Chilongesa 23
Uno Mikanda Yetu Veji Kuyisonekanga Nakuyalumuna Ngachilihi?
Lipatimende lyaVaka-kusoneka, mu U.S.A.
South Korea
Armenia
Burundi
Sri Lanka
Tweji kusonekanga mikanda mumalimi akuhambakana ha 600, mangana twambulule “mujimbu wamwaza” kuli “vaka-miyachi yosena navaka-malimi osena navatu veka naveka vosena.” (Kusoloka 14:6) Uno tweji kutesangamo ngachilihi ou mulimo waukalu ngana? Veji kutukafwanga kuli vaka-kusoneka mikanda vamukaye kosena nakuli vaka-kwalumuna mikanda vakuheta ku 3,000. Ava vosena vapwa kaha Vinjiho jaYehova.
Mikanda yosena veji kuyisonekanga chatete muChingeleshi. Lizavu Lyakutwaminyina likiko lyeji kutalanga hamilimo yaLipatimende Lyakusoneka Mikanda hachikota chetu chakaye kosena. Eli lipatimende lyeji kutalanga jino hamilimo yavaka-kusoneka mikanda vaze vazachila hachikota nahajiofesi jimwe jamitango. Kupwa navaka-kusoneka vakumafuchi akulisezaseza cheji kutukafwanga tusoneke vihande vyakupandama kuvisemwa vyakulisezaseza, nakulingisa jino mikanda yetu yitele vatu vamukaye kosena.
Mikanda kana veji kuyitumanga kuli vaka-kwalumuna. Nge vanakumisa kusoneka mikanda, kaha nawa mikanda kana vanayitavila, veji kuyitumanga jino kuli vaka-kwalumuna mikanda mukaye kosena hamakina mangana vayalumune, nakuhitulukamo nakutangamo kanawa. Vaka-kwalumuna veji kufwilanga kusakula mazu ‘akusungama amuchano’ aze nawalumbununa kanawa mulilimi lyavo, vishina vize vili muChingeleshi.—Muka-kwambulula 12:10.
Jikopyuta jeji kwashiwisangako milimo. Kopyuta kayeshi kulyesekesa hamwe navaka-kusoneka chipwe navaka-kwalumunako. Oloze milimo yavo yinahase kwashiwa nge navazachisa jindikishonali navyuma vyeka vyahakopyuta. Vinjiho jaYehova vali nakuzachisanga polongalamu yakwamba ngwavo Multilanguage Electronic Publishing System (MEPS) yize yeji kukafwanga vaka-kwalumuna valumune mikanda mumalimi amavulu, nakuhakamo mivwimbimbi nakuyiwahisa kanawa numba jino vayitume vakayipulite.
Mwomwo ika tuli nakuzachila milimo yoseneyi yakusoneka mikanda namumalimi aze vahanjika kuli vatu vavandende kaha? Mwomwo Yehova ajina ngwenyi “vatu vosena vavalwile, ngwenyi, vapwenga nachinyingi chakwoloka chakutachikiza muchano.”—WaChimoteu 1, 2:3, 4.
Uno mikanda yetu veji kuyisonekanga ngachilihi?
Mwomwo ika tweji kwalumwinanga mikanda yetu mumalimi amavulu?
