Munamono omwo Vinjiho jaYehova vanavwale muunyoji kukukunguluka chavo mumivwimbimbi yili muno mumbuloshuwa, ngwetu? Uno mwomwo ika tweji kuzakamanga chikuma kuvwala chetu nakulilenga chetu?

Mangana tusolole kavumbi kuli Kalunga ketu. Eyo, Kalunga keshi kutala kaha hakusoloka chetu chakumujimbako. (Samwele 1, 16:7) Oloze hakulikungulula nakulemesa Kalunga, tweji kufwilanga kuvumbika Kalunga navakwetu tweji kulemeselanga navo Kalunga hamwe. Chakutalilaho, hakuya nakumona twamina yalifuchi, tweji kufwilanga kusoloka kanawa mangana tumusolwele kavumbi mwomwo yachihela chenyi. Chochimwe nahakuya kukukunguluka nawa twatela kusolola kavumbi kuli “Muka-kuyula vaka-mavu vosena,” Yehova Kalunga, nachihela tweji kumulemeselanga.—Kuputuka 18:25.

Mangana tusolole kulema chajishimbi tweji kukavangizanga. Mbimbiliya yakolezeza vaka-Kulishitu vavwalenga “mukavumbi namujila yamangana” ngana mwavatu vaze “vamwivwa Kalunga woma.” (WaChimoteu 1, 2:9, 10) Kuvwala “mukavumbi” chalumbununa kuvwala kanawa chakuzeneka kuhambakanyisaho, chipwe kuhona kuvwala uvwalo wawihi, chipwe uze nausolola vili mukachi. Kufwila kuvwala “mujila yamangana” cheji kutukafwanga nawa tusakule uvwalo wamwaza nakulihenda kuuvwalo waupi chipwe wakuhambakanyisaho. Eji jindongi kana jinahase kutukafwa tusakule uvwalo wamwaza wakulisezaseza. Hakuvwala kanawa tunahase kuwahisa “kunangula chakuli Mulwilo wetu” ‘nakumutohwesa Kalunga,’ chakuzeneka kuhanjika numba lizu limwe. (WaChituse 2:10; WaPetulu 1, 2:12) Hakuvwala kanawa kukukunguluka tweji kulingisanga vatu vamone nganyo yatwama hakulemesa Yehova.

Uvwalo kawatela kumihonesa kuya nakukunguluka kuZuvo yaWanganako. Uvwalo wetu watela kupwa waunyoji numba tuhu wamwaka chipwe kaweshi wandando yayinene chikumako.

• Uno kuvwala chetu chapwa ngachilihi chachilemu hakulemesa Kalunga?

• Jindongi muka jeji kutukafwanga mangana tuvwale nakulilenga kanawa?