Yesu Kulishitu alwezele vaka-kumukavangiza ngwenyi: “Mumunyi wenu umunyikenga kuvatu mangana vamonenga vilinga vyenu vyamwenemwene nakumutohwesanga Senu uze ali mwilu.” (Mateu 5:16) Ngocho, tuli nakuzachisa jino namakina oholyapwa, hohamwe vene naInternet. Keyala yetu yapwa www.pr418.com. Aha hakiko hatwama vyuma twafwelela etu Vinjiho jaYehova namilimo yetu. Vihande muka vahakaho?

Vakumbululaho vihula veji kuhulisanga chikuma vatu kupandama kuMbimbiliya. Munahase kuwana omu vakumbulula vihula vyavilemu vize veji kuhulisanga vatu. Vihula vimwe 6 vavikumbulula mutalakiti yakwamba ngwavo Uno Unakusaka Kutachikiza Muchano Tahi? yize yili haInternet mumalimi kafwe 400. Munahase nawa kuwana Mbimbiliya yaNew World Translation mumalimi akulisezaseza namikanda yeka yahanjika haMbimbiliya hohamwe namukanda wakwamba ngwavo Uno Chikupu Mbimbiliya Yanangula Vyuma Muka? najimangazini jajihya jaKaposhi Kakutalila naAwake! Munahase nawa kutanga mikanda yayivulu chipwe kuyivwilila kaha haInternet. Munahase kukopolola mazu, chipwe PDF, chipwe EPUB. Munahase kupulita namafwo amikanda amandende namuzachisa hakushimutwila namutu mwasaka kulinangula muchano mulilimi lyenyi. HaInternet yetu hali najivindiyo jajivulu jamulilimi lyatuveveve. Munahase kukopa mazu amuMbimbiliya aze vatanga nge chimweso, navimweso vyamuMbimbiliya namyaso yamwaza yize namulivwisa kuwaha nge muli nakulihizumuna.

Mijimbu yamuchano yakuvuluka Vinjiho jaYehova. HaInternet hali namijimbu yayihya najivindiyo jize jili nakusolola milimo yetu yamukaye kosena, naukalu vali nakumona Vinjiho jaYehova, nomu tweji kukafwanga vaze vali muukalu wakulijila. Munahase nawa kuwanaho kukunguluka changalila chili nakwiza kulutwe najikeyala jajiofesi jamitango yetu.

Hakuzachisa jijila kaneji, tuli nakumunyika muchano kumafuchi atwama kwakusuku chikuma kwahita kaye kwosena. Vatu vamumatungu osena, hohamwe vene nalitungu lyaAntarctica vali nakunganyala chikuma. Tuli nakulomba mangana “mazu aYehova ayenga nakutanda washiwashi” mukaye kosena nakulingisa jino Kalunga vamwalise.—Wavaka-Tesolonyika 2, 3:1.

• Uno keyala yawww.pr418.com yili nakukafwa ngachilihi vatu vavavulu valinangule muchano wamuMbimbiliya?

• Vyuma muka muli nakusaka kukahehwojola haInternet hakeyala yetu?