Munahase kulisuula nakuseza tanga yenu nalifuchi lyenu nakuya mulifuchi lyeka nakwambulula mujimbu wamwaza tahi? Makulukaji aVinjiho jaYehova vanalingi vene ngocho. Vanakwamba kafwe ngwavo, “Yami uno, ngutume ami.” (Isaya 6:8) Hakulinga ngocho vali nakulondezeza Yesu Kulishitu uze apwile Kamishonali wamunene.—Yowano 7:29.

Hijila yimwe yakulondezezelamo Yesu. Yesu vamutumine kuli Kalunga kufuma mwilu nakwiza nakutwama hamwe navaka-shili. Numba tuhu Yesu amwenenga vilinga vyavipi hano hamavu, oloze kafwililile kwalumuna chiyoyelo chavatu vosenako. Ahakile mangana kumulimo wenyi wakwambulula “mujimbu wamwaza waWangana waKalunga,” uze naukakumisa ukalu wosena. (Luka 4:43) Vamishonali vamwenemwene vavaka-Kulishitu veji kukavangizanga chakutalilaho chaYesu.

Valisuula muchiyoyelo chavo. Vamishonali vatela kwijilila chiyoyelo cheka, nachisemwa cheka najingonde jakulisezaseza, nakulya vyakulya vyeka vize kavejililako. Vatela nawa kulinangula lilimi lyakuchihela vali mangana valivwasanenga kanawa navatu vakungalila kana. Vatela kulisuula nawa nakuzachisa kala jila yakutambukilamo yize veji kuzachisanga vatu vakuchihela vali numba vahase kuheta nakuvihela vyatwama kwakusuku chikuma. Vamishonali vatela kupwa nazangi yamwenemwene yakuzanga vatu vali kuzachila numba valisuule mujila kaneyi.

Mutu atela kulinangula kanawa. Vinjiho vavavulu vaze veji kuzatanga mulimo waumishonali veji kuyanga kuShikola yaNgileyate Yakulinangula Mbimbiliya yatukweji vatanu. Vyuma veji kulinangulanga kushikola kana vyeji kuvakafwanga vafwelele chikuma muli Yehova, namuMazu enyi, namuliuka lyenyi. (Vishimo 3:5, 6) Eyi shikola yeji kuvalingisanga vapwenga navilinga vyauKulishitu vize vyeji kuvakafwanga mumulimo wavo waumishonali nakupwa vaka-kunangula Mbimbiliya vakwipangweji. Ngocho veji kupwanga jino vakutamo kuya nakwambulwila “nakuvihela vyakwakusuku vyahamavu.”—Vilinga 1:8.

• Vyuma muka vyasakiwa numba mutu apwenga kamishonali?

• Shikola muka yakulipwila veji kuyangako vamishonali?