Chilongesa 18
Tweji Kukafwanga Ngachilihi Vandumbwetu Vali muUkalu?
Dominican Republic
Japan
Haiti
Nge kunasoloka ukalu, Vinjiho jaYehova hahaze vene veji kuwahisanga vyuma nakuputuka kukafwa vandumbwavo vali muukalu kana. Echi cheji kusololanga zangi yamuchano yize twalizanga umwe namukwavo. (Yowano 13:34, 35; WaYowano 1, 3:17, 18) Mujijila muka tweji kukafwilangamo vandumbwetu?
Tweji kukungululanga jimbongo. Omu mwapwile zala yakalombolombo muYuleya, vaka-Kulishitu vakulivanga muAndeyoka vatumine jimbongo jakukafwa vandumbwavo vakushipilitu. (Vilinga 11:27-30) Chochimwe nawa, omu tweji kwivwanga ngwavo vandumbwetu mumafuchi amwe vali muukalu, tweji kutumanga jimbongo kuhichila muchikungulwilo chetu mangana jikakafwe vandumbwetu vaze vali muukalu.—Wavaka-Kolinde 2, 8:13-15.
Tweji kukafwanga namujijila jeka nawa. Vakulwane vaze veji kupwanga kuchihela kuze kunasoloka ponde veji kutondatondanga mutu himutu wamuchikungulwilo vamone nge vosena vali kanawa. Vaka-komiti yakukafwa veji kutwaminyinanga mulimo wakukungulula vyakulya, nameya amwaza akunwa, navyakuvwala, nahakusavala navitumbo vyakukafwa vandumbwavo. Vinjiho vavavulu vaze vatachikiza milimo yimwe veji kulisuulanga kuzachisa jimbongo javo nakuya nakukafwa vandumbwavo chipwe kuya nakuwahisa jizuvo javandumbwavo najiZuvo jaWangana jize jinapuzuka. Cheji kupwanga chachashi kukungulula washi vyuma vyakukafwa vandumbwetu vali muukalu mwomwo twalinunga nakuzachila hamwe. Numba tuhu tweji kukafwanga chikumanyi “vaze twalikata navo mulufwelelo,” oloze tweji kukafwanga navatu veka chamokomoko nakwitava chavo.—Wavaka-Ngalesha 6:10.
Tweji kukafwanga vandumbwetu kushipilitu nakuvavendejeka. Chuma chachinene chasakiwa kuli vaze vali muukalu shina kuvavendejeka. Halwola kana hakiko veji kutujikijisanga kuli Yehova uze apwa “Kalunga wakuvendejeka chosena.” (Wavaka-Kolinde 2, 1:3, 4) Tweji kushimutwilanga navaze veji kupwanga muukalu jishiko jamuMbimbiliya nakuvafwelelesa ngwetu kalinwomu Wangana waKalunga ukumise ukalu wosena uze tuli nakumona.—Kusoloka 21:4.
Vyuma muka vyeji kulingisanga Vinjiho jaYehova vawane washi jijila jakukafwilamo vaze vali muukalu?
Uno tunahase kuvendejeka ngachilihi kushipilitu vaze vanayovoka muponde?
