Tweji kuyanga kukukunguluka chetu chavaka-Kulishitu lwola lwosena, numba tumona tuhu ukalu wakufwana ngachilihi mukuyoya chetu. Uno mwomwo ika Vinjiho jaYehova veji kufwilanga kupwa navandumbwavo kukukunguluka numba tuhu vali naukalu mukuyoya chavo chipwe vanazeye hakufuma kumilimo?

Kukunguluka cheji kutukafwanga. Paulu asonekele hali vaze tweji kulikatanga navo muchikungulwilo ngwenyi: “Tulihakenunga michima navakwetu.” (WavaHepeleu 10:24) Awa mazu alumbununa “kushinganyeka chikuma,” kulumbununa nge twatela kulitachikiza kanawa umwe namukwavo. Ngachize, awa mazu ayou kaposetolo atukolezeza tuzakamenga vakwetu. Hakutachikiza jitanga javandumbwetu vaka-Kulishitu, tweji kuwananga nge vamwe vanahonesanga ukalu ngana wayetu, kahechi cheji kutukafwanga nayetu tuhonese ukalu kana.

Cheji kutukafwanga tutunge usepa wakukola. Hakukunguluka chetu tweji kulikungulwilanga hamwe namasepa vamwenemwene. Lwola lumwe nalumwe nawa tweji kushikamanga navo hamwe nakulya nakunwa nakulivwisa kuwaha. Uno kulikata kana cheji kutunganyalisanga ngachilihi? Tweji kulinangulanga mwakulivumbikila umwe namukwavo, nakuzamisa zangi yetu. Kaha nge vakwetu vali muukalu, tweji kupwanga vakulizanga nakuvakafwa mwomwo twatunga lyehi usoko wakukola navakivo. (Vishimo 17:17) Hakulikata navandumbwetu vosena vatwama muchikungulwilo, tweji kusololanga nge ‘twalizakama kanawa navakwetu.’—Wavaka-Kolinde 1, 12:25, 26.

Tuli nakumikolezeza mutunge usepa navaze veji kulinganga mwaya muchima waKalunga. Vatu kana munahase kuvawana hakachi kaVinjiho jaYehova. Tunamilombo ngwetu kanda kwechelela vyuma vimwe vimihonese kulikata nayetuko.

• Mwomwo ika chapwila changanyo kulikata hamwe navakwetu hakukunguluka?

• Lwola muka munashinganyeka kukeza kukukunguluka chetu mangana mukatutachikize kanawa?