Muli nakusaka kuhehwojola vihande vimwe mangana mupwenga nachinyingi chachivulu chamuMbimbiliya tahi? Namusaka kutachikiza chikuma chisoneka chimwe, chipwe mutu umwe, chipwe chihela chimwe, chipwe chuma cheka vavuluka muMbimbiliya tahi? Uno kamwejiva kanawako nge Mazu aKalunga anahase kumikafwa haukalu wenu tahi? Nge mukiko, kaha zachisenu chisete chamikanda chahaZuvo yaWangana.

Chatwama namikanda yayivulu yize nayimikafwa. Pamo kamweshi namikanda yaVinjiho jaYehova yosena yize yahanjika haMbimbiliya yamulilimi lyenuko. Oloze chisete chamikanda chahaZuvo yaWangana chikwechi mikanda yayivulu yakalinwaha. Chinahase kupwa nawa najiMbimbiliya jamumalimi akulisezaseza, nandikishonali yangolo, namikanda yeka yize yinahase kumikafwa. Munahase tuhu kuzachisa echi chisete chamikanda shimbu kanda mukunguluke chipwe hanyima yakukunguluka. Nge muchisete chamikanda muli nakopyuta, kaha chatela kupwa naWatchtower Library. Watchtower Library hipolongalamu yahakopyuta yize yatwama namikanda yetu yakulisezaseza, yize yikwechi nawa jila yayashi yakuwanyinamo vihande, mazu, chipwe visoneka.

Cheji kukafwanga chikuma vaze vali muShikola yaMulimo waTeokalasi. Nge mwalisonekesa mushikola kaneyi, kaha munahase kuzachisanga chisete chamikanda chahaZuvo yaWangana hakuwahisa vihande vyenu. Kalama washikola yikiye atala hachisete kanechi. Ikiye atela kumona chikupu ngwenyi omu muchisete muli mikanda yayihya yosena, kaha nawa vanayitumbika mukulonga. Kalama washikola chipwe ndumbwetu eji kuminangulanga Mbimbiliya vakivo vanahase kumilweza mwakuwanyina mijimbu muli nakusaka. Oloze mikanda kana kavatela kuyifumisa muZuvo yaWanganako. Kaha nawa twatela kuyilama kanawa chakuzeneka kuyisonejeka.

Mbimbiliya yalumbununa ngwayo hakusaka “kumutachikiza Kalunga,” twatela kutondatonda chinyingi “nakuchitalatala nge luheto lwakuvumbika mumavu.” (Vishimo 2:1-5) Chisete chamikanda chamuZuvo yaWangana chinahase kumikafwa hakusandasanda vihande.

• Mikanda muka yatwama muchisete chamikanda chili muZuvo yaWangana?

• Veya vanahase kumikafwa mwijive kanawa mwakuzachishila chisete chamikanda?