Liuka lyetu lili nakusonekanga jiMbimbiliya namikanda yeka yayivulu nakuyihana kuvatu mwaka himwaka chakuzeneka kufwetesa. Tweji kutunganga jiZuvo jaWangana najiofesi jamutango nakujilama kanawa. Tweji kulamanga vaka-Mbetele navamishonali vavavulu, nakukafwa vatu vali muukalu wakulijila. Pamo munahase kulihulisa ngwenu, ‘Uno jimbongo veji kuzachisanga kumilimo yoseneyi jeji kufumanga kulihi?’

Katweshi kuhana chakusokesa mulikumi chipwe kufwetesa vatu chipwe kuhichisamo malonga akuhakamo jimbongoko. Numba tuhu mulimo wetu wakwambulula wasakiwa jimbongo jajivulu, oloze katweshi kulinga jakulombako. Mulikulukaji lyamyaka linahichi kunyima, muKaposhi Kakutalila mwapwile chihande chamuchivali chize chavulukile nge Yehova ikiye eji kutukundwizanga, ngocho “katweshi kukalomba chipwe kulembelela vatu vatuhanenga jimbongo jakutukafwako.” Kaha chikupu vene katwalinga ngochoko.—Mateu 10:8.

Milimo yetu veji kuyikundwizanga nawana wakulisakila. Vatu vavavulu veji kutusakwililanga hamulimo wetu wakunangula Mbimbiliya, kaha veji kuhananga wana wakuukundwiza. Vinjiho jaYehova mukaye kosena veji kulisuulanga nakuzachisa lwola lwavo, nangolo javo, najimbongo javo naluheto lwavo nakulinga mwaya muchima waKalunga. (Mijimbu 1, 29:9) KujiZuvo jaWangana kwatwama vikasha vyakuhakamo wana kuli vaze navasaka kulinga ngocho. Kakavulu jimbongo kaneji jeji kufumanga kuli vaze kavatwama naluheto chikumako vakufwana nge uze tuliwe wakuhutwa vasangejekele kuli Yesu uze ahakile tujimbongo twachichele tuvali muchikasha chamawana mutembele. (Luka 21:1-4) Ngachize, kala mutu nahase ‘kulamangako vimwe’ lwola lwosena ‘nge omwo najinyi mumuchima wenyi.’—Wavaka-Kolinde 1, 16:2; Wavaka-Kolinde 2, 9:7.

Twafwelela ngwetu Yehova mwatwalaho lika nakulingisa michima yavaze navasaka ‘kumuvumbikanga navikumba vyavo’ vakundwize mulimo waWangana mangana mwaya muchima wenyi mutesemo.—Vishimo 3:9.

• Vyuma muka vyalingisa liuka lyetu lilihandunune kumauka akwavo amukwitava?

• Uno mawana akulisakila veji kuwazachisanga ngachilihi?