JiZuvo jaWangana jaVinjiho jaYehova josena jikwechi lijina lyaKalunga lyajila. Ngachize, twamona mulimo wakuwahisa Zuvo yaWangana kupwa hikutokwa chachinene kaha nawa hijila yimwe yayilemu yakulemeselamo Kalunga. Tuvosena twatela kwazana mumulimo kana.

Lisuulenu nakuwahisanga Zuvo yaWangana hanyima yakukunguluka. Hanyima yakukunguluka, vandumbwetu vamalunga navava vamapwevo veji kulisuulanga nakukomba muZuvo yaWangana. Chalumingo hichalumingo kweji kupwanga mulimo wakuwahisa kanawa Zuvo yaWangana. Mukulwane chipwe muka-kuzachila muliuka umwe ikiye eji kutwaminyinanga milimo kana, kweseka namukana wavyuma vanoneka. Vandumbwetu veji kulisuulanga nakuzata kala milimo yili nakusakiwa yakufwana nge kukomba, kukolopa, kutotomona lukungu, kuhaka kanawa vitwamo, kuwahisa muvimbushu nakuhakamo vitumbo, kukosa jinjanena navitalilo, kumbila swali, kusangula haweluka nakukwapa mwila. Kweji kupwanga likumbi limwe mumwaka lyakuwahisa chikuma haZuvo yaWangana. Tweji kunangulanga navana vetu vamone vihela tweji kulemeselanga Kalunga kupwa vyavilemu hakuvahanako milimo yimwe navakivo nawa.—Muka-kwambulula 5:1.

Lisuulenu nakuwahisa kala vyuma vinafu haZuvo yaWangana. Mwaka himwaka, jiZuvo jaWangana veji kujikekesanga mukachi nahaweluka. Vyuma veji kuwananga vyeji kukafwanga kumona haze twatela kuwahisa washiwashi kuchina kukenyeka jimbongo jajivulu kulutwe. (Mijimbu 2, 24:13; 34:10) Zuvo yaWangana yakulemeselamo Kalunga yatela lwola lwosena kupwa yaunyoji yakuwahisa kanawa. Ngachize, kwazana mumilimo kana cheji kusololanga nge twazanga Yehova nakumona vihela tweji kumulemeselangamo kupwa vyavilemu. (Samu 122:1) Echi cheji kuhananga nawa chakutalilaho chamwaza muchitungilo.—Wavaka-Kolinde 2, 6:3.

• Mwomwo ika katwatela kusuvilila vihela vyetu vyakulemeselamo Kalungako?

• Vyuma muka valongesa mangana tulame Zuvo yaWangana kupwa yaunyoji?