Hakukunguluka chavaka-Kulishitu vakulivanga vapwilenga nakwimba myaso, kulomba nakutanga nakushimutwila haVisoneka, vyosenevi vavilingilenga chakuzeneka kuvifutula navisemwa. (Wavaka-Kolinde 1, 14:26) Nahakukunguluka chetu chamakumbi ano veji kulinganga mwomumwe.

Jindongi jeji kufumanga muMbimbiliya kaha nawa jeji kuzatanga. Kusongo yachalumingo, chikungulwilo hichikungulwilo cheji kulikungululanga nakwivwilila kuChihande chaLikungumbuwa chaminyutu 30 chize cheji kushimutwilanga haVisoneka vize vinahase kutukafwa mukuyoya chetu oholyapwa. Tuvosena veji kutukolezezanga tutange mujiMbimbiliya jetu omu ndumbwetu ali nakuhanjika chihande mwavuluka visoneka. Nge chihande chalikungumbuwa chinakumu, kweji kupwanga Chilongesa “chaKaposhi Kakutalila” chaola yimwe. Muchilongesa kana, vandumbwetu vosena muchikungulwilo veji kushimutwilanga hachihande chamuKaposhi Kakutalila mumangazini yakulinangula. Kushimutwila kana cheji kutukafwanga tumone mwakuzachishila jindongi jamuMbimbiliya mukuyoya chetu. Vikungulwilo vyakuhambakana ha 100,000 vyeji kulinangulanga chihande chochimwe mukaye kosena.

Veji kutukafwanga tuhotole uhashi wetu wakunangula. Tweji kulikungululanga nawa mukachi kachalumingo kuvihanda vitatu vyakukunguluka. Chihanda chatete chapwa Chilongesa chaMbimbiliya chaChikungulwilo chaminyutu 30, chize chapwa chakushimutwila kuzachisa vihula nakukumbulula. Chihanda kana cheji kutukafwanga twivwishise jindongi jamuVisoneka naupolofweto wamuMbimbiliya. Chihanda chikwavo chapwa Shikola yaMulimo waTeokalasi, yaminyutu 30 yize yeji kuputukanga nachihande chakushimutwila hachihanda chaMbimbiliya chize vatanganga chimweza vandumbwetu. Kufumaho, vaze valisonekesa mushikola hinavahanjika jino vihande vyavo vyavihi. Muka-kuhana punga eji kutalanga jila vanahanjikilamo vihande nakuvakafwa vatangenga kanawa nakuhotola uhashi wavo wakunangula. (WaChimoteu 1, 4:13) Chihanda chamakumishilo chapwa Kukunguluka chaMulimo chaminyutu 30. Muchihanda kanechi mweji kupwanga vihande, navimweso, nakwihwojola, mangana vatulongese mwakunangwila vatu Mbimbiliya.

Nge namukapwa kukukunguluka chetu, kaha namukalivwisa kuwaha kulinangula Mbimbiliya mujila kaneyi yamwaza ngana.—Isaya 54:13.

• Vyuma muka munahase kukevwa kukukunguluka chaVinjiho jaYehova?

• Kukunguluka muka chamuchalumingo chize muli nakusaka kukapwako?