvilika vimwe?

²³ Twafwelela ngwetu mwecha lyehi kwazana muvilika vize kavyavumbika Yehovako. Vausoko wenu vaze kavapwa Vinjiho jaYehovako vanahase kushinganyeka ngwavo kamwavazangako chipwe kamwasaka kupwa navoko mwomwo  ngwavo hamakumbi akunoka hakiko kaha munahase kutwama hamwe navausoko wenu. Nge chili ngocho, kaha namulinga ngachilihi? Kuli vyuma vyavivulu vize munahase kulinga mangana musolole ngwenu mwavazanga kaha nawa mwavamona kupwa vavalemu. (Vishimo 11:25; Muka-kwambulula 3:12, 13) Munahase kuvasanyika kala lwola munasake mangana mushikame navo.

²⁴ Nge munakusaka kulweza vausoko wenu vatachikize ovyo mwakanyina kwazana mumakumbi amwe akunoka, kaha hehwojolenu mumikanda yetu naha jw.org/lue, mangana muwane vyuma vize navimikafwa muvalumbunwine ovyo kamwazanyina mumakumbi amwe akunokako. Kanda kuvalingisa vashinganyeke ngwavo muli nakusaka kuvafungulula chipwe kuvashinyinyika vakavangize vishinganyeka vyenuko. Kafwenu vaka-tanga yenu vatachikize ngwavo mwakekesele vyuma vyavivulu hakusakula vyakulinga. Shikaho pwenunga vakuunda nakulingisa “mazu enu apwenganga akukokweza shimbu yosena, akutova mungwa.”—Wavaka-Kolose 4:6.

25, 26. Visemi vanahase kukafwa ngachilihi vana vavo vakavangizenga jindongi jamuMbimbiliya?

²⁵ Chapwa chachilemu tuvosena kutachikiza ovyo katweshi kwazanyina muvilika vimweko. (WavaHepeleu 5:14) Chuma twafwila shina kwivwisa Yehova kuwaha. Kaha nawa nge twapwa tuvisemi, twatela kufwila kunangula vana vetu vatachikize jindongi jamuMbimbiliya nakujimona kupwa jajilemu. Omu navashinganyeka ngwavo Yehova apwa mutu nahenyi, navakiko navafwila kumwivwisa kuwaha.—Isaya 48:17, 18; WaPetulu 1, 3:15.

²⁶ Yehova naikiye eji kwivwanga kuwaha hakumona tuli nakumulemesa mujila yakwoloka namukashishi. (Yowano 4:23) Vatu vavavulu vashinganyeka ngwavo mutu keshi kuhasa kupwa nakashishi mukaye kano kazala navatu vakuzeneka kashishiko. Uno mukiko tahi? Natushimutwila chihande kanechi mukapetulu nakavangizaho.