1, 2. Mwomwo ika mwazangila Yehova Kalunga?

UNO mwazanga Kalunga tahi? Chikupu vene mwamuzanga, shikaho mwalihanyinyine kuli ikiye. Kaha mwamumona kupwa Sepa lyenu mwazanga chikuma. Oloze Yehova ikiye alivangile kumizanga shimbu kanda mumuzange yenu. Mbimbiliya yamba ngwayo: “Etu twazanga [Kalunga], mwomwo ikiye alivangile kutuzanga etu.”—WaYowano 1, 4:19.

² Achishinganyekenu omu Yehova atuzanga. Atuhana ano mavu tutwameho, nakuhakaho vyuma vyosena vize twasaka mukuyoya. (Mateu 5:43-48; Kusoloka 4:11) Asaka tupwenga nausoko wamwaza naikiye, kaha atukafwa tulinangule vyaikiye. Nge tunakutanga Mbimbiliya, kaha tuli nakwivwilila kuli ikiye. Kaha nawa nge tuli nakulomba, ikiye ali nakwivwilila kuli etu. (Samu 65:2) Eji kututwaminyinanga nakutujikijisa nashipilitu yenyi yajila. (Luka 11:13) Kaha nawa atumine Mwanenyi wakulipwila hano hamavu kwiza nakutusokola kushili nakukufwa.—Tangenu Yowano 3:16; Wavaka-Loma 5:8.

3. Tunahase kulama ngachilihi usepa wetu naYehova?

³ Achishinganyekenu hali sepa lyenu mwazanga chikuma uze namikafwenga nahalwola lwaukalu. Kupwa  nausepa wamuyachou chasakiwa kuzata nangolo mangana mulame usepa wenu. Omu mukiko wapwa nausepa wetu naYehova, uze apwa Sepa lyetu twazanga chikuma. Usepa wetu nayikiye unahase kutwalaho haya myaka yosena. Shikaho Mbimbiliya yatulweza ngwayo: ‘Twamenunga muzangi yaKalunga.’ (WaYuta 21) Tunahase kulinga ngachilihi ngocho? Mbimbiliya yakumbulula ngwayo: “Kuzanga Kalunga chalumbununa kulamanga jishimbi jenyi, kaha jishimbi jenyi kajapwa nge hichiteliko.”—WaYowano 1, 5:3.

4, 5. (a) Uno “kuzanga Kalunga” chalumbununa ika? (b) Uno mwaputukile ngachilihi kuzanga Yehova?

⁴ Uno Mbimbiliya yatalikisa mulihi hakwamba ngwayo “kuzanga Kalunga”? Kayalumbununa zangi yaKalunga yakutuzanga etuko, shina zangi yetu yakumuzanga ikiye. Uno muli nakwanuka lwola mwaputukile kuzanga Yehova tahi?

⁵ Achishinganyekenu lwola lwatete mwalinangwile nge Yehova asaka mukayoye haya myaka yosena mukaye kakahya. Mwalinangwile vyuma vize namilingila mangana mukayoye, echi chamilingishile mwanuke ngwenu Yehova atuhanyine wana wakulipwila hakutuma Mwanenyi kwiza hano hamavu. (Mateu 20:28; Yowano 8:29; Wavaka-Loma 5:12, 18) Omu mwatachikijile jino ngwenu Yehova amizanga, mwakunyukile nakuputuka kumuzanga nayenu.—Tangenu WaYowano 1, 4:9, 10.

6. (a) Uno kuzanga mutu chasakiwa kulinga vyuma muka? (b) Uno kuzanga Kalunga chamilingishile mulinge vyuma muka?

⁶ Lwola luze mwaputukile kuzanga Kalunga lwapwile kaha himaputukilo akumuzachila. Chakutalilaho, kachi nge tunazange mutu, katwakumina kaha hakuhanjika  ngwetu, “Ngwakuzangako.” Zangi yeji kutukunyulanga tulinge vyuma vize navimwivwisa kuwaha. Chochimwe nawa, kuzanga Yehova chikiko chamilingishile muputuke kulinga vyuma vize navimwivwisa kuwaha. Omu mwatwalileho lika kumuzanga, hakiko mwalihanyine kuli ikiye nakumimbapachisa. Kulinga vyuma kana, chasolwele nge mwashikile Yehova ngwenu namumuzachilanga haya myaka yosena. (Tangenu Wavaka-Loma 14:7, 8.) Munahase kulama ngachilihi lushiko kana?

7. Vyuma muka twatela kulinga kachi nge twazanga Yehova, kaha jishimbi jenyi jimwe japwa jika?

⁷ Hakuwana nge twazanga Yehova, ngocho tweji “kulamanga jishimbi jenyi.” Mujila muka? Hakumwononokanga. Mbimbiliya yatulweza vyuma asaka Yehova kuli etu. Chakutalilaho, Yehova atulweza ngwenyi chapwa chakuhenga kupenda, nakwiva chipwe kulyonga, nakulisavala namutu uze kapwa muka-mahyetuko, chipwe kulemesa mutu chipwe vyuma vyeka.—Wavaka-Kolinde 1, 5:11; 6:18; 10:14; Wavaka-Efwesu 4:28; Wavaka-Kolose 3:9.

8, 9. Natutachikiza ngachilihi vyuma anakusaka Yehova tulinge okunyi jishimbi jamuMbimbiliya kajahanjika hatoma havyuma kanako? Hanenu chakutalilaho.

⁸ Kwivwisa Yehova kuwaha chasakiwa kulinga vyuma vyavivulu keshi kukavangiza kaha jishimbi jenyiko. Yehova katuhana mukana wajishimbi jize twatela kukavangiza muvyuma vyosenako. Ngocho, shimbu jimwe kunahase kupwa vyuma vimwe vize Mbimbiliya kayahanjikaho hatomako. Jino natuhasa ngachilihi kusakula vyuma vyakwoloka? (Wavaka-Efwesu 5:17) MuMbimbiliya mwatwama jindongi jize jasolola omu Yehova amwenamo vyuma.  Omu natutanganga Mbimbiliya, natutachikiza ngwetu Yehova apwa mutu nahenyi. Kaha nawa tweji kutachikizanga omu eji kushinganyekanga navyuma azanga navize ahunga.—Tangenu Samu 97:10; Vishimo 6:16-19; talenu Chinyikilo chaKusongo 1.

⁹ Chakutalilaho, Yehova katulweza hatoma vyuma twatela kutalanga hachisaji chamivwimbimbi chipwe haInternetko. Oloze jindongi jamuMbimbiliya jinahase kutukafwa tusakule vyuma twatela kutala navize katwatela kutalako. Makumbi ano kuhema chachivulu chili nakusolola ulyanyi navilinga vyaujila. Yehova atulweza kuhichila muMbimbiliya ngwenyi, “ahunga weshowo azanga ulyanyi,” kaha nawa ngwenyi “mwakasopesa vaka-ujila.” (Samu 11:5; WavaHepeleu 13:4) Uno eji jindongi najitukafwa ngachilihi tusakule kanawa vyakulinga? Nge natutachikiza ngwetu vyuma kana Yehova avihunga chipwe avimona kupwa vilinga vyamajilo, kaha katwatela kuvilingako.

10, 11. Mwomwo ika tweji kwononokelanga Yehova?

¹⁰ Mwomwo ika twatela kwononoka Yehova? Katwononoka Yehova mwomwo yakuchina kutuzangamisa chipwe yaukalu weji kwizanga mwomwo yakulinga vyuma vyavipiko. (Wavaka-Ngalesha 6:7) Oloze tweji kwononokanga Setu wamwilu Yehova, mwomwo twamuzanga, nakusaka kumwivwisa kuwaha ngana muze vana vasaka kwivwisa sevo kuwaha. Kwivwisa Yehova kumuchima kuwaha chikiko chuma chachilemu chikuma.—Samu 5:12; Vishimo 12:2; talenu Chinyikilo chaKusongo 2.

¹¹ Tweji kwononokanga Yehova nahalwola navitukaluhwila vyuma. Kaha nawa katwasakula jishimbi jize twatela kukavangiza najize katwatela kukavangizako. (Lushimbi  lwamuchivali 12:32) Oloze tweji kumwononokanga namichima yetu yosena nakwivwa ngana muze evwile muka-kwimba jisamu uze ambile ngwenyi: “Ngwasaka jishimbi jove, ngwajizanga vene.” (Samu 119:47; Wavaka-Loma 6:17) Kaha nawa twasaka kupwa ngana mwaNowa uze azangile Yehova nakulinga vyuma vyosena vize amulwezele kulinga. Mbimbiliya ngwayo, Nowa “alingile vene ngocho.” (Kuputuka 6:22) Uno munakusaka Yehova ahanjike mazu kana nakuli yenu tahi?

12. Uno tunahase kwivwisa ngachilihi Yehova kuwaha?

¹² Yehova eji kwivwanga ngachilihi nge natumwononoka? Eji kwivwanga “kumuchima kuwaha.” (Vishimo 11:20; 27:11) Twapwa vakutokwa chikuma hakwivwisanga kuwaha Tengi uze atenga vyuma vyosena. Oloze katushinjila kumwononokako, atuhana lisesa lyakulisakwila. Echi chalumbununa nge tukwechi lisesa lyakulisakwila kulinga vyuma vyakwoloka chipwe vyakuhenga. Yehova asaka etu tumuzange, kaha zangi kana yatela kutulingisa tusakule kanawa vyakulinga mangana tuyoyenga kanawa.—Lushimbi lwamuchivali 30:15, 16, 19, 20; talenu Chinyikilo chaKusongo 3.

13, 14. Twatachikiza ngachilihi ngwetu jishimbi jaKalunga kajapwa jajikalu kukavangizako? Lumbununenu.

¹³ Ngachilihi nge natushinganyeka ngwetu jishimbi jaYehova japwa jajikalu kujikavangiza, chipwe kushinganyeka ngwetu jinahase kutulingisa tuhone kupwa vatu vakulihehwa? Mbimbiliya yamba ngwayo: “Jishimbi jenyi kajapwa nge hichiteliko.” (WaYowano 1, 5:3) Lizu lyachiHelase valumuna ngwavo “chiteli,” lyalumbununa “chuma chachilemu.” Muvisoneka vikwavo, eli lizu lyalumbununa  jishimbi jauleya chipwe vatu vasaka kuyula vakwavo mujila yayipi nakuvevwisa kupihya. (Mateu 23:4; Vilinga 20:29, 30) Mbimbiliya yaNew English Translation yamba ngwayo: “Jishimbi jenyi kajeshi kutushinyinyikako.” Jishimbi jaYehova kajeshi kutulemuwisako kulumbununa nge kajapwa jajikalu kujikavangizako. Yehova katulweza kulinga vyuma vize katweshi kuhasa kulingako.

¹⁴ Achishinganyekenu muli nakukafwa sepa lyenu uze ali nakwalukila kuchihela cheka. Nalongejeka kanawa viteli vyenyi. Viteli vimwe vyavilelu, oloze vikwavo vyavilemu chikuma navisakiwa kuvimbata kuvatu vavali. Kutala sepa lyenu nahase kumilweza mumbate chiteli chachilemu ukawenu tahi? Nduma. Mwomwo ika? Mwomwo keshi nakusaka mulivulumuneko. Ngana mwasepa lyenu, Yehova keshi kuhasa kumilweza mulinge vyuma vize nejiva ngwenyi vyavikaluko. (Lushimbi lwamuchivali 30:11-14) Yehova atutachikiza kanawa omu twapwa. Ikiye “atachikiza kanawa omu atutenga, atachikiza ngwenyi twapwa tulukungu kaha.”—Samu 103:14.

15. Mwomwo ika twatela kufwelela ngwetu jishimbi jaYehova jeji kutunganyalisanga?

¹⁵ Mose alwezele vaIsalele ngwenyi jishimbi jaYehova javakafwile ‘vamonenga kuwaha,’ kaha nawa ambile ngwenyi kwononoka chavo nachivakafwa ‘vayoyenga lika.’ (Lushimbi lwamuchivali 5:28-33; 6:24) Omu mukiko chili namakumbi ano. Kala vyosena ovyo mwatulweza Yehova kulinga vyeji kutukafwanga mukuyoya chetu. (Tangenu Isaya 48:17.) Setu Yehova atachikiza vyuma vize navitukafwa. (Wavaka-Loma 11:33) Mbimbiliya yatulweza ngwayo: “Kalunga ikiye zangi.” (WaYowano 1, 4:8) Echi chalumbununa nge vyuma vyosena eji kuhanjikanga nakulinga eji kuvilinganga mwomwo yazangi.

16. Twatachikiza ngachilihi ngwetu natwononokanga Yehova numba tuhu katwakupukako kaha nawa twatwama mukaye kakuhuka?

 ¹⁶ Kachapwa chachashi lwola lwosena kwononoka Kalungako, mwomwo twatwama mukaye kakuhuka kaze vayula kuli Liyavolo. Eji kufwilanga kuhungumwisa vatu valinge vyuma vyavipi. (WaYowano 1, 5:19) Twatela nawa kulwa navishingayeka vyetu vyavipi mwomwo vinahase kutulingisa tulikange kuli Kalunga. (Wavaka-Loma 7:21-25) Oloze kuzanga Yehova cheji kutukafwanga tulinge vyuma vyakwoloka. Eji kumonanga omu tweji kukilikitanga mangana tumwononoke, kaha nawa eji kutukafwanga hakutuhana shipilitu yenyi yajila. (Samwele 1, 15:22, 23; Vilinga 5:32) Shipilitu yajila yeji kutukafwanga tupwenga navilinga vyamwaza vize navitukafwa twononoke Yehova.—Wavaka-Ngalesha 5:22, 23.

17, 18. (a) Vyuma muka natulinangula mumukanda uno? (b) Vyuma muka natushimutwila mukapetulu nakavangizaho?

¹⁷ Mumukanda uno, natulinangula omu twatela kuyoyelamo mangana twivwise Yehova kuwaha. Natulinangula nawa omu tunahase kuzachisa jindongi jaYehova najishimbi jenyi mukuyoya chetu. Twatela kwanuka ngwetu Yehova katushinjila tumwononokeko. Nge natumwononoka, kaha chiyoyelo chetu nachipwa kanawa nakutulingisa tukayoye haya myaka yosena. Shikaho, kwononoka Kalunga chapwa chachilemu chikuma mwomwo nachisolola nge twamuzanga chikuma.—Talenu Chinyikilo chaKusongo 4.

¹⁸ Yehova atuhana chivezu mangana chitukafwe kutachikiza vyuma vyakwoloka navyevi vyakuhenga. Nge natunangula chivezu chetu, kaha nachitukafwa ‘tulamenga jishimbi’ jaKalunga. Uno chivezu chapwa chika, kaha tweji kuchinangulanga ngachilihi? Natukumbulula vihula kana mukapetulu nakavangizaho.